Ko ha Kofu Mali mo ha Palani
“Kuo tuʻutuʻuni ʻe he ʻOtuá ʻa e nofo-malí” (T&F 49:15).
Naʻe tangutu pē ʻa Lola he mohenga hono taʻokete ko Keiliní lolotonga ʻene fakaʻosi hono faʻo ʻene kato temipalé. ʻE mali ʻa Keilini he ʻahó ni.
Naʻe fiefia ʻa Lola ke ʻalu ki he kai ʻo e malí he efiafi ko iá, ka ne toe ongoʻi loto-mamahi pē foki. ʻE lava hono tuongaʻane lahi naʻe ʻosi ngāue fakafaifekaú ʻo hū ki he temipalé mo Keilini. ʻE lava ʻo hū foki mo ʻene ongomātuʻá. Ka he ʻikai lava ʻa Lola mo hono ongo kiʻi tuongaʻané ʻo hū ki loto.
Naʻe pehē ʻe Lola, “Fakaʻamu ange ʻe au naʻe lava ke u hū mo koe ʻi he temipalé.”
Naʻe hanga hake ʻa Keilini mei hono faʻo ʻene kató. “Pehē pē mo au, ka te ke ʻi tuʻa pē. Pea ʻe ʻi ai e ʻaho te u hū mo koe he temipalé ʻi he taimi te ke mali aí.”
Naʻe ʻikai ke toe ongoʻi loto-mamahi ʻa Lola, ka ne fifili ia ki he meʻa ʻe taha. “Naʻá ke ʻiloʻi fēfē ʻokú ke fie mali mo Mātiú?” ko ʻene fehuʻí ange ia.
Naʻe tangutu hifo ʻa Keilini he tafaʻaki ʻo Lola. Naʻá ku ako ʻo ʻiloʻi fuoloa pē naʻe ʻi ai e palani ʻa e Tamai Hēvaní maʻaku. ʻI heʻeku fetaulaki mo Mātiú, naʻá ku ʻiloʻi ʻe lava ke ma fakahoko fakataha ʻa e palani ko iá.”
Naʻe fehuʻi ange ʻe Lola, “Kuó ke fakaʻosi e palani ko iá?”
Naʻe kalokalo ʻa Keilini. “ ʻOkú ma fie maʻu mo Mātiu ha fānau, fakaʻosi ʻema akó, mo ha ngaahi meʻa lahi.”
Naʻe sio atu ʻa Lola ki he kofu mali hinehina fakaʻofoʻofa naʻe tautau mai he matapā ʻo e tautauʻanga vala ʻo Keiliní. Naʻá ne pehē ange, “Hau e fakaʻofoʻofá ho kofú.”
Naʻe malimali ʻa Keilini mo pehē ange, “Ko e konga ia ʻe taha ʻo e palaní. Ne u fie maʻu maʻu pē ke u mali he temipalé, ko ia ʻoku fie maʻu ke taau hoku kofú.”
ʻOsi mei ai ha ngaahi houa siʻi kuo sio atu ʻa Lola ki he hū mai ʻa Keilini mo Mātiu ki tuʻa mei he temipalé. Naʻá na mata fiefia moʻoni.
Naʻe lele atu ʻa Lola ʻo kuku ʻa Keilini.
Hili ha ngaahi uike lahi mei ai kuo maʻu ʻe Lola ha tā ʻi he meilí. Ko ha tā ia ʻo Keilini mo Mātiu ʻokú na tuʻu ʻi he tafaʻaki ki muʻa ʻo e temipalé. Ne ʻosi tohiʻi ʻe Keilini he tafaʻaki ki ʻolungá, “ ʻOku ʻi ai ha palani ʻa e Tamai Hēvaní maʻau.”
Naʻe fokotuʻu ʻe Lola e taa ʻi heʻene funga toloá. Naʻá ne palōmesi pē kiate ia ʻe ʻi ai e ʻaho ʻe ʻalu ai ki he temipalé pea maʻu ʻa e fiefia tatau naʻe hā mei he mata hono tokouá.
Tā fakatātaaʻi ʻe Jennifer Tolman; faitā ʻa e © Busath.com