Tohi ki he ʻĒtitá
Ko ha Liahona Foʻou
ʻI he taimi naʻá ku lau ai ʻe kamata ʻi Sānuali 2010 ʻa e maʻu mai ha Liahona foʻoú, naʻá ku manatu ki he kuohilí. Kuo hoko ʻa e makasiní ko haku fakamaʻunga ʻi he ongoongoleleí talu hono papitaiso au ʻi hoku taʻu 17. Naʻe fakamālohia ʻeku fakamoʻoni vaivaí ʻi heʻeku lau ʻa e ngaahi meʻa naʻe aʻusia ʻe he kau mēmipa kehé peá u ʻiloʻi naʻe ʻikai te u tuenoa. ʻOku ou mahuʻingaʻia ʻi he ngaahi makasini kuó u tānakí, he ʻoku ʻi loto ha ngaahi pōpoaki fakalotolahi kuo nau tokoniʻi au ʻi he ngaahi taimi ʻo e faingataʻá mo e fie maʻú.
Ko ʻeni kuo mou ʻomai kiate kimautolu ha Liahona ʻoku toe fakalakalaka mo kehe ange, kae kei moʻoni pē ʻo hangē ko e fuofua makasini naʻá ku lau ʻi he 1992. ʻOku ou fakamālō lahi atu.
Sūlia A. Folōlieni, Kuatemala
Ko ha Maʻuʻanga Ivi Fakalaumālie mo e Mālohi
Ko e Liahoná ko ha tāpuaki mo ha meʻa fakafiefia ia kiate au. ʻOkú ne tokoniʻi au ke u maheni mo e kāingalotu kotoa pē ʻi he māmaní, ako ki honau fonuá mo e anga fakafonuá, pea maʻu tokoni mei heʻenau tuí. Ko e makasiní ko ha maʻuʻanga ivi fakalaumālie mo e mālohi lahi pea ʻokú ne tokoniʻi au ke u toe lelei ange.
Moteisitā Siuliani, ʻĪtali
Ko ha Mana ʻi Homau Uōtí
Naʻe hāhāmolofia ke fakahoko ʻa e faiako ʻaʻahí ʻi hoku uōtí pea tōlalo mo e ʻalu ki he temipalé. ʻI heʻeku hoko ko ha taki faiako ʻaʻahí mo ha tokotaha ngāue ʻi he temipalé, naʻá ku lotua ke lava ʻo liliu ʻeni. Naʻá ku fakaʻaongaʻi ʻa e lea ʻa ʻEletā Lisiate G. Sikoti ʻi he konifelenisí, “Lotu ʻi he Temipalé: Ko e Maʻuʻanga Ivi mo e Mālohi ʻi he Taimi Faingataʻá” (Liahona, Mē 2009, 43) ke u malanga ʻaki ʻi he fakataha sākalamēnití mo e Fineʻofá. Naʻe ongo ia ki he loto ʻo e kāingalotu ʻo e uōtí. Ko ʻeni ʻoku meimei peseti ʻe 100 ʻa e faiako ʻaʻahí, pea ʻoku tokolahi ʻa e niʻihi ʻoku ʻalu ki he temipalé mo fakahoko ʻa e ngaahi sitepu naʻe fokotuʻu mai ʻe ʻEletā Sikoti ʻi heʻene pōpoakí. ʻOku ʻoatu ha fakamālō lahi fau kia ʻEletā Sikoti ki heʻene pōpoaki fakaʻofoʻofá pea kiate kimoutolu koeʻuhí ko e Liahoná.
ʻAna Meisa ti ʻIulosio, Pelū
Kātaki ʻo ʻave hoʻo ngaahi fakakaukaú pe fokotuʻú ki he liahona@ldschurch.org. ʻE lava pē ke liliu ʻa e ngaahi faitohi maí koeʻuhí ko e lōloá pe ke toe mahinongofua.