Ko e Folofolá ʻa Hoku Poupoú

Kiseli D., Venesuela

ʻI heʻeku kamata he seminelí heʻeku kau foʻou mai ki he Siasí, naʻe ʻikai te u teitei fakakaukau au ʻe hoko e folofolá ko hoku poupou, ko ʻeku pā mo hoku maluʻi, ko hoku fakafiemālie mo e fiefiaʻanga. Ne u ʻiloʻi ʻi he folofolá ha kau tangata loto-toʻa ʻa e ʻOtuá naʻa nau tau maʻá e ngaahi meʻa naʻa nau tui ki aí mo honau ngaahi fāmilí pea nau vilitaki atu maʻu pē ki muʻa, ʻo tuʻu maʻu mo taʻe-toe-ngaue ʻia Kalaisi. Naʻa nau loto fakatōkilalo, faʻa kātaki, pea fonu ʻi he ʻofá, ʻofa faka-Kalaisí, mo e tuí. ʻOku ou ʻilo naʻa nau maʻu ʻa e holi ʻi honau lotó ke tau moʻui ʻaki ʻi hotau kuonga ni ʻa e tefitoʻi moʻoni takitaha ʻoku akoʻi mai ʻi he folofolá.

Naʻá ku saiʻia ʻi he kau helo takitaha ko ʻeni ʻi he folofolá, ka ko e tokotaha naʻá ku saiʻia taha aí ko ha tokotaha naʻe loto fakatōkilalo mo talangofua pē talu mei heʻene kei siʻi, ko ha tokotaha naʻá ne tā ha sīpinga haohaoa, ko ha tokotaha ʻoku moʻua lahi ki ai ʻa e faʻahinga kotoa ʻo e tangatá. Ko e tangata ko iá ko Sīsū Kalaisi. ʻOku ʻikai te u maʻu ha lea ke fakahā ʻaki ʻeku loto houngaʻiá kiate Ia.

Ne akoʻi kiate au ʻe he seminelí ʻoku ʻikai ko e folofolá ke tauhi pē ʻi heʻetau manatú ka ke tau moʻui ʻaki. ʻOku ou fakamālō takitaha ki heʻeku kau faiako leleí, ʻa ia ne nau hoko moʻoni pē ko ha ngaahi meʻangāue ʻi he toʻukupu ʻo e ʻEikí.