Ongoongo ʻo e Temipalé
Temipale Manila Filipainí
Naʻe fakatapui ʻe Palesiteni Kōtoni B. Hingikelī (1910–2008) ʻa e Temipale Manila Filipainí ʻi Sepitema ʻo e 1984. Ko e fuʻu fale fakaʻofoʻofa taua tōtao ʻe ono ko ʻení ʻoku teuteuʻi ʻaki ʻa tuʻa ʻa e taila maka hinehina pea ʻoku takatakai ʻe he ngaahi fuʻu paame fakaʻofoʻofa mo e ngaahi ʻakau lanu kehekehe.
Ne fakahoko ʻa e ʻoupeni hausi ʻa e temipalé hili pē ia ʻa e tō ha afā ʻe ua ʻo laiki ʻa e ʻOtu Motu Filipainí. Neongo ʻa e afaá, naʻe hoko atu pē ʻa e ngaahi polokalamá ʻo hangē ko ia ne fai ki ai e palaní. ʻI he ʻaho 3 ʻo Sepitema 1984, ne takimamata ai ʻi he temipalé ha kau ʻōfisa māʻolunga ʻa e puleʻangá. ʻI he ʻaho hono hokó ʻi he fakaʻatā ʻa hono mamataʻi ʻe he kakaí, naʻe pehē ʻe Sovenisio ʻIlakani, ko e sekelitali pule ʻa e kōmiti temipalé lolotonga ʻa e langá, “naʻe ulo atu ha maama fakalangi fakaʻofoʻofa ʻo feʻunga tonu mo e temipalé. Naʻe hoʻata mai e laʻaá ʻi hono masaní, ʻi ha huelo lanu kehekehe. … ʻI ha taimi ʻe taha, naʻe ulo ʻa e huelo lanu kehekehe ko ʻení feʻunga tonu mo e ʻīmisi ʻo e ʻĀngelo ko Molonaí. Ne sio tonu ha kakai ʻe laungeau naʻe ʻi he temipalé ki he meʻá ni. Ne loʻimataʻia ʻa e tokolahi.”1
Ko e Temipale Manila Filipainí ʻa e fuofua temipale ke langa ʻi he ʻOtu Motu Filipainí. Ne kamata ʻa e langa ʻo e temipale hono ua ʻi he fonuá ni ʻi he 2007 ʻi he Kolo ko Sepú.