Tāpuekina ʻe Mama Tāmino
Victor D. Cave, Ngaahi Makasini ʻo e Siasí
Ko e fuofua taimi naʻá ku fetaulaki ai mo Taumatangi Tāminó, naʻá ku kei siʻi pea naʻá ku lolotonga ngāue fakafaifekau ʻi homau fonuá pe. Ko Sisitā Tāminó ko ha uitou toulekeleka naʻe kiʻi piko hono tuʻá koeʻuhí ko hono taʻu motuʻá mo e ngaahi ngāue lahi ʻi he kuohilí, ka naʻe mafola maʻu mai pe hono ongo nimá ke fakafeʻiloaki kiate au mo hoku hoá pea ʻuma ki homa ongo kouʻahé fakatouʻosi he ko e fakafeʻiloaki angamaheni ia ʻo Tahití.
Naʻe toulekeleka ʻa Sisitā Tāmino pea ko ʻene lué naʻe tuai pea māmālie, ka naʻá ne tokangaʻi ʻa e toko taha kotoa. Naʻá ne fakapapauʻi maʻu pē ʻoku maʻa mo haiane homa valá. Naʻe ʻofa ʻa e longaʻi fānaú ai koeʻuhí he naʻá ne talitali lelei kinautolu pea fanongo ki he ngaahi meʻa ʻoku nau lea ʻakí. Naʻá ne moʻui ʻi ha tuʻunga angamaheni pē ʻi ha fale loki ua ne ʻātakai ʻe he ʻoneʻoné, ngaahi ʻulu paame, fāmilí mo e ngaahi kaungāmeʻá. ʻI heʻenau fakaʻapaʻapaʻi iá naʻe ui ia ʻe he toko taha kotoa ko “Mama Tāmino.”
Naʻe fekauʻi au mo hoku hoá, ʻEletā Tani Faiti, ʻe he palesiteni ʻo e Misiona Papeʻete Tahití ke ma tokoni ke teuteuʻi ha kāingalotú ʻe toko 80 ke nau maʻu honau ʻenitaumení pea silaʻi ko ha ngaahi fāmili ʻi he temipale ofi tahá—ʻa e Temipale Hamilitoni Nuʻu Silá ʻa ia ʻoku houa ʻe 5 ʻa e puna vakapuna ki aí. Kuo folau tuʻo taha ʻa Mama Tāmino ʻi he taʻu ki he temipalé ʻi he taʻu ʻe ono kuohilí, pea ko e taʻú ni ʻe toe ʻalu pē. Naʻá ku fakakaukau pe naʻe anga fēfē ʻene kau he ngaahi folau totongi mamafá ni lolotonga iá naʻe ʻikai ke ne maʻu ha meʻa. Naʻá ku toki ʻilo ʻa e talí hili ha taʻu ʻe ono mei ai.
ʻI he 1976 ʻi heʻeku hoko ko e palesiteni ʻo e Siteiki Tahiti Papeeté, naʻá ku ʻaʻahi maʻu pē ʻa e ngaahi ʻapi siasí. ʻI ha hoʻatā ʻe taha naʻá ku tuʻu atu ʻi he ʻapi siasi ʻi Tipaeluí. ʻI he taimi ko iá naʻe totongi ha niʻihi ke nau tauhi e ngaahi ʻapi siasí, pea naʻá ku maʻu atu ʻa Mama Tāmino ki ai, ʻoku ʻi hono taʻu 60 tupú, ʻokú ne ngāue mai ko e tokotaha tauhi ʻapi siasi ke tokoni ke tauhi ʻaki hono fāmili tokolahí. Pea naʻá ne talitali lelei au ʻi heʻene fakafeʻiloaki mai, “Haʻu ʻo kai,” peá u pehē ange ki ai, “Mama Tāmino, kuó ke matuʻotuʻa pea ko hoʻo kai hoʻatá ko e kiʻi konga mā, kapaika sātini mo e kiʻi hina inu? ʻIkai ʻoku lahi feʻunga hoʻo vahé ke kumi ha meʻakai lahi ange?”
Naʻá ne tali mai, “ ʻOku ou tātānaki ke u toe folau atu ki he temipalé.” Naʻe molū hoku lotó ʻi heʻeku sio ki heʻene tā ʻa e sipinga ʻo e ʻofá mo e feilaulaú. Naʻe folau tuʻo 15 nai ʻa Mama Tāmino ki he temipale Nuʻu Silá—ʻi he taʻu kotoa pē ʻo aʻu ki hono fakatapui ʻo e Temipale Papeete Tahití ʻi he 1983. ʻI he ʻaho ne fakatapui ai e temipalé naʻe hā mai ʻa e fiefia ʻi hono fofongá.
ʻI he 1995, ʻi heʻeku hoko ko e palesiteni fakamisioná, naʻá ku toe sio kia Mama Tāmino. Naʻá ne hiki ʻo nofo ʻi he kiʻi motu ofi ki he feituʻu naʻe fāʻeleʻi ai iá ko Makemo. Ko hono taʻu 80 tupú ʻeni, kuo ʻikai toe lava ʻo lue, ka naʻe tala ʻe he ngaahi mingimingi ʻo hono matá ʻa ʻene nonga, kātaki mo e mahino loloto ki he moʻuí mo e ongoongoleleí. Naʻá ne kei maʻu ʻene malimali fakaʻofoʻofá pea naʻe hā mai mei hono fofongá ʻa e ʻofa haohaoá.
ʻI he pongipongi hokó naʻá ku maʻu atu ia ʻoku fai ʻene taʻataʻaki mo fakamaʻa ngoue mai ʻi he taha ʻo e ngaahi falelotú. Naʻe fua ia ʻe he taha ʻo hono ngaahi fohá ki ai. Ko e ʻosi pē ha konga ʻe taha, ʻokú ne fakaʻaongaʻi hono ongo nimá mo e umá ke ʻunu ki he faʻahi ʻe tahá. Ko ʻene founga ʻeni ke hokohoko atu ai ʻene ngāue maʻá e ʻEikí.
ʻI ha efiafi poʻuli ʻe taha lolotonga ʻeku fakahoko ha ngaahi ʻinitāviu temipale, naʻe ʻomai ʻa Mama Tāmino ki he feituʻu naʻá ku nofo ai ʻi ha lalo ʻakau ofi ki he ʻapi siasí. Naʻá ne fie maʻu ʻa e faingamālie ke tali ʻa e ngaahi fehuʻi kotoa pē ne fie maʻu ki he lekomeni temipalé.
Naʻá ne fakamatala ʻo pehē, “Palesiteni, ʻoku ʻikai ke u toe lava ʻo ʻalu ki he temipalé.” “ ʻOku fakaʻau ke u motuʻa peá u mahamahaki, ka ʻoku ou loto ke ʻi ai maʻu pē haʻaku lekomeni temipale ʻoku kei ʻaongá.”
Naʻá ku lava ʻo tala ʻa ʻene loto ke ʻalu ki he temipalé pea ʻoku ou ʻilo ne tali ʻe he ʻOtuá ʻa ʻene holi ke ʻalu ki he temipalé. Hili ha taimi nounou mei ai naʻá ne mavahe atu mei hono sino fakamatelié ʻo kau fakataha mo kinautolu naʻá ne fakahoko faivelenga ʻa e ngāue ki ai ʻi he fale ʻo e ʻEikí. Naʻe ʻikai te ne ʻave mo ia ha meʻa, ko e tuí pē, fakamoʻoní, angaleleí, ʻofa faka-Kalaisi, mo e loto vilitaki ke tokoní.
Ko Mama Tāminó ko ha paionia Polinisia moʻoni ia ne tāpuekina ʻe heʻene ngaahi sīpingá ʻa e tokolahi ʻo hono ngaahi tuongaʻane mo e tokoua—kau ai au.
Aʻu ki he taʻu 80 tupú ʻa sisitā Tāminó mo ʻene kei ngāue pē ʻi he ngoue ʻo e ʻapi siasí ʻo taʻataʻaki mo fakamaʻa. Ko ʻene founga ʻeni ke hokohoko atu ai pē ʻene ngāue maʻá e ʻEikí.