Tala ia Iesu
Iesu a o avea ma se Tamaitiiti
O lenei tala e maua i le Mataio 2; Mareko 6:3; Luka 2:21–52.
Sa sii e Maria le pepe o Iesu a o savali atu o ia i totonu o le malumalu pisi i Ierusalema. Sa o mai i laua ma Iosefa mai Peteleema e tuuina atu se taulaga o lupe e lua i le malumalu. Sa toeitiiti ono vaiaso le matua o Iesu.
Sa i ai i le malumalu se toeaina e igoa ia Simeona. Sa folafola atu ia te ia o le a i ai se aso e vaai ai i le Faaola. “Ua iloa e ia i le Agaga Paia, e le oo ia te ia le oti seia muai iloa atu le Keriso o le Alii” (Luka 2:26). Ina ua ia vaai i le pepe o Iesu, sa olioli Simeona aua sa ia iloa ua faataunuuina le folafolaga. Ona molimau fiafia atu lea o se fafine e igoa ia Ana sa auauna atu i le malumalu e faapea o Iesu o le Faaola.
Ae e le o tagata uma sa fiafia i le fanau mai o le Faaola. Sa faalogo le Tupu o Herota ua fanau se tamaitiiti o le a fai ma tupu o tagata Iutaia. Sa le manao Herota i nisi lava tupu i lona nuu. O lea sa ia poloai ai ina ia fasiotia uma pepe sa fananau latalata atu i Peteleema i le lua tausaga talu ai.
Sa oo mai se agelu i se miti ia Iosefa e lapatai o ia e uiga i le fuafuaga a Herota. Sa sosola Iosefa ma Maria i le po. Sa la o ma ave Iesu e nofo i le nuu o Aikupito, lea o le a saogalemu ai o Ia.
Ina ua oti le Tupu o Herota, sa malaga atu le aiga o Iesu i le aai o Nasareta. Sa galue ai Iosefa o se kamuta. Sa vaai e Maria le aiga.
Sa aoao Iesu e galue i tafatafa o Iosefa. E pei foi o tamaiti uma o sa Iuta, sa Ia aoaoina tusitusiga paia ma tulafono a sa Iuta. Sa usiusitai Iosefa ma Maria i poloaiga, ma sa aoao mai Iesu i Ona matua faalelalolagi. Ua “tupu [Iesu], ma ua malosi lona loto, ua tumu i le poto: ua ia te ia foi le alofa o le Atua” (Luka 2:40).
Ina ua 12 tausaga o Iesu, sa ave o Ia e Maria ma Iosefa i Ierusalema e faamanatu ai le Paseka. Sa latou malaga faatasi ma le toatele o isi tagata. Sa savavali ia tamaitai ma alii i ni vaega eseese, ma sa faatasitasi aiga i afiafi taitasi e aai faatasi a o latou tolauapi i le ala.
Ina ua uma le sauniga faamanatu sa amata loa ona toe foi atu Iosefa ma Maria i lo latou aiga. O le po lena sa la iloaina ai sa lei sau Iesu i se vaega sa latou malaga faatasi mai. Sa la toe faanatinati atu i Ierusalema e sue mai o Ia. Ina ua mavae aso e tolu, sa la maua atu Iesu i totonu o le malumalu. Sa talanoa o Ia i faiaoga ma tali a latou fesili. Sa matuai ofo tagata na i ai i le malumalu.
Sa ta’u atu e Maria ia Iesu, sa matuai popole i laua ma Iosefa. Sa faamanatu atu e Iesu ia te ia sa tatau ona Ia faia le galuega a Lona Tama Faalelagi. E ui lava ina sa laitiiti o Ia, ae sa silafia e Iesu sa i ai se galuega taua e tatau ona fai o se vaega o le fuafuaga a Lona Tama Faalelagi.
Tauagavale pito i luga: faamatalaga mai le Keriso ma le Taulealea Mauoa, na saunia e Heinrich Hofmann, mai faaaloaloga a le C. Harrison Conroy Co.; luga: ata na tusia e Dan Burr; o isi ata na tusia e Casey Nelson