Mataupu Faavae o le Faatuatua 1:13

13 Matou te talitonu ia faamaoni, amiotonu, nofo mama, agalelei, amio mama, ma le faia o mea lelei i tagata uma; e moni, matou te faapea atu, matou te tausisi i le apoapoaiga a Paulo—Matou te talitonu i mea uma, matou te faamoemoe i mea uma, ua uma ona matou onosai i mea e tele, ma matou te faamoemoe o le a mafai ona matou onosai i mea uma. Afai o i ai nisi mea mama, matagofie, logoleleia, ma tauleleia, matou te saili ia mea uma.

Matou te Talitonu

“[O lenei] mataupu faavae o le faatuatua o se tasi o tautinoga faavae o lo tatou talitonuga. E tatau ona tatou saga tepa pea i ai. Aua, soo se taimi atonu e tofotofoina ai i tatou e faia se mea leaga, pe le faamaoni pe le mama, ona oo mai ai lea i o tatou mafaufau ma le malosi, o lenei fuaitau taiala o mataupu faavae o la tatou amio.”

Peresitene Gordon B. Hinckley (1910–2008), “Aua le Fefefe e Fai Mea Lelei” Liahona, Fep. 2000, 5.

Nofo Mama

“O feusuaiga faaletagata ola e le na o se mataupu faaletino. Ae o le mea moni, o le ola mama ma le faamaoni e amata i totonu o le agaga, ae le o totonu o le tino. O ni faatinoga ia o le tulaga o o tatou agaga. Afai e ogatasi o tatou agaga ma upumoni o le talalelei, tatou te mananao foi tatou te ola i ni faatulagaga maualuluga, ma o a tatou mea e fai e atagia mai ai lena naunautaiga. O lea la, o le ola mama ma le faamaoni e sili atu nai lo le lē faia o ni fesootaiga faalefeusuaiga ao lei faaipoipo, atoa ai ma le faamaoni faalefeusuai pe a mae’a ona faaipoipo. E faamatalaina ai uiga ’au’au mama o lo tatou ola faaleagaga.”

Terrance D. Olson, “Upu Moni o le Taumamaina Atoatoa” Liahona, Oke. 1999, 31

Agalelei

O le amio mama o le ia agalelei ma lima foai, i se faaupuga—o le faia o mea lelei. I le misiona a Iesu Keriso, sa Ia “femaliuai ma agalelei, … aua sa ia te ia le Atua” (Galuega 10:38). A e ola i se olaga e agalelei, o le a faamalosia ma siitia oe e le Atua.

Apoapoaiga a Paulo

Tagai Filipi 4:8, o se vaega o se tusi mai le Aposetolo o Paulo i le Ekalesia i Filipi.

Saili i Ia Mea Uma

Faitau le vaega “Faafiafiaga ma Ala o Faasalalauga” i le Mo Le Malosi o le Autalavou (itulau 17). Pe o ogatasi faafiafiaga o loo e filifilia ma nei tulaga faatonuina ma le mataupu faavae o le faatuatua e sefulutolu? Ia mafaufau e tusi i lau api o talaaga ia auala ua faamanuiaina ai oe i le filifilia o ala o faasalalauga lelei.

Amiomama

“O le amiomama ‘o se mamanu o mafaufauga ma amioga e faavae i tulaga faatonuina lelei ma maualuga. (Tala’i La’u Talalelei, 127). E aofia ai le amio mama ma le amioatua. O le amiomama e amata atu i le loto ma le mafaufau. E faafaileleina i le aiga. O le faaopoopoga o le faitau afe o filifiliga ma amioga laiti. … O tamaitai ma alii amio lelei ua i ai se mitamitaga faatamalii ma se malosi i totonu. E toa i latou aua ua agavaa i latou e maua ma taialaina e le Agaga Paia.”

Elaine S. Dalton, peresitene aoao o Tamaitai Talavou, “O Se Toe Foi i le Amio Lelei,” Liahona, Nov. 2008, 78–80.