Faasoaina atu o le Areto o le Ola
O se aso vevela i Foz do Iguaçu, Paraná, Pasila. Sa ou malaga mo le tele o itula ma sa ou le lava. I le avea ai ma se taitai i le Ofisa o Aoga a le Ekalesia, sa i ai ni mataupu e tatau ona ou talanoa atu ai i le epikopo, o lē sa tuu ma te feiloai i le falelotu. Ae peitai, e le’i avanoa o ia mo ni nai minute i le taimi na ou taunuu ai.
A o o’u faatalitali, sa ulufale mai se tamaitai i le falelotu. Na sau o ia ia te au ma aioi mai ma le lotomaualalo mo sina tupe e faatau ai se falaoa. Na ia faamatala mai ua la fia aai lava ma lona toalua, ma e ui i lona ma e fai mai, ae na fai mai o ia e leai lava se isi ana filifiliga. “Tau lava o sina falaoa,” o lana faaopoopo mai lea.
Na ootia a’u, ma sa ou aumaia sina tupe mai la’u taga. Na ia manatu ua telē tele. Sa ou fai atu ia te ia, “Faatau se falaoa, susu, ma se fasipovi.”
Na faafetai o ia ma sa faapea mai, ua uma ona folafola atu i lona toalua se galuega mo le Aso Lua a sau. Sa manao o ia e toe totogi mai la’u tupe i le taimi lava e maua ai lona totogi.
Sa ou fai atu ia te ia e aua le popole. Ae sa ia manao lava.
Sa ou fai atu ia te ia, “Nai lo lou toe totogiina mai, e mafai ona e sau i le falelotu lenei i le taeao o le Aso Sa. A e taunuu mai iinei, ta’u i soo se tasi lava e te fia talanoa ma faifeautalai. Ua lelei?” Sa ia ioe mai.
Na alu ese atu le tamaitai. Sa foia le mataupu lea e tatau ona ma talanoa ai ma le epikopo ma faaauau le malaga e pasi atu i Paraná, i le faiga o la’u galuega.
Na tele masina ua mavae atu, ma na toe i ai se isi avanoa ou te toe alu ai i lena lava falelotu i Foz do Iguaçu mo se konafesi. Na matagofie ma manaia pesepesega a le aufaipese. Ina ua maea le konafesi, sa faafeiloai a’u e se tasi o le aufaipese. Sa aapa mai lona lima, ma faafeiloai a’u i se ataata matagofie, ma fai mai ma le ootia, “Faafetai tele lava, tuagane. E le na o le falaoa na e aumaia ia te a’u ina ia faamalie ai lo ma fiaaai ma lo’u toalua; ae na e aumaia foi ia te au le areto o le ola. Faafetai lava.”
Sa ou matua lagona le olioli tele a o ou matauina atu le tamaitai lea na aioi mai ia te au mo sina tupe i nai masina ua mavae atu. Na ou iloaina o le talalelei a Iesu Keriso—lea na Ia folafola mai Ia Lava o le Areto o le Ola—e suia ai le olaga o soo se tasi e taliaina.