O Le a Se Mea Fou o i le Polokalama o leAlualu i Luma o le Tagata Lava Ia?
O le taimi lenei e sauniuni ai mo le lumanai matagofie o loo faatalitali mai ia te oe. O le a fesoasoani ia te oe le polokalama o Le Alualu I Luma O Le Tagata Lava Ia e te saunia ai ma e malamalama ai i lou faasinomaga o se afafine o le Atua.
O Le Alualu I Luma O Le Tagata Lava Ia e le o se polokalama e ese mai i lou olaga. E mafai ona fesoasoani e te latalata atili ai i le Faaola, auauna atu i isi, aoao tomai faaletaitai, atiina ae fegalegaleaiga, ma saunia ai mo feagaiga i le malumalu. O Le Alualu I Luma O Le Tagata Lava Ia e mafai ona fesoasoani ia te oe e atiina ae ai tulaga masani amiotonu. Pe a e faia e le aunoa mea laiti, e avea ma se vaega o lou olaga ma suia ai oe. E moni lava “o mea faatauvaa ma mea faavalea” ua “faataunuuina [ai] mea tetele” (Alema 37:6).
O le toe faafouga o le tamaitusi o Le Alualu I Luma O Le Tagata Lava Ia, o loo i ai le malumalu i le faavaa. O le malumalu, o le mafuaaga autu lea o mea uma tatou te faia i le polokalama a Tamaitai Talavou. Matou te faamoemoe a o e vaai atu i le faavaa, o le a e manatua ai o le auai i le faatinoina o le polokalama o le Alualu I Luma O Le Tagata Lava Ia o le a fesoasoani lea e te saunia ai e osia ma tausia feagaiga o le malumalu i se aso.
E lanu piniki le tamaitusi fou O Le Alualu I Luma O Le Tagata Lava Ia! O lenei lanu vaivai a tamaitai o se faamanatu ia te oe o se afafine o lo tatou Tama Faalelagi, o loo i ai ni uiga tulaga ese tau tamaitai, ni meaalofa, ma ni matafaioi.
I totonu o le tamaitusi fou, o nisi o mea e fai ma galuega faatino o tulaga faatauaina ua i ai ni suiga laiti ina ia sili atu le fetaui ma lenei vaitaimi ma sili ona taulai atu i feagaiga o le malumalu o le a e osia ma tausia i se aso. O nisi nei o tali i au fesili.
E faapefea ona ou amataina le polokalama o le Alualu I Luma O Le Tagata Lava Ia? E faigofie ona amata! Amata i so’o se tulaga faatauaina e te fiafia i ai. E te le tau faatinoina ia tulaga faatauaina i se faasologa faatulagaina. O le faia o mea faatonuina e fai o le a fesoasoani e te malamalama ai i tulaga faatauaina ma pe aisea e taua ai i lou olaga.
O ai e mafai ona auai? O le polokalama o le Alualu i Luma o le Tagata Lava Ia e faaautu tonu lava i tamaitai talavou o le Ekalesia, ae e mafai foi ona auai isi. Mo se faataitaiga, e mafai ona e filifili e valaaulia au uo e le o ni tagata o le Ekalesia tou te galulue faatasi i le polokalama o le Alualu I Luma O Le Tagata Lava Ia. E mafai foi ona auai o outou tina po o isi tamaitai.
O le a le vave e tatau ona ou faagasoloina ai? Pe a e tatalaina le tusi o le Alualu I Luma O Le Tagata Lava Ia, o le a e maua ai nisi o mea ua leva ona e faia i le aoga po o le aiga. Faamalo ia te oe lava ia mo nei mea ma fuafua mamao ina ia mafai ai ona e faia ma se faamoemoega. E pule lava oe i le vave e te galue ai. Afai ua sefululua ou tausaga ma e te faia se aafiaga se tasi i masina taitasi ma ni galuega faatino se lua i tausaga taitasi, e oo atu i le taimi e avea ai oe ma Lora, ua mae’a. Ona e maua lea o le avanoa e faufautua ai i isi tamaitai talavou o loo galulue ia latou polokalama o le Alualu I Luma o le Tagata Lava Ia. Pe a e faia le mea lenei, o le a e mauaina le Pi Faamamaluina, lea e faatusa i se taumafaiga faaopoopo e auauna atu i isi.
E Mafai Ona Ou Faataunuuina le Alualu I Luma o le Tagata Lava Ia i le Mutuale? E mafai ona e faia se vaega o lau Alualu I Luma o le Tagata Lava Ia i le Mutuale. E mafai ona avea se galuega faatino ma a outou gaoioiga o le Mutuale. E mafai foi ona e galue i lau Alualu I Luma o le Tagata Lava Ia i totonu o lau vasega a Tamaitai Talavou ao e aoaoina ia tulaga faatauaina ma suesue i tusitusiga Paia.
O a ni ituaiga avanoa faaletaitai ou te maua ai? Ao e tapena ia faataunuuina se galuega faatino e 10 itula, e mafai ona e valaauliaina isi tamaitai talavou e fesoasoani ia te oe. O le faia o lenei mea o le a fesoasoani e te aoaoina ai tomai faaletaitai mo au matafaioi i le lumanai i le avea ai ma se ava, tina, ma se tausiaiga. O le a fesoasoani foi e te aoao ai pe faapefea ona faatulaga, fesootai, ma faataunuu se galuega faigata.
Aisea ua talosagaina ai a’u ina ia tausia sa’u api o talaaga? O lenei api o talaaga o le a avea ma se faamaumauga taua mo oe i le taimi na e i ai i le faalapotopotoga o Tamaitai Talavou ma tautinoga na e faia. O le tusitusi i lau api o talaaga o le a valaaulia ai le mafutaga a le Agaga Paia.
O faamanuiaga o le Alualu I Luma o le Tagata lava Ia e faaauau i tua atu o tausaga o Tamaitai Talavou. O le a faateleina lou faatuatua ma lau molimau i le Faaola ma Lana talalelei toefuataiina. O le a e saunia mo lau misiona ma matafaioi paia i luga o le fogaeleele. O le a e tofo i le suamalie o le auauna atu ma le olioli i galuega amiotonu. O le a e lagonaina le uunaiga a le Agaga Paia, lea o le a taitaiina ma aoaoina oe. O le a e atiina ae se mamanu o le soifuaga lea o le a faamanuiaina ai lou olaga, i le taimi nei ma le faavavau atoa. O se mamanu o le alualu i luma ma le osia ma le tausia o feagaiga o le malumalu. Ia faamanuiaina outou ao outou amataina lenei mamanu o le alualu i luma. Matou te alolofa ia te outou! E alofa le Alii ia te outou! O outou o Ona afafine faapelepele.
O le faatusa a le Ofagapi o le ofagapi, o se faamanatu o le fai fai mea faatasi, felagolagomai, ma le galulue.
O le faatusa o le Maea Meite o le rosa, o se faamanatu o le alofa, faatuatua, ma le mama a’ia’i.
O le faatusa o le Lora o le pale lora, lea e tu mo le mamalu ma le tulaga faamanuiaina.
Asoa o le Sulu
A e ulufale atu i le faalapotopotoga o Tamaitai Talavou, o le a tauaao atu ia te oe e ou taitai se asoa o le sulu. O lea asoa o se faatusa o lau tautinoga e te tu mo le upumoni ma le amiotonu i taimi uma i mea uma ma nofoaga uma. O le faatusa o le sulu o le a faamanatu atu foi ia te oe ina ia “tutula’i ma susulu atu, ina ia faia lo outou malamalama ma tagavai mo atunuu” ( MFF 115:5). Ia asoaina ma le faagaeetia lenei asoa ma ia manatua lau tautinoga.
Tamaitusi o le Alualu i Luma o le Tagata Lava Ia
A maea loa ni au mea e fai ma se galuega faatino mo se tulaga faatauaina, o le a maua sau faailoga pipii lanu auro e tuu i le pito i tua o lau tusi o le Alualu i Luma o le Tagata Lava Ia. Tusi ai le aso lea na e faamaeaina ai lena tulaga faatauaina. O le a avea lau tusi ma lau api o talaaga ma au faamaumauga totino o mea lelei uma o loo e faataunuuina.
Tusi Faamaonia o le Siitaga
A e sii mai lea vaitausaga i le isi, o le a aloaiaina oe e lou epikopo po o le peresitene o le paranesi i se tusi faamaonia o le aloaiaina ma le faamaeaina. Ia teu i se nofoaga faapitoa e faamanatu atu ai ia te oe ia mea na e aoaoina ma faataunuuina i ou tausaga i le Ofagapi, Maea Maite, ma le Lora.
Lipine o Mau
A maea loa au mea e fai ma se galuega faatino mo se tulaga faatauaina, o le a e maua se lipine e faailoga ai au mau e sili ona e fiafia i ai e faatatau i tulaga faatauaina. O lipine o loo i lanu o tulaga faatauaina: paepae mo le faatuatua, auro mo le mama, ma isi. O le a tauaao atu e lou taitai lea lipine ia te oe i se sauniga a Tamaitai Talavou.
Aloaiaina o le Tulaga Faatamaitai Talavou
Pe a e faamaeaina le polokalama o le Alualu I Luma O Le Tagata Lava Ia, o le a e faamauina i lau api o talaaga lau molimau ma faia se faatalanoaga ma le epikopo po o le peresitene o le paranesi. Ona e agavaa loa lea e maua lou faailoga o le Aloaiaina o le Tulaga Faatamaitai Talavou. Ua suia le asoa ina ia aofia ai faatusa o vaitausaga faapea ma le malumalu. O loo i ai foi ma se penina laitiiti i le ogatotonu o le rosa a le Maea Maite. O lenei penina o se faatusa ua mae’a lau polokalama o le Alualu I Luma O Le Tagata Lava Ia ma le tulaga faatauaina fou o le mama. O le penina o le a faamanatu atu ai ia te oe o se tamaitai talavou amio mama e taua ma “e silisili lona tau i penina” (Faataoto 31:10).
Pi Faamamaluina
A maea ona maua sau asoa, ua mafai loa ona e faaauau e maua se taui o le Pi Faamamaluina i le toe faitauina o le Tusi a Mamona ma le faia o isi auaunaga faaopoopo, e aofia ai le fesoasoani atu i se isi tamaitai talavou i lana polokalama o le Alualu I Luma O Le Tagata Lava Ia.
Ata o Sister Dalton © Busath Photography; atatusi © Dover Publications; fua o le rosa e le’i matala saunia e Traci O’very Covey; ata na pueina e Robert Casey
Ata na saunia e John Luke © IRI