Tatou te Faalogo i le Agaga
Michael Angelo M. Ramírez, Niu Sila
I se tasi o taeao na ma fuafua ai ma la’u soa faifeautalai e ma te o e tuitui faitotoa ma tufa tamai tusi i la matou eria ua tofia i ai maua i Filipaina i saute. A o ma pisi e tuitui ia faitotoa, sa aga’i mai se tamaloa ia i maua ma fesili mai po o le a le ma mea lea e fai. Na mafai ona ma iloaina sa inupia.
I lo ma manatu e le o matua fiafia tele o ia i la ma savali, na ma tuu atu ai ia te ia se tamaitusi e uiga i le faamoemoega o le olaga. Ona ma ta’uina atu lea ia te ia, afai e na te faitauina le tamaitusi ma aua le inupia i lena afiafi, o le a ma o mai i lona fale e faamalamalama le faamoemoega o le olaga. Na lue mai lona ulu ma fai mai o le a ia faatali mai mo maua. Na ma faatopetope atu i se ma aoaoga na faatulagaina.
E le i ai lava so maua faamoemoe e toe foi i lena afiafi e aoao o ia, ae o aso uma lava mulimuli ane pe a ma pasia lona fale, ou te lagona ai lava se uunaiga ma te afe. Ae peitai, e vave lava ona ou faagalogalo i lea lagona, ma tau faamaonia au faaiuga i lo’u fai ifo ia te au lava, ai ua onā tele ma le mafai ona faalogo mai.
Ina ua mavae ni nai aso, na matua malosi lava le uunaiga ma ua le mafai ai ona ou toe teenaina. Ina ua ma tu’itu’i atu i lona faitotoa, na faafeiloai i ma’ua e se tamaitai na matua te’i ma fesili mai pe aisea na ma le toe foi atu ai muamua, e pei ona ma folafola atu. Fai mai a ia, na la faatalitali mai ma lona toalua i lena po mo ma’ua, ma o se taimi muamua lea talu ona la faaipoipo, e le’i inu ai o ia.
Sa ma maasiasi ma tasoo atu le faatoese. Sa ma faatulagaina se taimi e toe foi atu ai i lena po e aoaoina o ia ma lona toalua. E lei umi se taimi mulimuli ane sa salamo ai le Uso o Gumabay (ua suia le igoa) i ona vaivaiga uma faalelalolagi, ma sa papatisoina, ma avea ma se poutu o le malosiaga i le alalafaga.
I ni nai aso talu ona mavae atu lona papatisoga, na ou siitia ai i se isi eria ma le toe maua ai se fesootaiga ma le aiga. Pau lava le mea na mafai ona ou faia o le faamoemoe lea ma tatalo ina ia tumau lo latou malolosi i le Ekalesia.
Na ou iloa mulimuli ane o le tamai pitonuu lea sa nonofo ai le aiga o Gumabay sa fai ai se paranesi ona sosoo ai lea ma se uarota. Na valaauina Uso Gumabay e avea ma epikopo o lena uarota. Na ou iloa foi ua toatele nisi o ona aiga ua auai i le Ekalesia.
Ina ua ou toe foi atu e asiasi i la’u eria tuai sa ou talai ai, na ou iloa ai e toatele tagata na liliu mai i le Ekalesia ona o le faataitaiga lelei a Epikopo Gumabay, o se na tuuina atu lona ola i aao o le Alii ma tuuina o Ia i le foeuli o lona aiga ma gaoioiga o aso taitasi.
Ou te matua faafetai lava ina ua ma faalogo i uunaiga a le Agaga ina ia asia le aiga o Gumabay. O lenei aafiaga, na ou malamalama ai i le uiga o le fetalaiga a le Alii ina ua ia fetalai mai, “E le aoga le fomai i e malolo, na o e mama’i” (Mataio 9:12).