O Le Polika Iaga e Aupito Sili
“O Polika Iaga [sa] tuu e sau i le atoaga o taimi e galulue i le faataatiaina o faavae o le galuega tele i aso e gata ai” (MFF 138:53).
Sa faalogologo Kathy a o faamatalaina e le alii o Sotipela le malaga atu o tagata i le Iunaite Setete. Sa fiafia o ia i lana vasega fou o le talafaasolopito. O le suesueina o itulau o lana tusi fou o talafaasolopito, sa tau ai Kathy i se ata o Polika Iaga. Na te lei iloaina muamua le taua o Polika Iaga i le talafaasolopito o le Iunaite Setete.
Sa faauma e le alii o Sotipela lana lesona. “O le a i ai ni meaaoga e fai i le fale i aso uma lava,” o lana tala lea. “O lau meaaoga muamua e tatau ona aumai taeao.”
I le fale, sa mapuea ai Kathy a o vaavaai atu i fesili uma sa tuu mai e le alii o Sotipela.
“Sa faigata lenei aso i le aoga?” o le fesili lea a tina.
“E fai meaaoga i aso uma,” o le tala lea a Kathy. Sa ia manatua le ata o loo i lana tusi o talafaasolopito. “Tina, o loo i ai le ata o Polika Iaga i la’u tusi aoga. Aisea ua taua ai o ia i le talafaasolopito o le I.S?”
“Sa ia taitaia le malaga a le faitau afe o le Au Paia o Aso e Gata Ai i le Vanu o Sate Leki. Ona ia faatulagaina lea o i latou i nuu,” o le tala lea a Tina. “Sa tele se fuafuaga sa faia ai. O se vaega taua o le malaga a le atunuu i sisifo.”
O le aso na sosoo ai sa faasilasila mai ai e le alii o Sotipela, “O le vaiaso a sau o le a tatou faatinoina ai se faaaliga a le au faitau. O le a tofu outou ma se tagata o le malaga i sisifo e faatino. O le a valaaulia ai o outou matua ma isi tamaiti aoga e auai i le faaaliga.”
Sa amata ona tofi mai e le alii o Sotipela ia tagata e faatinoina ma tufa mai pepa o tala. Ina ua fesili mai po o ai e manao i le vaega a Polika Iaga, sa vave le sii i luga o le lima o Kathy.
“O lau galuega e fai nanei o le amata lea ona tauloto o lau vaega,” na fai mai ai Sotipela. “E tatau ona sa’o atoatoa lou taulotoina. E faalagolago i ai ou togi.”
Sa faitau e Kathy lana vaega a o la tuua ma lana uo o Lora le vasega. Sa oo atu se lagona le lelei ia te ia. “Ua matuai sese tele lenei mea,” sa ia fai atu ai ia Lora. “Ua pei ai e le faamaoni ia Polika Iaga.”
“E ese lau vaai i na mea ona o lau lotu,” o le tala lea a Lora.
“E le mafai ona ou tautala i nei mea,” o le tala lea a Kathy.
“E tatau ona e taulotoina ia sa’o atoatoa,” o le faamanatu atu lea a Lora.
Sa tafe ifo loimata o Kathy i ona alafau a o tamoe ma oso atu i le faitotoa i luma.
“O nisi foi meaaoga?” o le fesili lea a tina.
“E sili atu le leaga,” o le tala lea a Kathy, ma tuu atu i ai le pepa o le tala. “Faitau i ai.”
Sa faitau e Tina le faamatalaga ma lulu lona ulu. “Sa le tele se mea na iloa e lenei tusitala e uiga ia Polika Iaga.”
“O le a se mea e tatau ona ou faia?” o le tala lea a Kathy.
“Ta o muamua e sue sou ofu faa-Polika Iaga,” o le tala lea a Tina.
Sa faataitai e Kathy le ofutele uliuli umi o Tamamatua ma afe i luga lima o le ofutino paepae o lona tuagane. Sa faataitai e lo latou tuaoi o Kalani ia Kathy le savali i le isi ona tootoo laau.
Sa maua e Tina se pulou umi lanuuliuli i se kapoti ma tuu i le ulu o Kathy. “O le a mitamita Polika Iaga ia te oe,” o le tala lea a Tina. “E te manaomia se pepa fou o le tala.”
Sa sue e Kathy faamatalaga e uiga ia Polika Iaga i tusi o talafaasolopito o le Ekalesia ma luga o le Uepi saite a le Ekalesia. E lei umi ae toe tusia uma loa le faamatalaga.
“O le tala moni ia Polika Iaga,” na fai mai ai Kathy.
I le aso o le faaaliga, sa faapotopoto ai le vasega a Kathy i le fale tele o le aoga. Sa faatalitali matua ma isi tamaiti aoga i o latou nofoa. Sa faalauiloa mai e le alii o Sotipela le polokalama; ona aluese mai lea mai le tulaga a o tauloto e tamaiti a latou vaega.
Sa lelei atoatoa le taulotoina o faamatalaga a Aleki, ae o Randall sa fesasisasia’i ana upu. Sa toe faatonuina o ia e le alii o Sotipela e toe amata. Sa oomi e Kathy lona tootoo. Ina ua oo i lona taimi, sa tauloto e Kathy le tala moni e uiga ia Polika Iaga.
“Na e toe suia lau pepa?” o le fesili lea a Lora ina ua uma le faaaliga.
“Ioe. Sa ou faamatalaina le mea moni,” o le tala lea a Kathy.
“Lele ua sau Sotipela,” o le tala lea a Lora.
“Malo lava tamaitai,” sa fai mai ai le alii o Sotipela. “Kathy, sa ia faaauau ai, “o oe lava le Polika Iaga e aupito sili ua ou vaai i ai.”
Ata na tusia e Julie F. Young