O Le Vaaiga i Tua Atu o Talafaasolopito o leFeagaiga Tuai
O le malamalama i faapogai o lenei tusi ofoofogia o tusitusiga paia e mafai ona musuia ai a tatou suesuega.
O voluma taitasi o tusitusiga paia e i ai lona lava talaaga uiga ese ma e molimau i le talalelei o le faaolataga i lana lava auala faapitoa. O le Feagaiga Fou e i ai lona tulaga faapitoa o le avea ma voluma o tusitusiga paia lea e teuina ai upu a tagata taitasi o e na iloaina patino Iesu po o e na mulimuli ia te Ia i se taimi a’o le’i leva ona mavae atu Lona Toetu—ma avea ai le Feagaiga Fou ma se punaoa taua e fesoasoani tatou te latalata atili atu ai i le Faaola ma maua ai se vaaiga o Lana galuega i le olaga nei. O se malamalamaaga i le talafaasolopito o le Feagaiga Fou, pe na faapefea ona tuufaasolo mai ia i tatou, ma po o ai na tusia o le a mafai ai ona faateleina lo tatou fiafia i lenei tusi ofoofogia o tusitusiga paia ma tatou maua ai se malosiaga sili faaleagaga a o tatou feagai ai ma o tatou lava luitau, e pei o e na mulimuli anamua ia Iesu Keriso.
O Le A le Feagaiga Fou?
I tausaga e le’i leva atu talu le maliu o Iesu, na le mafai ai ona faatatau ia upu “Feagaiga Fou” i se faaputuga o tusi e uiga i le soifuaga ma le maliu o le Alii ae na faatatau tonu lava i se mea na Ia fetalai atu ai i Ona soo i le po o le Talisuaga Mulimuli: “O lo’u toto lenei, o le toto o le feagaiga fou, ua faamaligiina mo tagata e toatele e faamagalo a’i agasala” (Mataio 26:28; faaopoopo le faamamafa). O upu Eleni ua faaliliuina i le “feagaiga fou” e faatatau tonu lava i se feagaiga, o le feagaiga fou na tuuina mai e le Faaola ia i tatou e ala i le Togiola. O tusitusiga ia na faamaumauina i le Tusi Paia ma ua faatatauina lea i le Feagaiga Fou e faamatala ai, faamaumau, ma aoao ai e uiga i le feagaiga fou i le va o le Alii ma Lona nuu.
O faamaumauga na teuina i le Feagaiga Fou e taulai atu i vaaiga eseese o le galuega a le Faaola. E amata le Feagaiga Fou i Talalelei, o se faaupuga e uiga i “tala e lelei,” e faasino i le soifuaga, galuega tala’i, ma le matafaioi paia a Iesu Keriso. O loo aofia foi i le Feagaiga Fou se talafaasolopito o taumafaiga a uluai faifeautalai a le Ekalesia (o le tusi a Galuega); o tusi mai taitai anamua, e pei o Peteru ma Paulo, lea na apoapoa’ia ai tagata Kerisiano anamua (lea na faaigoaina foi o ni Au Paia) ina ia tumau faamaoni i le faatuatua; o se molimau (Eperu); ma se apokalifa (Faaaliga) lea e folafola mai ai le toe afio mai o le Alii i aso e gata ai. E tofu lava tusitala ma se vaaiga eseese e tuuina mai, ma e na taitasi ma tusia mo se aufaitau o loo mafaufauina nai lo le taumafai e faatumu ni avanoa e le’o mautinoa i le faamaumauga o tala anamua. I le ogatotonu o le seneturi lona fa t.a., na tuufaatasia ai ia tusi e 27 lea na faamaumauina ai ia feagaiga fou a le Alii ma faatulagaina e pei ona i ai i le taimi nei.
Pe Na Faapefea ona Tuufaasolo Mai Ia I Tatou le Feagaiga Fou?
Mai se vaega toatele o le au soo, na valaauina mai ai e Iesu ni tamalii se toa 12 e avea ma Aposetolo. Na mulimuli na tamalii ia te Ia i le taimi atoa o Lana galuega talai, puapuagatia faatasi ma Ia, ma na fiafia foi i aafiaga faamanuiaina ma le tumu i le Agaga. Ina ua mavae le maliu o Iesu, na amata faamaumauina e Aposetolo o latou aafiaga, faatasi ai ma isi o e na mulimuli faamaoni [ia te Ia]. E lua ni mea na tutupu atonu na faaosofia ai lo latou naunau e teuina a latou faamaumauga e uiga i le soifuaga o Iesu: muamua, o le faoa o Ierusalema ma le malumalu e le vaegaau a Roma i le t.a. 70. Lona lua, ua leva ona amata ia ‘au o le liliuese (tagai Galuega 20:29–30). O lea la, o le tele o tusitusiga i le Feagaiga Fou na faamaumauina ina ia fesoasoani i le tagata faamaoni ina ia iloa lo latou ala i mala ma fesouaiga o o latou aso.
I le toe tepa i tua i o latou aafiaga, ua mafai ai ona tatou iloa le ala na latou feagai ai ma taimi faigata ma pe na faapefea ona avea ia tala lelei o le talalelei ma se mana lē maluelue i le tauiviga e tetee atu ai i ‘au o le liliuese.
I le agai atu i le faaiuga o le seneturi muamua, o tusitusiga uma ua teumaluina nei i le Feagaiga Fou sa faamae’a ma tufatufaina faalauaitele i paranesi o le Ekalesia. Na faia e le au Tusiupu ni kopi o anotusi i pepa na gaosia mai pa’ulaau ma mulimuli ane i pepa na gaosia mai pa’umanu, ae sa na o ni nai kopi na maua. Na faaputuputu e tagata o le Ekalesia ni tusi na latou maua ma faitau ai ma suesue i afioga a le Alii ma Aposetolo. O se tasi o tulaga mataina na taofia ai le tufatufaina o tusitusiga paia, o le sauaina lea o tagata Kerisiano e le taitai Roma o Diocletian i le t.a. 303. Na ia faatonuina le susunuina o tusitusiga paia faaKerisiano ma faamalosia tagata Kerisiano e osia taulaga i atua faapaupau. O le toatele o tagata faatuatua taitoatasi na nanaina ia tusi paia i lena vaitaimi o sauaga. Mulimuli ane, ina ua faatonuina e le uluai taitai [Roma] Kerisiano o Kosetatino ni kopi fou o tusitusiga paia ina ia faia, na mafai ai ona toe maua e ona tagata atamamai ni tusi ia na faaaogaina e paranesi a o le’i faia le tulafono a Diocletian. Ua mafai e la tatou lomiga faaona po nei o le Feagaiga Fou ona su’e o latou tuaa i kopi o le Tusi Paia lea na faia i le vaitaimi o Kosetatino ma toe tepa ai i tua ia i latou ia na ositaulagaina lo latou saogalemu ina ia faasaoina le feagaiga fou a le Alii.
E le’i leva lava ona faatonuina e Kosetatino le kopiina ma le toe tufatufaina atu o kopi o le Feagaiga Fou, ae faatulagaina loa i lo latou faagasologa o i ai nei ia tusi ia na tuufaatasia ai la tatou Tusi Paia o loo i ai nei. O loo mulimuli lenei faagasologa i se mamanu na setiina e le Feagaiga Fou. O le Feagaiga Fou o loo aofia ai le Tulafono (o Talalelei), o le talafaasolopito o le au Kerisiano (Galuega), ma Perofeta (Roma e oo i le Faaaliga). E faaiu uma le Feagaiga Tuai ma le Feagaiga Fou i se folafolaga o le toe afio mai o le Alii (Malaki ma Faaaliga). O le tulaga o nei galuega faaperofeta o loo faamamafaina ai foi i le tepa taulai atu i se faamoemoega o le faaolataga ma le faaaliga o le lumanai.
O Ai na Tusia le Feagaiga Fou?
O tusitala taitasi o le Feagaiga Fou na tusia ma se vaaiga ese i le misiona faaola a Iesu Keriso. E Lua Talalelei na tusia e Aposetolo o: Mataio ma Ioane. Ua tuuina mai e nei molimau faaaposetolo se molimau vaaitino i le soifuaga o Iesu. Na tusia foi mulimuli ane e e na mulimuli i le Alii e toalua ni Talalelei: o Mareko ma Luka, lea na molimau i mea na la lagonaina ma faalogoina. O nei alii uma e toalua sa avea ma soa a Paulo i se tasi o taimi (tagai Galuega 12:25; 2 Timoteo 4:11) ma atagia mai ai i se vaega le naunau o le fuainumera tuputupu ae o le Au Paia na nonofo i fafo atu o Iutaia ma o ē latou te lei iloaina lava le Alii i Lona soifuaga atoa. Nai lo lena, o a latou tala na tuuina mai ai se molimau manino e uiga ia te Ia lea sa latou talitonu i ai.
E foliga mai o tusi a Paulo o muai tusitusiga ia o le Feagaiga Fou, e ui e le’i tusia uma i le taimi e tasi. O lana molimau na maua mai i se aafiaga a’o avea o se faifeautalai, mai le tele o faaaliga mamana (tagai Galuega 9:1–6; 2 Korinito 12:1–7), ma e ala mai i fesootaiga patino ma Peteru ma isi (tagai Kalatia 1:18–19). Na tele ana tusitusiga i le foiaina o feeseeseaiga i totonu o paranesi, ae o isi o taimi na ia tusi atu ai i ana uo mamae (Timoteo ma Tito). I se tasi o ana tusi na ia aioi atu ai i se taitai o se pologa e na te taliaina le toe fo’i atu o se pologa na sola ese lea na feiloa’i i ai Paulo a o la i totonu o le falepuipui (Filemoni). O le tulaga masani lava, o le tusi a Eperu ua i ai le talitonuga na tusia e Paulo, e ui e le o i ai i le folasaga masani lona faailoaina mai o ia o le tusitala. Ae ui i lea, o loo molimau mai le tusi i le auala tatou te o atu ai ma le lototele i le Alii e ala i le faatuatua. E aofia ai i le Feagaiga Fou e sosoo ma tusi a Paulo, o le Eperu o se talanoaga aloaia o le i ai o le faatuatua e feagai ai ma faigata.
O Tusi pupuu a Iakopo na vave foi ona tusia ma o loo i ai ni mau faasino i aoaoga a Iesu mai le Lauga i luga o le Mauga lea na tuufofoga mai ma e ese mai ai ma le Talalelei na tusia a Mataio (tagai Iakopo 1:13; 4:12; 5:12). O Iakopo, o le uso laitiiti o le Alii, atonu lava o le tusitala lea o lenei tusi. Na faamanuiaina o ia i le iloaina ma vaai i le Faaola na toetu (tagai 1 Korinito 15:7) ma na ia te ia se matafaioi taua i le tele o mea na tutupu i le talafaasolopito o le Ekalesia (tagai Galuega 15:13–29).
E aofia foi i le Feagaiga Fou ni tusi se lua a le Aposetolo o Peteru ma le tolu a le Aposetolo o Ioane. Na la uunaia tagata Kerisiano ina ia faamaoni; o Peteru lea na faapitoa lava lona popole e uiga i le faamaoni i taimi o tofotofoga.
O Iuta o se tasi lea o tusi pito fou na tusia i le Feagaiga Fou. E pei o Iakopo, o lenei tusi masalo na tusia foi e se tasi o uso o le Alii (“Iuta” i le Mareko 6:3). Na tusi Iuta i se taumafaiga e taofia le faatupulaia o le liliuese.
Ma le mea mulimuli, e faaiu le Feagaiga Fou i se faaaliga i le Aposetolo o Ioane, lea na tusi faamaumauina se faaaliga i le toe afio mai o le Alii e amatalia Lona nofotupu i le meleniuma. O loo faamatala auiliili manino ai i lena faaaliga le tauiviga i le va o le lelei ma le leaga. O le tele o mataupu o loo ta’ua ai mea na tutupu i le lumanai mo Ioane, e aofia ai mea na tutupu i aso e gata ai—o o tatou aso ia.
Mo Ai Na Tusia Ai le Feagaiga Fou?
Ona o le Feagaiga Fou ua talafeagai lava e avea o se feagaiga fou i le va o le Alii ma i latou o e faatuatua ia te Ia, ua faamoemoe ai nei tusi mo i latou uma o e saili ia iloa o Ia, pe o lenei tisipenisione po o le tisipenisione ua mavae atu. O le amataga lava, na tusia e tusitala o le Feagaiga Fou ia anotusi sa mafai ona faaaogaina loa lava i paranesi o le Ekalesia i o latou aso, ma se malamalamaaga na latou tusi faamaumauina ia mea aupito taua na tutupu i le talafaasolopito o tagata. Mo se faataitaiga, o Ioane, na vaai i ana tusitusiga o se molimau: “Aua ua tusia ia mea, ina ia talitonu ai outou, o Iesu o le Keriso lava Ia, o le Alo o le Atua; ina ia maua ai foi le ola i lona suafa e outou o e talitonu” (Ioane 20:31). O isi, e pei o Luka, na tusia ma le faamoemoega ina ia tusia se faamatalaga o le talafaasolopito:
“E toatele ua taumafai ona tusi faasolo le tala i mea ua mautinoa e i tatou,
“E faapei ona tuuina mai ia te i tatou e i latou na matamata ai, ma auauna ai i le upu talu le amataga;
“O le mea lea ua ou manatu ai, ona ua ou matua sue i mea uma lava talu le amataga, ou te tusi faasolo atu ia te oe” (Luka 1:1–3).
E eseese Kerisiano anamua, o nisi na o mai mai aiga sa Iuta, a o isi na tausia i ni aiga o Nuuese, a o isi foi e laitiiti lava se tulaga faalelotu na latou mauaina a o le’i papatisoina. Sa avea i latou, ma se mafuaaga, o se faata o vaega eseese o le Au Paia i lenei vaitaimi. O lea la, o a latou tauiviga ua faaalia mai ai ia i tatou ni lesona malolosi i le auala e manumalo ai i le amioleaga ma tumau ai i le faatuatua e ui i tofotofoga ma faaosoosoga. Na latou faaalia mai foi ia i tatou le auala na tauivi ai paranesi a o toalaiti lava ma le auala na i ai le saogalemu i upu a aposetolo ma perofeta.
O Se Molimau mo le Asō
Na faaalia mai e le Feagaiga Fou, i le vaitaimi o le le mautonu, ina ua le faalogo ma usitai nisi i le valaau a le talalelei, e i ai le saogalemu mo i latou o e “tumau pea i le mataupu a le au aposetolo, ma le mafuta faatasi, ma le tofitofiga o le areto, ma talotaloga” (Galuega 2:42). O nisi faataitaiga o loo aoao mai ai i tatou i le auala na tofotofo ai e na amiotonu (tagai 1 Korinito 10:13) ma le faigofie i lenei vaitaimi o le savali o le fatu o le talalelei e pei ona i ai i le 2,000 tausaga ua mavae atu: “O lenei lava le amio Atua e lelei ma le faamaoni i luma o le Atua o le Tama lea, Ina ia tauasiasi atu i ē matua oti ma fafine ua oti a latou tane i o latou tiga, ia leoleo foi o ia ia te ia, ina nei pisia mai o ia i le lalolagi” (Iakopo 1:27). E pei o le Mataupu Faavae ma Feagaiga, lea na molimau mai ai le Perofeta o Iosefa Samita “o loo soifua o ia!” (MFF 76:22), o loo tuuina mai e le Feagaiga Fou se molimau talitutusa na avanoa le tuugamau i le taeao o le Eseta: “E le o iinei o ia; aua ua toe tu mai o ia” (Mataio 28:6).
O Iesu Keriso ma Ana Aposetolo i le Talisuaga Mulimuli.
O le Au Paia anamua o loo faalogo i se tasi o tusi a Paulo.
Na tusia e Paulo se tusi mai le falepuipui.
O Peteru o loo tala’i atu ia Konelio ma lona auaiga.
O Peteru ma Ioane loo tala’i atu ma faamalolo i ma’i.
Ata tusia © Dover Publications
Taumatau: ata na saunia e Adam Koford