O o Tatou Aiga, O o Tatou Auaiga
O Le Mana Toefuatai o le Tatalo
Ou te manatua pea o’u lagona i le taimi na ou vaai ai i loimata o le salamo o loo tafe mai lalo o mata o lo’u atalii e 10 tausaga le matua o, Arián.
Sa la taaalo ma lona uso matua o, Ioelu, e 12 tausaga, i le potumoe, ae faafuasei loa ona la feupua’i, ma na ou oso atu ma toe faatulagaina le filemu. Masalo ona o o la tausaga, ua avea ai le femisaa’i ma se mea masani i le va o le au alii.
E le’i tali lelei mai ia te a’u ia Arián, o lē na matua iloa lelei le tetete ma le tagi ina ua uma le la misa ma lona uso. Sa ou faasa’oina faalua o ia (ma o lea na faasaga mai ai ia te a’u lona le fiafia), ma na matua atili ai ona le lelei. Sa le mafai ona taofiofia o ia, na mumu ona foliga, ma na tetete. Na amata ona sau lo’u ita, ae na ou iloa e tatau lava ona i ai se vaifofo e aunoa ma lo’u ‘e‘ē.
Na vave lava ona oo mai i lo’u mafaufau le mataupu faavae o le tatalo. Ioe, o le tali lena, ma na ou aveina o ia i totonu o lo’u potu, tapuni le faitotoa ma fai atu i ai, “Arián, sau ta tootutuli, ma o le a ou faia se tatalo i le Tama Faalelagi.”
Na ma tootutuli i lalo a o faaauau pea ona tagi o ia i le faalii. Sa ou tatalo ma le faamoemoe ina ia taumafai e fesoasoani i si o’u atalii. I le ogatotonu o le tatalo na ou iloa ai ua fai ifo lona masūsū. O loimata ia ua tafe mai i lalo o ona alafau o loimata o le salamo.
A o faaiu le ma tatalo, na ea a’e i luga mata o Arián ma fesili mai, “Tama, e mafai ona e faamagaloina au?” Sa ma feopoai, ma na le mafai foi ona taofiofi o’u loimata. Na faatumulia lo’u agaga i le lagona o le filemu ma le alofa. E le’i toe fai maia se upu a Arián, ae na ou iloa ua ia maua le mana toefuatai o le tatalo ma na tuia lona loto e le Agaga Paia.
E le na o le mana o le tatalo lea na ia iloaina, ae na ia maua foi se molimau i lea mana.
Ata na saunia e David Stoker