E matamata lo matou aiga i ata tifaga e fautuaina mo tagata ua lava le matutua. E taua le faaaluina faatasi o le taimi ma i latou, e faapefea la ona ou faamalamalama atu i ai le mafuaaga ou te le matamata ai i na ata tifaga?

O le filifili o le mea sao ma lou aiga e talitutusa lava le faigata ma au uo—o nisi taimi foi e faigata atu ai. O le mea e lelei ai e te le o manao e fetuunai ou tulaga faatonuina. E ui lava atonu e le i oo i ai i le taimi nei, ae o le faamuamua o le Atua i lou olaga o le a faamanuiaina ai lou aiga ma mafai ai ona fai oe ma faataitaiga ia i latou. Ae o loo avea lava i latou ma ou aiga, ma e taua foi le faaalu faatasi o le taimi ma i latou. E mafai ona e fautuaina atu isi ata tifaga e te iloa e faagaeetia loto po o isi gaoioiga e pei o ni taaloga po o ni savaliga sopo.

E taua le faailoa atu i lou aiga o ou tulaga faatonuina i se auala faamaoni ma le lotomaulalo. Ia talanoa sao ma i latou i le pogai ua e filifili ai e te le matamata i nisi ituaiga ata tifaga. Tatalo ina ia e maua le malosi e talanoa atu ai ia i latou e uiga i lenei mea, ma ia i ai se agaga o le loto malamalama. E faamoemoe lava, o le a faaaloalo lou aiga ia te oe i lenei mea, ma o le a e fesoasoani e faatumauina le Agaga i lou loto a’o e taumamao mai ata ma faasalalauga leaga.