Ua Faamanatu e le Seminare o le Vaveao Le 60 Tausaga

O seminare i le vaveao, e mafai ona faigata, ae i le silia ma le 60 tausaga ua mavae, ua silia ma le miliona tupulaga o le Ekalesia ua iloa, o le alafa’i mai a o le’i oso le la ma taumafai e tulimatai atu e le gata i o latou mata a o o latou mafaufau i tusitusiga paia, o se taumafaiga aoga tele.

“O le faaaluina o ni nai minute i tusitusiga paia i aso taitasi, tuuina atu molimau, ma lagonaina le Agaga ua le gata ina i ai se aafiaga faamalosiau mo tamaiti aoga e o i le a’oga, ae e i ai foi sona aafiaga faamalolo pe a galue le Togiola a Iesu Keriso i o latou olaga,” o le tala lea a Kelly Haws, o le taitai fesoasoani mo seminare ma inisitituti o aoaoga faalelotu. “O se avanoa sili mo tupulaga talavou.”

O Le Fotuai mai o le Seminare o le Vaveao

O uluai vasega o le seminare na faia i le taimi masani o a’oga i le 1912 i se seminare e sosoo ma le Aoga Maualuga a Granite i le Aai o Sate Leki, Iuta, ISA. Peitai, a o gasolo tausaga, sa faateleina tupulaga talavou a le Ekalesia na lesitala i aoga ua faatupulaia a le malo, ae sa le mafai ona maua vasega seminare e pei o tamaiti a’oga i le Aoga Maualuga a le Granite.

Ina ua televave le faatupulaia o le faitau aofai o le Ekalesia i Kalefonia i Saute i le taufaaiuiuga o le 1940, o le tulaga manaomia e aotauina ia tupulaga talavou i le talalelei, na musuia ai se vaega o peresitene o siteki ina ia talosagaina le faavaeina o le polokalama o le seminare i le itulagi o Kalefonia i Saute.

I le tausaga faaleaoaoga e 1948–49, na faamanuiaina Marion D. Hanks, l lē na avea mulimuli ane ma se tasi o le Au Peresitene o Fitugafulu, o se faiaoga i le vasega seminare o le vaveao i le Aoga Maualuga a West i le Aai o Sate Leki. O le faia o vasega faapea, sa foliga mai o se tali talafeagai lelei lea mo le Au Paia i Kalefonia, ma sa faamaonia ia siteki e 11 e fai ni vasega se 13 i le vaveao.

Faafetaia’ia o Manaoga Eseese

Mai le amataga aloaia o le polokalama i le 1950–51, ua salalau atu i le Iunaite Setete ma le lalolagi atoa, e fesoasoani ai i le autalavou i soo se tulimanu, e aoao ai tusitusiga paia ma faaaoga ia mataupu faavae o le talalelei. O lona igoa aloaia sa suia talu ai nei i le “seminare i aso taitasi,” aua e lē o vasega uma e fai i le vaveao.

O se itu ua matua faamanuiaina ai le seminare i aso taitasi, o lona maufetuuna’ia. Ua faatulagaina polokalama i le tulaga faalesiteki ma itu, e mafai foi ona faatulaga i se uarota po o se paranesi e tasi, pe tuufaatasi foi ni uarota po o paranesi e tusa ai ma tulaga manaomia ma tulaga o le autalavou, matua, ma taitai perisitua.

E ui toeitiiti atoa le 115,000 tamaiti a’oga o loo faamanuiaina pea i tausaga taitasi mai seminare e faia i le taimi o a’oga i eria e toatele ai le faitau aofai o tagata o le Ekalesia, pe tusa ma le 217,000 tamaiti aoga seminare i le lalolagi atoa e auai i le seminare i aso taitasi.

Talu ai o nisi talavou o le Ekalesia e mamao le mea e nonofo ai mai isi tagata o le Ekalesia ina ia alu ai i le vasega seminare e faia i le taimi o a’oga po o aso taitasi, o lea na faavaeina ai le polokalama e suesue ai le seminare i le aiga. O tamaiti e suesue i le fale, latou te faaaluina aso e fa i vaiaso taitasi e suesue ai e i latou lava ia lesona e atofa atu i ai, ona faapotopoto lea ma isi tamaiti o loo suesue i aiga ia taitasi i le vaiaso, e talanoaina ai mea sa latou aoaoina.

O Se Maa e lei Tofiaina i ni Lima

O le aso, o loo faia ai vasega seminare i setete uma i le Iunaite Setete ma faapea i atunuu e 140 i le lalolagi. I le 1948 na avea ai Kanata ma atunuu muamua lava i fafo atu o le Iunaite Setete e faia le seminare. Faatasi ai ma le salalau atu o le seminare i vaveao, na sosoo ai ma Mekisiko i le 1958, o Finelani ma Siamani i le 1962, o Iapani i le 1963, Panama i le 1964, ma faapea ma isi atunuu i le gasologa o tausaga. Talu ai nei lava, na faavaeina ai vasega seminare i le 2008 i le atunuu o Benin, Georgia, ma Moroko.

A o salalau atu le seminare i le lalolagi, ua atiina ae ai foi ma se faalapotopotoga o tamaiti o le seminare i le lalolagi atoa. E le afaina po o fea lava o nonofo ai tamaiti seminare, latou te taulotoina ia mautauloto lava e tasi, suesueina ia itulau lava e tasi o tusitusiga paia, lagonaina le Agaga lava e tasi a o faapena ona tuputupu ae a latou molimau, ma galulue e fausia le malo lava e tasi.

Faamanuiaga mai le Ositaulaga

O tamaiti o le seminare, pe latou te auai i vasega e faia i le taimi o a’oga, seminare i aso taitasi, po o seminare e suesue i le fale, latou te faia lava ni osigataulaga e aumai ai i latou e latalata i le Tama Faalelagi.

“Pe a filifili se tamaitiiti e 15 tausaga, ‘O le a ou ala i luga i le 5:00 i le vaveao mo le seminare,’ e le gata o se taulaga lena mea, ae o le faaaogaina foi o le filifiliga saoloto o se faamatalaga lea i le Tama Faalelagi lea e toe foi mai ma se faamanuiaga,” na saunoa ai Uso Haws.

O na faamanuiaga e tusa lava le moni i le aso e pei ona sa i ai i le 60 tausaga talu ai, ma o le seminare i soo sona faatulagaga lava e faaauau pea ona faamanuiaina ai olaga o le autalavou o le salafa o le lalolagi.

E silia ma le miliona talavou o le Au Paia o Aso e Gata Ai ua faamanuiaina mai seminare i vaveao talu mai lona amataga i le 60 tausaga talu ai.