E Taua i lo Tatou Faatuatuaga
Ua tatou iloa i le avea ai ma ni Au Paia o Aso e Gata Ai e le malamalama tele i latou e le auai i lo tatou faatuatuaga ia tatou aoaoga faavae ma tulaga faatauaina. Na faaalia lenei tulaga i se suesuega faavaomalo a Gary C. Lawrence na lomia i sana tusi lata mai nei, How Americans View Mormonism. [O Se Vaaiga a Tagata Amerika i Tulaga FaaMamona] O le tolu-vaefa o i latou na suesueina na faatusaina la tatou Ekalesia i tulaga faatonuina lelei maualuluga, ae pe a ma le afa na manatu o o tatou “talitonuga e le ni tulaga masani ai” ma e tatou te fai mea faalilolilo.”1 Ina ua fesiligia e filifili ni faaupuga latou te manatu e faamatalaina ai le Au Paia o Aso e Gata Ai faalauaitele, o le 87 pasene na makaina le “malolosi tulaga faatauaina faaleaiga,” 78 pasene na makaina le “faamaoni”, ma le 45 pasene na makaina le “o ē mulimuli tauaso.”2
I le avea ai ma se Aposetolo ua valaauina a’u e avea o se molimau i aoaoga faavae, galuega, ma le sui o Keriso i le lalolagi atoa. I lena tofiga ou te molimau atu ai i le moni o nei faavae o lo tatou faatuatuaga.
Ina ua fesiligia Lawrence e e na faatalanoaina, “I le mea e gata ai lou malamalama, o le a se mau autu faaMamona?” e na o le 14 pasene na mafai ona faamatalaina soo se mea e lata i le manatu o le toefuataiga po o le toe faatulagaina o le faatuatuaga Kerisiano muamua. E faapena foi, ina ua fesiligia e le isi suesuega faavaomalo le au fai tali po o le a se upu e tasi e sili ona faamatalaina ai o latou lagona e uiga i le lotu Mamona, e leai lava se tasi na fautuaina mai ni upu po o ni manatu o le faapogai po o le toefuataiga faaKerisiano.3
O lo’u le fiafia i nei tulaga na tuuitiitia i isi mea na maua e Lawrence i le mataupu o mea tau lotu, faapea o tagata Amerika e “matua lolotu lava” ae “matua tele lava le le malamalama.” Mo se faataitaiga, o le 68 pasene na fai mai e le itiiti ifo ma le faafitu i le vaiaso latou te tatalo ai, ma le 44 pasene na fai mai e toeitiiti lava o vaiaso uma latou te auai atu ai i sauniga lotu. I le taimi lava e tasi, e na o le afa na mafai ona ta’u mai se igoa e tasi o Ekalesia e fa, e toatele e le’i mafai ona ta’u mai le igoa o le tusi muamua o le Tusi Paia, ma le 10 pasene na manatu o Joan of Arc o le faletua lea a Noa.4
E tele vaega e saofaga ai i le le manatu mamafa i le mataupu faalelotu, ae o se tasi o na mea o le tetee masani o aoaoga maualuluga po o le le fiafia i tulaga faalelotu. E ese mai ai i ni nai tuusaunoaga, a ua avea kolisi ma iunivesite ma nofoaga ua leai ai ni tulaga faatauaina ma ua sili ai le vaivai o uiga e faatatau i tulaga faalelotu. O tamaiti aoga ma isi tagata lolotu o e talitonu i le tulaga soifua moni o le Atua ma le tulafono moni o le ola mama ua lē faatauaina ma lē uuna’ia.
Ua foliga mai ua le mafai ona faamoemoe atu i aoaoga maualuga i se tulaga atoatoa ina ia toe amata ai se matafaioi autu i le aoaoina o tulaga faatauaina lelei. O le a tumau lena tulaga i totonu o aiga, ekalesia, ma kolisi ma iunivesite e faasino i le ekalesia. E tatau ona faamoemoe uma mo le manuia i lenei galuega taua. E mafai ona faafoliga ia aoga i le tulaga le mautonu i fesili e uiga i le sa’o ma le sese, ae e le mafai ona ola ai le lalolagi i sea tulaga o le le mautonu.
Ua ou filifilia ni vaega se tolu o upumoni e tuuina atu o ni mataupu faavae o le faatuatuaga o le Au Paia o Aso e Gata Ai:
-
O le natura o le Atua, e aofia ai le matafaioi a sui e toatolu o le Aiga Atua ma le mea moni e faatatau i ai, e i ai le tulaga e matua atoatoa a’ia’i.
-
O le faamoemoega o le olaga.
-
O punavai tafatolu o le upumoni e uiga i le tagata ma le atulaulau: saienisi, o tusitusiga paia, ma faaaliga faifai pea—ma pe faapefea ona tatou iloaina.
1. O Le Natura o le Atua
O lo’u manatu autu muamua lava i lo tatou faatuatuaga o le, e moni le Atua ma e faapena foi ia upumoni e faavavau ma tulaga faatauaina ia e le’i mafai ona faamaonia e metotia faasaienisi o i ai nei. O nei manatu e mautinoa lava le fesootai. Faapei o isi tagata talitonu, tatou te folafola atu le i ai o le fai tulafono sili, le Atua lo tatou Tama Faavavau, ma le i ai o le tulaga o le matuai atoatoa a’ia’i. Tatou te teena le manatu faapea o le amio mama e faalagolago i le talitonuga o tagata ma tulaga o i ai, lea ua avea ma talitonuga faavae lē aloaia o le tele o aganuu faaona po nei.
Mo i tatou, o le mea moni e uiga i le natura o le Atua ma la tatou faiā ma Ia o le ki lea i isi mea uma lava. O le tulaga taua lava, o lo tatou talitonuga i le natura o le Atua o le mea lea e ese ai i tatou mai le tele o talitonuga faavae aloaia o le tele o isi Kerisiano. E faapea le amataga o la tatou Mataupu Faavae o le Faatuatua: Matou te talitonu i le Atua, le Tama Faavavau, ma Lona Alo o Iesu Keriso, ma le Agaga Paia” (fuaiupu 1).
E i ai lo tatou talitonuga i le Aiga Atua e tutusa ai ma isi Kerisiano, ae e ese lona uiga ia i tatou nai lo le toatele. Tatou te tausisi o nei sui e toatolu o le Aiga Atua o ni tamalii ma’oti ma eseese e toatolu ma o le Atua le Tama e le o se agaga ae o se Tamalii faamamaluina e i ai se tino moni, e faapena foi Lona Alo toetu o, Iesu Keriso. E ui ina eseese faasinomaga, ae tasi lo Latou faamoemoega. Tatou te tausisi na faatatau Iesu i lenei faiā ina ua Ia tatalo i Lona Tama ina “ia tasi” Ona soo e pei ona tasi Iesu ma Lona Tama (Ioane 17:11)—e tuufaatasi i le faamoemoega ae le o le tino. O lo tatou talitonuga uiga ese “e i le Tama le tino o aano ma ivi e pei lava o le tagata; e faapea foi le Alo; a’o le Agaga Paia e leai sona tino o aano ma ivi, a’o le peresona o Agaga” (MFF 130:22) e taua lea ia i tatou. Peitai, e pei ona faaalia i le faatalanoaga a Gary Lawrence, e le’i lelei lo tatou faailoaina atu i isi o lenei talitonuga.5
O lo tatou talitonuga i le natura o le Atua e sau lea mai le mea lea ua tatou faaigoaina o le Uluai Faaaliga Vaaia, lea na amata ai le Toefuataiga o le atoaga o le talalelei a Iesu Keriso. O le sailia e Iosefa Samita, o se tamaitiiti e 14 tausaga e le’i lava se a’oga ina ia iloa po o fea o lotu e tatau ona ia auai, lea na tuuina atu i ai se faaaliga ma vaaia ai ni “Tagata se toalua” e le mafaamatalaina le “pupula ma le mamalu”. Na tusi le Tasi o i Laua i le isi ma faapea mai, “O Lo’u Atalii Pele lenei. Faalogo ia te Ia!” (Iosefa Samita—Talafaasolopito 2:17). Na fetalai atu le Atua le Alo i le perofeta talavou ma faapea atu o “mataupu” uma a lotu i na vaitaimi “o ni mea inosia ia i ona luma” (Iosefa Samita—Talafaasolopito 2:19). O lenei folafolaga paia na ta’usalaina ai ia mataupu, ae le o le au sailiili faatuatua o e na talitonu i ai.
Na faaalia i le Uluai Faaaliga Vaaia a Iosefa Samita o le manatu faavae na i ai e uiga i le natura o le Atua ma le Aiga Atua e le sa’o ma e le mafai ona taitaiina atu o latou tagata ua talitonu i le taunuuga na finagalo ai le Atua mo i latou. O le gasolo mai mulimuli ane o tusitusiga paia faaona po nei na faaalia ai le taua o lenei upu moni autu ma aumai ai ia i tatou le Tusi a Mamona. O lenei tusitusiga paia fou o se molimau lona lua lea ia Iesu Keriso. Ua faamautu ai ia valoaga faatusipaia ma aoaoga e uiga i le natura ma le misiona a Keriso. Ua faalautele ai lo tatou malamalamaaga i Lana talalelei ma Ana aoaoga i le taimi o Lana galuega i le lalolagi. Ua tuuina mai ai foi le tele o aoaoga ma faataitaiga o faaaliga lea ua tatou iloa ai le moni o nei mea.
E faamatalaina e nei aoaoga la tatou molimau ia Keriso. E le o faavaeina i tatou i le atamai faalelalolagi po o manatu o tagata—e tusa lava po o a tu ma aga po o lo latou faaaloalogia. O la tatou molimau ia Iesu Keriso e faavae i faaaliga a le Atua i Ana perofeta ma mo i tatou taitoatasi.
O le a se mea e mafua ai ona faamautu la tatou molimau ia Iesu Keriso? Ua na o Iesu Keriso le Alo o le Atua le Tama Faavavau Na Fanaua. O Ia o Le Foafoa. E ala i Lana galuega e le mafaatusalia i le lalolagi nei, o Ia o lo tatou faiaoga. Ona o Lona Toetu, o i latou uma na ola i lenei lalolagi o le a toe faatuina mai le oti. O Ia o le Faaola, o lana taulaga togiola na tatalaina ai le faitotoa mo i tatou ina ia faamagaloina a tatou lava agasala ma faamamaina i tatou ina ia toe foi atu i le afioaga o le Atua lo tatou Tama Faavavau. O le savali autu lenei a perofeta o augatupulaga uma. Na faailoa mai e Iosefa Samita lenei upu moni maoae i la tatou mataupu faavae o le faatuatuaga lona tolu: “Matou te talitonu e faaolaina tagata uma lava, i le togiola a Keriso, pe a tausia poloaiga ma sauniga o le Talalelei.”
I le avea ai ma tagata o Le Ekalesia a Iesu Keriso o le Au Paia o Aso e Gata Ai, tatou te molimau faatasi atu ma le perofeta o le Tusi a Mamona o le Tupu o Peniamina “e leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso, le Alii e Pule Aoao” (Mosaea 3:17).
Aisea ua na o Keriso ai le ala? Pe na faapefea ona Ia tatalaina ia noataga o le oti? Pe na mafai faapefea ona Ia tauaveina i Ona luga agasala a tagata uma? Pe mafai faapefea e ala i Lana Togiola ona faamamaina o tatou tulaga pisipisia ma agasala ma toetutu mai o tatou tino? O tulaga lilo ia ou te le’i malamalama atoatoa i ai. Ia te au lava ia o le vavega o le Togiola a Iesu Keriso e le malamalama ai, ae ua tuuina mai ia te au e le Agaga Paia se molimau i lona moni, ma e ou te fiafia ua mafai ona faaaogaina lo’u ola e folafola atu ai.
2. O Le Faamoemoega o le Olaga Faaletino
O lo’u manatu autu lona lua e faatatau i le faamoemoega o le olaga faitino. E afua mai i lo tatou malamalamaaga i faamoemoega o le Atua le Tama Faavavau ma lo tatou taunuuga i le avea ai ma Ana fanau. E amata la tatou aoaoga faalelotu i le faamautinoaga sa tatou ola o ni agaga ae tatou te le’i o mai i lenei fogaeleele. Ua faamautu ai e i ai se faamoemoega o lenei olaga faitino. Ma ua aoao mai ai o lo tatou faanaunauga aupito sili o le avea lea e faapei o o tatou matua faalelagi, lea o le a tatou maua ai le mana e faaauau ai a tatou sootaga faaleaiga e oo i le faavavau. Na tuuina i tatou i le lalolagi ina ia maua se tino faaletino ma e—ala atu i le Togiola a Iesu Keriso ma le usiusitai i tulafono ma sauniga o Lana talalelei—ina ia agavaa ai mo le tulaga faaselesitila mamalu ma sootaga ua ta’ua o le faaeaga po o le ola e faavavau.
Ua iloa lelei i tatou o se Ekalesia e totonugalemu le aiga, ae o le mea e le o malamalama lelei o le tulaga e totonugalemu le aiga, e le na o le taulai atu i sootaga faaletino ae o se vaega foi e faatatau i mataupu taua faalelotu. I lalo o le fuafuaga sili a Le Foafoa agaalofa, o le misiona a Lana Ekalesia o le fesoasoani lea ia i tatou ia ausia le faaeaga i le malo selesitila, ma ua na o le faaipoipoga e faavavau i le va o se tane ma se fafine e mafai ona faataunuuina ai (tagai MFF 131:1–3).
E le’i i ai se faaluafesasi o lo’u tina faamaoni ua oti lana tane e uiga i le tulaga faavavau o le sootaga faaleaiga. E na te faamamaluina pea le tofi o lo matou tama faatuatua ua maliu. E na te faailoaina pea o ia i totonu o lo matou aiga. E na te talanoa mai i le tulaga faavavau o la laua faaipoipoga faalemalumalu ma lo matou taunuuga ina ia faatasia o se aiga i le olaga a sau. E na te faamanatu soo mai ia i matou le mea e manao lo matou tama matou te faia matou te agavaa ai mo le folafolaga a le Faaola ina ia avea o se aiga e faavavau. E na te le ta’uina lava ia o se tina ua maliu lana tane, ma e le taitai lava oo mai i lo’u mafaufau o ia o se [tina ua maliu lana tane]. Ia te au lava ia, a o tuputupu a’e o se tamaitiiti, e le o ia o se tina ua maliu lana tane. Na i ai sona toalua, ma sa i ai so matou tama. Ua na o sina taimi sa alu ese atu ai o ia.
Ua matou mautinoa o le faaipoipoga e tatau ai mo le faataunuuga o le fuafuaga a le Atua e maua ai le tulaga faamaonia mo le fanau mai faaletino ma saunia tagata o le aiga mo le ola e faavavau. O le malamalamaaga i le fuafuaga a le Atua e aumai ai i le Au Paia o Aso e Gata Ai se vaaiga uiga ese i le faaipoipoga ma le fanau. Matou te vaai atu i le fanauina mai ma le faafaileleina o fanau o se vaega o le fuafuaga a le Atua ma o se tiute paia mo i latou ua tuuina atu i ai le mana e faatinoina ai. Matou te talitonu o le oa taua i le lalolagi ma le lagi o a tatou fanau ia ma a tatou fanau i le lumanai. Ma e matou te talitonu e tatau ona tatou finafinau mo le ituaiga o aiga faaletino lea e maua mai ai le tulaga sili mo le atiina ae ma le fiafia o fanau—fanau uma lava.
O le mana e foafoa ai le ola faaletino o se mana faaeaina ua tuuina mai e le Atua i Ana fanau. O le faaaogaina o lenei mana foafoa na faatagaina i le uluai poloaiga ina “ia fanafanau, ma ia uluola” (Kenese 1:28). O le isi poloaiga taua na faasaina ona faaaoga sese: “Aua e te mulilua” (Esoto 20:14), ma le “ia faamamao outou ma le faitaaga” (1 Tesalonia 4:3). O le faamamafa o loo tatou tuuina i lenei tulafono o le ola mama o loo faamatalaina mai i lo tatou malamalamaaga i le faamoemoega o o tatou mana foafoa i le faataunuuina o le fuafuaga a le Atua.
O loo tele uunaiga faapolokiki, faaletulafono, ma faaagafesootai mo suiga e faaluafesasi ai itupa, ua le faamamafaina ai le taua o faaipoipoga pe ua suia ai lona faauigaga, po o le faavasegaga o le eseesega i le va o alii ma tamaitai lea e taua ina ia ausia ai le fuafuaga sili a le Atua o le fiafia. O la tatou vaaiga faavavau e faatulagaina ai i tatou e tetee atu i na ituaiga o suiga.
O le mea mulimuli, o lo tatou malamalamaaga i le faamoemoega o le olaga faaletino e aofia ai nisi o aoaoga faavae tulaga ese e uiga i le tulaga e sosoo ma le olaga faitino. E pei o isi Kerisiano, tatou te talitonu afai tatou te tuua lenei olaga, tatou te o i se lagi (parataiso) po o se seoli. Ae ia i tatou, o lenei vaevaega itu-lua o le au amiotonu ma le au amioleaga ua na o se mea e le tumau ao faatalitali ia agaga o e ua maliliu mo lo latou toetutu ma le Faamasinoga Mulimuli (tagai Alema 40:11–14). O taunuuga e sosoo ma le Faamasinoga Mulimuli e matua eseese lava, ma e tulai mai e avea o se faamaoniga o le tele naua o le alofa o le Atua mo Ana fanau—i latou uma lava.
O le alofa o le Atua e matua maoae lava lea e Na te manaomia ai Lana fanau ina ia usiusitai i Ana tulafono aua ua na o lena usiusitai e mafai ai ona latou alualu i luma agai i le taunuuga e faavavau lea e finagalo ai o Ia mo i latou. O lea la, o le a tofia i tatou uma lava i le taimi o le Faamasinoga Mulimuli i le malo o le mamalu e talafeagai ai ma lo tatou usiusitai i Lana tulafono. I lana tusi lona lua i tagata Korinito, na ta’ua ai e le Aposetolo o Paulo se faaaliga o se tagata “ua segia o ia i le lagi tua tolu” (2 Korinito 12:2). I le talanoaina la e uiga i le toetutu o e ua maliliu, na ia faamatalaina ai “tino” ma mamalu eseese, e pei o mamalu e faatatau lava i le la, masina, ma fetu. Na ia faatatau i uluai [tino] nei e lua o ni “tino selesitila, ma ni tino telesitila” (tagai 1 Korinito 15:40–42). Mo i tatou, o le ola e faavavau i le mamalu selesitila, o le tulaga pito i maualuga, e le o se faatasiga faaleagaga ma se atua-agaga e le malamalama i ai. Ae, o le ola faavavau o se olaga faaleaiga ma se Tama alofa o i le Lagi faatasi ai ma o tatou augatuaa ma a tatou fanau.
O le aoaoga faalelotu o le talalelei toefuataiina a Iesu Keriso e malamalama, e laugatasia ai le lalolagi, e alofa mutimutivale, ma e moni. A uma ia aafiaga e tatau ai o le olaga faitino, o le a iu lava ina toetutu atalii ma afafine uma o le Atua ma o atu i se malo o le mamalu e sili atu le matagofie e le mafai e se tagata soifua ona malamalama i ai. E na o ni nai tuusaunoaga lava, ae e oo lava i tagata e sili ona amioleaga o le a iu lava ina o atu i se malo o le mamalu—e ui lava ina e maualalo atu—ae matagofie lava. O nei mea uma o le a tutupu ona o le alofa maoae o le Atua mo Lana fanau, ma ua mafai nei mea uma ona o le Togiola ma le Toetu o Iesu Keriso, “o lē faamamaluina le Tama, ma faasaoina galuega uma a ona aao” (MFF 76:43).
3. Punaoa o le Upu Moni
E maoae le naunau o tagata o le Au Paia o Aso e Gata Ai i le tulimata’ia o le malamalama. Na sili ai le faaupuina e Polika Iaga (1801–77): “[O la tatou] ekalesia … e uunaia i [tatou] e saili ma le maelega le malamalama. E leai lava nisi tagata o loo soifua ua matuai sili lo latou naunau e vaai, faalogo, aoao, ma malamalama i le upu moni.”6
E i ai se taimi na ia faamatalaina ai e faapea, tatou te uunaia o tatou tagata ina “ia faateleina [lo latou] malamalama … i soo se lālā o le [aoaoga], aua o le poto uma, ma faatufugaga uma ma faasaienisi o i le lalolagi e mai le Atua ia, ma ua fuafuaina mo le lelei o ona tagata.”7
Tatou te saili i le malamalama, a e tatou te faia i se auala faapitoa aua tatou te talitonu e lua vaega o le malamalama: faaletino ma le faaleagaga. Tatou te saili le malamalama i le tulaga faaletino i le suesueina faasaienisi a o le tulaga faaleagaga e ala i faaaliga. O faaaliga o le fesootaiga lea a le Atua i le tagata—i perofeta ma i tatou uma taitoatasi pe a tatou sailia.
O faaaliga e manino lava o se tasi lea o uiga tulaga ese o lo tatou faatuatuaga. Na faatonuina ma aoaoina le Perofeta o Iosefa Samita i le liligiina mai pea o faaaliga i lona soifuaga atoa. O se aofaiga tele naua o ana faaaliga na lomia, e aofia ai le Tusi a Mamona ma le Mataupu Faavae ma Feagaiga, na tauaveina ai pea lona valaauga uiga ese o le Perofeta o lenei tisipenisione mulimuli o taimi. I lenei faaaliga faaperofeta—ia Iosefa Samita ma e na soloa’i mai e avea ma Peresitene o le Ekalesia—na faaali i ai e le Atua le upu moni ma poloaiga i Ana taitai-perofeta mo le faamalamalamaina o Lona nuu ma mo le puleaina ma le taitaiga o Lana Ekalesia.
O le ituaiga faaaliga lea o loo faamatalaina i aoaoga o le Feagaiga Tuai e faapea “e le faia lava se mea e le Alii o Ieova, ae faaalia lona finagalo i ana auauna o perofeta” (Amosa 3:7). Na folafola mai e Iosefa Samita, “O Le Ekalesia a Iesu Keriso o le Au Paia o Aso e Gata Ai sa faavaeina i luga o faaaliga tuusao mai, e pei lava ona i ai le Ekalesia moni a le Atua.”8 Na ia fesili, “A aveese le Tusi a Mamona ma faaaliga, o fea la le tatou lotu?” Na ia tali mai, “Ua leai se mea.”9
Na aoao mai foi e Iosefa Samita ona e le’i gata faaaliga i Aposetolo anamua ae o loo faaauau pea i ona po nei, ua mafai e tagata taitoatasi ona maua sana lava faaaliga patino mo lona liua mai, malamalamaaga, ma le faia o faaiuga. “O se avanoa mo fanau a le Atua le o atu i le Atua ma maua ai faaaliga,” o lana saunoaga lea. “E le faailoga tagata le Atua; ua ia i tatou uma avanoa tutusa.”10
O loo faamatalaina e le Feagaiga Fou ia ituaiga faaaliga patino. Mo se faataitaiga, ina ua faamautinoa e Peteru lona talitonuga o Iesu o le Alo paia o le Atua, na tautino mai e le Faaola, “E le se tagata na ia faaali atu ai ia te oe, a o lo’u Tama o i le lagi” (Mataio 16:17).
O faaaliga patino e faaigoa i nisi o taimi o— “musumusuga”—e tele foliga e oo mai ai. O le tele lava o taimi o ni upu po o ni manatu e fesootai mai i le mafaufau i se malamalama faafuasei po o se lagona lelei foi po o le lē lelei e uiga i ni auala o faatinoga na fuafuaina. E masani lava ona oo mai e tali ai se tatalo faatauanau. Na aoao mai Iesu, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7). E oo mai faaaliga pe a tatou tausia poloaiga a le Atua ma agavaa ai mo le mafutaga ma le fesootaiga ma le Agaga Paia.
E tau mafaufau nisi pe faapefea ona talia e tagata o le Ekalesia ni aoaoga a se perofeta i nei ona po e taitai ai o latou olaga patino, o se mea e le masani ai i le tele o aga masani faalelotu. O la tatou tali i le tuuaiga faapea, o le Au Paia o Aso e Gata Ai e mulimuli i o latou taitai ona o le “usiusitai tauaso” o le faaaliga patino lava lea. Tatou te faaaloalo i o tatou taitai ma talitonu i musumusuga i la latou taitaiga o le Ekalesia ma a latou aoaoga. Ae peitai ua tatou maua uma le avanoa ma ua fautuaina ina ia faamautinoa a latou aoaoga e ala i le sailia ma le agaga tatalo ma le mauaina o se faamautinoaga faafaaaliga tuusao mai le Atua.
E talitonu le toatele o Kerisiano ua tapunia e le Atua le lisi o tusitusiga paia—o le faaputuga faatuatuaina o tusi e paia ua faaaogaina o ni tusitusiga paia—ina ua faatoa mavae le maliu o Keriso ma ua le o toe i ai ni faaaliga e faatusalia talu mai lena taimi. Na aoao ma faapupula mai e Iosefa Samita o loo matala pea le lisi faatusi paia.11 O le mea moni lava, o le tulafono faatusitusiga paia e lua auala o loo matala ai, ma o le faaauauina pea la o faaaliga e matua taua lava i nei mea uma e lua.
Muamua, na aoao mai e Iosefa Samita o le a taitaiina e le Atua Lana fanau e ala i le tuuina mai o ni faaopoopoga fou i le lisi o tusitusiga paia. O le Tusi a Mamona o se faaopoopoga lena. E faapena foi i faaaliga o i le Mataupu Faavae ma Feagaiga ma le Penina Tau Tele. E tatau mo i tatou ia faaaliga faifai pea ina ia iloa ai mea e finagalo le Alii tatou te malamalama ai ma faia i o tatou lava taimi ma tulaga.
Lona lua, o le faaauau pea o faaaliga e tatala ai le lisi a o mauaina e le au faitau o tusitusiga paia, i lalo o le uunaiga a le Agaga Paia, ni faauigaga fou faatusi paia ma taitaiina ai mo o latou tulaga patino. Na tusia e le Aposetolo o Paulo e faapea “o tusi paia uma lava e mai le agaga o le Atua ia” (2 Timoteo 3:16; tagai foi 2 Peteru 1:21) ma e faapea “e le o le loto o tagata na tuu mai ai le valoaga anamua, a o tagata paia o le Atua na tatalaina mai [ina ua osofia] mai e le Agaga Paia” (1 Korinito 2:11; tagai i vaefaamatalaga c, mai le Faaliliuga a Iosefa Samita). O le uiga o lenei mea, ina ia malamalama i mau, tatou te manaomia se uunaiga faaletagata lava ia mai le Agaga o le Alii e faamalamalama ai o tatou mafaufau. O lea la, tatou te faamalosiau i o tatou tagata ina ia suesue i tusitusiga paia ma saili ma le agaga tatalo ia musumusuga latou te iloa ai mo i latou lava ia uiga. O le malamalama faaiu e oo mai i se faaaliga patino e ala mai i le Agaga Paia.
Na aoao mai Iesu, “Tou te iloa ai i latou i o latou fua” (Mataio 7:20). Ia te au lava ia, i le anoanoai o isi tagata talitonu, ma le toatele o le au matau, e lelei ia fua—e lelei mo le au paia, lelei mo o latou aiga, lelei mo o latou nuu, e lelei foi mo lo latou atunuu. O le faitau miliona tala o le tau o sapalai ma auaunaga o loo tuuina atu gugū ma le lelei e Le Ekalesia a Iesu Keriso o le Au Paia o Aso e Gata Ai ma ona tagata e tali atu ai i mala e pei o le mafuie i Haiti ia Ianuari 2010 o ni faamaoniga ia o lena mea moni.
I le avea ai ma se Aposetolo ua valaauina a’u e avea o se molimau i le aoaoga faavae, galuega, ma le sui o Keriso i le lalolagi atoa. I lena tofiga ou te molimau atu ai i le moni o nei mataupu faavae o lo tatou faatuatuaga.
Mo le saunoaga atoa i le faaPeretania, asiasi i le www.lds.org/fundamental-premises-of-our-faith.
Ata na saunia e Craig Dimond © IRI; faamatalaga auiliili mai leKeriso ma le Tamaitiiti, saunia e Carl Heinrich Bloch, e le mafai ona kopiina
O Le Uluai Faaaliga Vaaia, saunia e Gary L. Kapp, e le mafai ona kopiina
Ata na saunia e Laureni Fochetto
Ata na saunia e Ruth Sipus