Savali a le Au Peresitene Sili
O Loo Manaomia e le Alii ia Faifeautalai
Ia Oketopa talu ai i le konafesi aoao, sa ou valaau atu ai mo nisi faifeautalai. O alii talavou agavaa uma lava, malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoe le Alii mai ia i tatou ua tele mea ua tuuina mai i ai. Alii talavou, ou te apoapoai atu ia te outou, ia saunia mo le galuega faafaifeautalai. Ia tausisia lo outou mama ma le atoatoa ma le agavaa, e avea ma sui o le Alii.Tausisia le ola maloloina ma le malosi. Suesue i tusitusiga paia. Afai e i ai, ia o i le Seminare ma le Inisitituti. Faamasani i le tusitaulima a faifeautalai, o le Tala’i La’u Talalelei.
Tuafafine, e ui e le tutusa a outou tiutetauave faaleperisitua ma alii talavou e auauna atu faafaifeautalai faamisiona, e i ai foi la outou sao taua o ni faifeautalai, ma e matou te taliaina la outou auaunaga.
Ia te outou uso ma tuafafine matutua o le Ekalesia, ou te faamanatu atu ia te outou o loo manaomia lava e le Alii le anoanoai o outou e avea ma ni faifeautalai faamisiona. Ia te outou na e le’i aulia le taimi o le olaga e mafai ai ona avea ma ulugalii faamisiona, ou te fautuaina outou e tapena nei loa mo le aso e mafai ai, pe a mafai e o oulua tulaga o i ai, ona oulua o ma lau soa. E i ai ni nai taimi i o outou olaga, o le a outou olioli ai i le lagona matagofie ma le faamalieina e maua mai le auauna atu faatasi mo se taimi atoa, i le galuega a le Matai.
Ia, atonu o nisi o outou e matamumuli pe mafaufau foi ia te outou lava tou te le agavaa e talia ai le valaau e auauna atu. Ia manatua, o le galuega lenei a le Alii, ma pe a tatou i ai i le feau a le Alii, ua tatou agavaa foi mo le fesoasoani a le Alii.” O le a faamalosia e le Alii le papatua e tuu i ai le avega.
O isi, e ui ina agavaa e auauna atu faamisiona, atonu e manatu e i ai mea e sili atu ona taua e faamuamua. Ou te manatuaina le folafolaga a le Alii: “O e faasili ia te au, ou te faasili ia te i latou” (1 Samuelu 2:30). E leai se tasi o i tatou o le a faasili ona faamamaluina lo tatou Tama Faalelagi ma lo tatou Faaola nai lo le auauna atu o se faifeautalai tuuto, ma le agaalofa.
O se faataitaiga o lena auaunaga o le aafiaga faafaifeautalai lea sa faia e Juliusz ma Dorothy Fussek, o e na valaauina e faamisiona i Polani. Sa fanau Uso Fussek i Polani. E tautala o ia i le gagana. E alofa o ia i tagata. O Tuafafine Fussek na fanau i Egelani ma e laititi si ona iloa ia Polani ae augapiu se iloa i ona tagata. O lo la’ua faalagolago i le Alii, na la malaga atu ai i lenei tofiga. Sa leai nisi o le galuega, ma sa matua tele naua le galuega. E lei faavaeina se misiona i lena taimi i Polani. O le tofiga na tuuina atu i le au Fussek o le saunia lea o le ala ina ia mafai ai ona faavae se misiona.
Pe na faavaivai ai ea Elder ma Sister Fussek ona o le tele naua o le galuega na atofa atu ia i la’ua? E leai lava. Sa la iloaina o lo la valaauga e mai le Atua. Sa la tatalo mo Lana fesoasoani faalelagi, ma sa la tuuto atu i la’ua lava ma o la’ua loto atoa i le galuega.
Na i ai le taimi na matou malaga atu ai ma Elder Russell M. Nelson o le Korama a Aposetolo e Toasefululua; Elder Hans B. Ringger, a o avea ma Fitugafulu; faatasi ma Elder Fussek, e feiloai ma le minisita o mataupu tau tapuaiga, o Adam Wopatka, o le malo o Polani. Sa matou faalogo atu o ia faapea, “E talia lelei la outou ekalesia iinei. E mafai ona fausia ni o outou fale; e mafai ona auina mai a outou faifeautalai. O le tagata lea,” a o faasino lona aao ia Juliusz Fussek, “e matua lelei lona tautuaina o la outou ekalesia. E mafai ona outou faafetai atu i ai mo lana faataitaiga ma lana galuega.”
Faapei foi o le au Fusseks, ina tatou faia ia o mea e tatau ona tatou faia i le galuega a le Alii. Ona mafai ai lea ona tatou faaleoina faatasi ma Juliusz ma Dorothy Fussek le Salamo:
“O lo’u Fesoasoani e mai ia Ieova ia, o le na faia le lagi atoa ma le lalolagi.
“… E le tuuina mai e ia ia mapeva lou vae.
“Faauta, o le leoleo ia Isaraelu, e le tulemoe ia, e le moe lava” (Salamo 121:2–4).
Ata na saunia e Hyun Gyu Lee, Matthew Reier, and Craig Dimond
Ata na pueina e Howard Collett