Matou Te Talitonu!

Saunia e le Au Peresitene Aoao o Tamaitai Talavou

O Elaine S. Dalton (ogatotonu), peresitene; Mary N. Cook (tauagavale), fesoasoani muamua; ma Ann M. Dibb (taumatau), fesoasoani lua.

Matou te talitonu o se tamaitai talavou amio mama e toatasi, e taitaiina e le Agaga, e mafai ona suia le lalolagi. I le avea ai ma se au peresitene aoao o Tamaitai Talavou, ua matou matauina ai tamaitai talavou o loo faia mea ua latou talitonu e sa’o, tu atu e fai ma molimau, ola i tulaga faatonuina o le talalelei, ma fai moni se suiga. E maofa lava i mea e mafai e se tamaitai talavou se toatasi ona ausia pe a amio mama o ia, ma faalogo i le leo itiiti ma le filemu o le Agaga Paia, ona faatino loa lea!

Ina ua tusia e Iosefa Samita le mataupu faavae o le faatuatua lona sefulutolu, sa ia faaalia mai mea uma e mafai ma e ao ona tatou sailia ma avea ai ma ni tagata talitonu. Sa silafia e Iosefa Samita e ao lava ona tatou talitonu i tulaga faatonuina ma tulaga faatauaina ma saili mo nei mea ina ia mafai ona tatou maua le mana ma le malosiaga o le Agaga Paia. Sa ia silafia e tatau ona tatou mulimuli i le Faaola i le upu ma le amio. Sa ia silafia o le faia o lenei mea o le a saunia ai i tatou ina ia agavaa mo faamanuiaga o le malumalu.

Talitonu ia te Oe Lava Ia

E faapefea ona e faia lenei mea? E faapefea ona e taitaia isi e mulimuli i faataitaiga a le Faaola, ola i se olaga mama, ma saunia mo le malumalu? Muamua, talitonu ia te oe lava ia! O lou lototele ma lou malosi ua fesoasoani e avea ai oe ma se taitai, ma o lau tautinoga o le a faia ai se eseesega atoa i le tausaga lenei. O ou manatu, taulagalaga, ma amioga e mafai ona mamanuina ai le lalolagi i le taimi nei ma le lumanai.

Ona ua e ola nei i le lalolagi o tekinolosi, ua ia te oe le tulaga e gafatia ai ona faalilofia le lalolagi i mea e mama, matagofie, ma tauleleia. Ua i ou tumutumulima le gafatia e molimau atu ai e uiga i le talalelei a Iesu Keriso i le lalolagi atoa. E le’i i ai lava i se tupulaga muamua sea gafatia, faamanuiaga ma le avanoa.

O Mea e Tolu Faaopoopo i ai ma le Tasi—Aso Uma!

Matou te talitonu ia te outou. O le taimi lenei e tutu faatasi ai ma amata se suiga lea o le a faamamanaina ai oe ma faamanuiaina ai isi. Matou te valaaulia oe e faaauau pea ona e faia mea e tolu i aso uma taitasi—faaopoopo i ai ma le tasi.

Tatalo i po uma ma taeao uma.
Faitau i le Tusi a Mamona ia le itiiti ifo ma le lima minute i aso uma lava.
Ataata!
E le gata i lea, matou te valaaulia oe e usitai ma ola i tulaga faatonuina o loo i le Mo Le Malosi o le Autalavou. Ia faamasani i nei tulaga faatonuina. Faasoa atu ia mea i isi. Ma ia fai ma se faaaoao o e talitonu.

Mo le tausaga lenei, ia talitonu. Talitonu o oe o se afafine o le Tama Faalelagi, o lē e alofa ia te oe ma o le a fesoasoani ia te oe. Talitonu i le Faaola o Iesu Keriso. O Ia o lou sulu. O Ia o lou faamoemoe. O Ia o lou faataitaiga ma le Togiola. Talitonu ia te oe lava ia! Talitonu i le mana o tamaitai talavou uma e ola i tulaga faatonuina. I lo tatou galulue faatasi ai e mafai ona tatou saili i na mea uma e mama, matagofie, ma tauleleia. I lo tatou galulue faatasi ai e mafai ona tatou faia se eseesega i lo tatou lalolagi.

Matou te talitonu o outou o le tupulaga o lo outou talitonuga ma amioga o le a suia ai le lalolagi. Matou te talitonu ia te outou!