2011
Ou Te Faamoemoe Latou te Valaauina Au i se Misiona?
Ianuari 2011

Ou te Faamoemoe Latou te ValaauinaAu i se Misiona ?

Saunia e Loran Cook

Atonu ua outou faalogo i le pese a le Peraimeri “Ou Te Faamoemoe Latou te Valaauina Au i se Misiona.” O loo i ai se isi pese taua a tamaiti e uiga i le faia o se misiona. Fai mai: “Ou te fia faifeautalai nei. Ou te le fia faatali sei matua.”1 E ioe foi i ai Elder M. Russell Ballard o le Korama a Aposetolo e Toasefululua. Fai mai o ia, “E tatau i tagata talavou ona vave ta’utino atu i latou lava a o laiti i le manatu o le faia o se misiona.”2

Ae peitai, o le iloaina e tatau ona e faia se misiona ma le lagonaina ua e saunia e auauna atu o ni mea eseese se lua. O fea e te amata ai? O le faamalosia o lau molimau ma le iloa o le talalelei o nisi ia o mea e lua e sili ona lelei e mafai ona e faia. O loo ta’ua i lalo ni nai auala e mafai ona e sauniuni ai e fai se misiona.

1. Faatuatua

E manaomia le faatupuina i aso taitasi o lo tatou faatuatua. Na aoao mai Iesu Keriso, “Afai tou te faatuatua ia te au, e ia te outou le mana e fai ai mea uma e tatau ia te au” (Moronae 7:33).

  • Suesue i tusitusiga paia. Latou te aoao ma molimau ia Iesu Keriso.

  • Faaaoga le faatuatua e faafetaia’i ai faafitauli faaletagata lava ia. O le faatuatua ia Iesu Keriso o le a faamafanafanaina ai oe i taimi faigata ma o le a fesoasoani ia te oe i le foiaina o faafitauli uma.

  • Ia e matuai pulea lou tino ma lou mafaufau e ala i le aoaoina o le taua o le a’oga, malosi, ma le ola maloloina.

  • Ia tumau i le salamo, usitai i poloaiga, anapogi, ma tatalo e faamama lou olaga.

  • Mo alii talavou, faaaoga le faatuatua ia Iesu Keriso e ala i le aoao e uiga i le perisitua ma le faataunuuina o ou tiute faaleperisitua.

2. Agaga

Na aoao mai foi Elder Ballard, “E tatau i faifeautalai ona ola mama ma saunia faaleagaga.”3

  • Suesue ma mulimuli i taiala o loo i le Mo Le Malosi o le Autalavou.

  • Saili le taitaiga a le Agaga Paia e ala i le anapogi, suesue i tusitusiga paia, ma tatalo mo le taitaiga.

  • Faitau e uiga i meaalofa a le Agaga i le Mataupu Faavae ma Feagaiga 46:11–26. Ia e saili ma le agaga tatalo ia iloa au meaalofa faaleagaga. Saili le fautuaga a ou matua ma taitai e fesoasoani ai ia te oe e atiina a’e au meaalofa faaleagaga.

  • Fesili ifo ia te oe lava, “Pe o faagaeetia ea tusi ou te faitauina ma polokalama ma ata tifaga o le televise ou te matamata ai?” Afai e leai, mafaufau pe mafai faapefea ona e faia ni filifiliga lelei mo faafiafiaga.

  • Aoao e faalogo mo uunaiga faaleagaga.

3. Alofa

E te manaomia le alofa, le alofa mama o Keriso, e te auauna lelei ai o se faifeautalai. O le alofa i isi e le faigofie i taimi uma. E manaomia ai le auauna atu, faatuatua, le Agaga Paia, ma le lototele. Fai mai Mamona e tatau ona e tatalo ma lou malosi atoa ina ia faatumulia oe i le alofa mama o Keriso (tagai Moronae 7:48).

  • Tatalo ma le lotomaulalo ma le faamaoni ia mafai ona e alofa i isi e pei o le alofa o Keriso.

  • Faaali atu le alofa mo lou aiga e ala i le faia o se galuega alofa mo tagata taitoatasi o le aiga. Filifili se tagata o le aiga o loo manaomia se alofa faaopoopo po o se gauai atu i ai ma faaalu se taimi faatasi ma ia.

  • Faaali atu lou alofa mo se tasi o manaomia se fesoasoani e ala i le faia o se mea lelei mo ia.

4. Auauna Atu

Sa aoao e le Tupu o Peniamina lona nuu i le taua o le auauna atu. Fai mai o ia a tatou auauna atu i isi, o lo tatou auauna atu lava lea i le Atua (tagai i le Mosaea 2:17).

  • Ia fai le auauna atu ma se amio masani. E mafai ona e ofo atu e faamama ipu pe a mae’a le mea’ai o le afiafi, fesoasoani i sou tei i ana meaaoga, talanoa i se tasi o manaomia se uo, pe fesoasoani e faatumau le mama o le tou pitonuu.

  • Tatalo mo le malosi ma le taitaiga e mulimuli ai i le faataitaiga a le Faaola o le auauna atu.

  • Fesoasoani i lau vaega o Alii po o Tamaitai Talavou e fuafua se gaoioiga auauna atu.

5. Valaaulia

O Alema, o se tasi o faifeautalai maoae o le Tusi a Mamona, sa valaau atu ia i latou sa le auai i le Ekalesia e “o mai ma ia papatisoina i le salamo” (Alema 5:62). E mafai ona e mulimuli i lana faataitaiga.

  • Ia avea ma se uo ma se faataitaiga lelei i uo ma tagata o lou aiga e le auai i le Ekalesia.

  • Saili ni avanoa e aoao ai au uo ma tuaoi e uiga i le talalelei.

  • Aoao i le talalelei ma faataitai ona aoao atu i le taimi nei. Fai i le taitai misiona o lau uarota po o le paranesi mo se taitaiga pe faapefea ona aoao atu le talalelei. Afai e mafai, ia e i ai i lesona pe a aoao atu e faifeautalai faamisiona ni tagata sailiili.

  • Suesue faatasi ma lou aiga le Tala’i La’u Talalelei i le afiafi faaleaiga. E mafai ona outou auauai e talanoa e uiga i lesona, aoao atu ni vaega [o lesona], ma valaaulia le tasi ma le isi e tuuina mai ni molimau i mea ua e aoaoina.

O le faia o se misiona o se sini taua e fai i le taimi nei, ma o le sauniuni i le taimi nei o le a manuia ai lou olaga i aso uma e tau atu i se misiona. E le faapea e te laitiiti mo le amataina o au sauniuniga—e te le tau faatali seia e matua.

Faamatalaga

  1. “Ou Te Fia Avea Nei ma Faifeautalai,” Tusipese a Tamaiti, 90.

  2. M. Russell Ballard, “Auala e Saunia ai e Avea ma se Faifeautalai Lelei,” Liahona, Mati 2007, 10.

  3. M. Russell Ballard, Liahona, Mati 2007, 12.

Ata na tusia e Sal Velluto ma travis walton