O Le Talafaasolopito ma le Talatuu o le Aualofa

Suesue i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

Na toe faamanatu mai e Eliza R. Snow le aoaoga a le Perofeta o Iosefa Samita faapea “e ui o le igoa [Aualofa] atonu e faaona po nei, ae o le faalapotopotoga e tupuga mai anamua.”¹

Na asia e le Tama Faalelagi ma Lona Alo o, Iesu Keriso, ia Iosefa Samita ma, na ala mai ia te ia, le toefuataiga mai o le atoaga o le talalelei i le lalolagi. Na avea le Aualofa ma se vaega o lena toefuataiga. E lei atoatoa ona faatulagaina le Ekalesia vagana ai ina ua faatulagaina tamaitai.²

O masina o loo loma nei, o le a aumai ai ia i tatou e Savali taitasi a Faiaoga Asiasi le avanoa e aoao atili ai e uiga i le talafaasolopito o le Aualofa ma lana pitolaau i le talalelei toefuataiga. Mo le tele o mafuaaga, o le malamalama i lo tatou talafaasolopito e le gata ina taua ae e tatau ai.

Muamua, o se malamalamaaga e uiga i lo tatou talafaasolopito o le a musuia ai i tatou e avea ma tamaitai o le Atua e tatau ona avea ai i tatou. E ala i le mulimuli i faataitaiga a tamaitai amiotonu o le Au Paia o Aso e Gata Ai, e mafai ai ona tatou aoao mai mea ua tuanai le auala e fetaia’i ai ma le lumanai.³

Lona lua, e aoao mai e lo tatou talafaasolopito o mataupu faavae lava e tasi na i ai i le Ekalesia anamua, o a tatou mataupu faavae autu foi na i le taimi nei. O lenei malamalamaaga ma o tatou faamoemoega—ina ia faateleina le faatuatua ma le amiotonu patino, faamalolosia auaiga ma aiga, ma fesoasoani ia i latou e manaomia le fesoasoani—o le a faia ai se sootaga i le va o le taimi ua tuanai ma lo tatou vaitaimi.

Lona tolu, a tatou faatauaina lo tatou talafaasolopito, o le a mafai atili ai ona tatou faasoa atu lo tatou talatuu faaleagaga. Na saunoa mai Peresitene Henry B. Eyring, Fesoasoani Muamua i le Au Peresitene Sili: “E te pasi faasolo atua le talatuu pe a e fesoasoani i isi ia maua le meaalofa o le alofa moni. … O le talafaasolopito o le Aualofa o loo tusia i upu ma fuainumera, ae o lona talatuu e pasi faasolo atu mai le loto i le loto.”⁴

O le mea mulimuli, o le malamalama i lo tatou talafaasolopito e fesoasoani lea e avea ai i tatou ma se vaega ola o le lumanai o le Aualofa. Na faamalamalama mai e Peresitene Spencer W. Kimball (1895–1985) faapea, “Matou te iloa o tamaitai o e o i ai se agaga fiafia loloto mo mea ua tuanai o le a popole e uiga i le fatufatuina o se lumanai amiotonu.”⁵

Julie B. Beck, peresitene aoao o le Aualofa.

Mai Tusitusiga Paia

Eseta 9:28–29; Roma 16:1–2; Alema 37:8; Moronae 7:45–47

Mai lo Tatou Talafaasolopito

“O le Aualofa o le faalapotopotoga lea a le Alii mo tamaitai.”⁶ I lona malosiaga o se perofeta, na faatulaga ai e Iosefa Samita le Aualofa i le aso 17 o Mati, 1842. Na i ai i lena uluai fonotaga se vaega toalaiti, eseese o tamaitai tuuto, e tutusa lava ma tuafafine o le Aualofa i le taimi nei. “O e aupito laiti o ni tamaitai talavou se toatolu, ma le aupito i matua, o se tina e i le vaitausaga o le limasefulu. E toasefulutasi tamaitai ua faaipoipo, toalua ua maliliu a la tane, toaono e lei faaipoipo, ma le toatasi e le mailoa le tulaga sa i ai. E eseese o latou tulaga tau aoaoga ma tulaga faaletagata, e faapena foi o latou tulaga faaletamaoaiga. O lo latou eseesega o le a faalauaiteleina i le tele o taimi a o faaauau pea ona faatupula’ia tagata auai o le faalapotopotoga, peitai sa tasi i latou ma o le a faaauau pea lava ona tasi.”⁷

O Le Aualofa a Navu, saunia e Walter Rane, faaaloaloga a le Falemataaga o Talafaasolopito a le Ekalesia