O Fea Isapela?
“Sa mananao ia papatisoina i latou e fai ma faailoga ma molimau ua latou loto ina auauna atu i le Atua ma o latou loto atoa” (Mosaea 21:35).
O le fiafia tele o Isapela na toetoe ai ina osooso a o la savavali atu ma lona tamā i le faapaologa o le falelotu. Faatoa maea ona seluina e lona tina lona lauulu uliuli ma toso i luga le sipi o le ofu paepae umi o le a ofuina e Isapela mo lona papatisoga. Sa tu o ia i fafo o le potu o loo faatalitali ai tagata uma.
“E mafai ona ave e soo se tagata se kopi o tusi la?” o lana fesili lea i lona tamā ma tusi atu i kopi o le Tusi a Mamona sa i luga o se tama’i laulau.
“Ioe. O tusi la e mo tagata e fia iloa atili e uiga i le tatou ekalesia,” o le tala lea a Tama.
Sa tilotilo faamatatasi atu Isapela i totonu o le potu. Sa tumu i tagata e alofa i ai. Sa nonofo latalata i le pito i luma ia lona tinamatua, uso ma tuagane o ona matua, ma ona tausoga. Sa nonofo faatasi lana uo lelei lava o Grace ma lona aiga i le pito i tua. Ae sa le’i iloa atu e Isapela lona faiaoga o le aoga o Misi Pekina.
“Ta o i totonu,” sa fai atu ai Tama. “Ua tatau ona amata le sauniga.”
“E mafai ona ta faatalitali mo se minute se tasi mo Misi Pekina?”
O Misi Pekina o le faiaoga lea e sili ona fiafia i ai Isapela. E fiafia o ia i tusi, ma e faapena foi Isapela.
“Lelei tele oe mo le valaauliaina o ia, Isapela, ae ailoga a sau,” o le tala lemu lea lea a Tama.
Sa mapuea Isapela ma luelue lona ulu. Sa la savavali atu loa ma Tama i totonu o le potu ma nonofo i le laina pito i luma. O le taimi tonu lava o le a amata ai le pese amata, ae faliu loa Isapela e toe vaai tasi lava pe ua sau lona faiaoga. A lale ua saofafai mai ma le aiga o Isapela! Sa ataata Isapela. Sa ataata mai foi i ai Misi Pekina.
Ina ua uma le papatisoga o Isapela, sa fai atu loa le epikopo i tagata uma e soso mai i totonu mo le pueina o se ata.
“O fea Isapela?” o lana fesili lea.
Sa tau fai tilotilo solo tagata. E leai se Isapela!
Sa alu Grace e sue mai lana uo. Sa ia sueina muamua i le faapaologa, ae sa le’i i ai Isapela iina. Ona alu atu lea i le pito i luma, ae sa lei i ai foi iina. Ona su’e ai lea i fafo ma iloa atu ai Isapela o tutu i le faasitepu o le falelotu ma talanoa ai ma Misi Pekina.
“Faafetai lava mo lou sau i lo’u papatisoga,” sa fai atu ai Isapela.
“E le afaina,” sa fai mai ai Misi Pekina. “E faamalie atu ona e tatau ona ou vave alu. E i ai se isi au fuafuaga e fai nei.”
“E le afaina. Ae e i ai se mea ou te fia tuuina atu ia te oe.” Sa tuu atu e Isapela i lona faiaoga se Tusi a Mamona lea sa ia aumaia mai le laulau i le faapaologa. “Ou te iloa e te fiafia e faitau, ma o se tusi e sili ona manaia lenei.”
“Faafetai lava,” o le tala lea a Misi Pekina.
“E mafai ona e faitauina?” sa fesili atu ai Isapela.
“Ioe, o le a ou faitauina,” na fai mai ai Misi Pekina. “O la’u tala moi lava.”
Sa matuai lagona e Isapela le fiafia. Sa ataata o ia a o faliu ma vaai mai ia Grace o loo faatalitali atu mo ia.
“O le a lau mea sa fai i fafo i o?” o le fesili lea a Grace. “O loo manao lou tina i so tatou ata toatele.”
“Sa ou alu e ave le Tusi a Mamona ia Misi Pekina,” o le tala lea a Isapela.
Sa matuai faaatoatoa le pupula a Grace. “Sa e fefe?”
“Sa ou fefe laitiiti. Ae sa sili atu lo’u fefe ina nei alu tuu i se isi mea. O lea na ou fesili ai ia te ia pe mata o le a ia faitauina.”
“Na fai mai la e a?” sa fesili atu ai Grace.
“Sa ia folafola mai o le a ia faitauina!”
“Matuai manaia tele!” o le tala lea a Grace.
Sa faatasi atu nei teineiti e toalua i uo ma tagata o le aiga.
“Ua ou fiafia ua maua oe e Grace, Isapela!” sa fai atu ai le epikopo. Ona toe fai atu ai lea i tagata uma e faapotopoto mai i totonu mo le pueina o le ata. Sa tu Isapela i le ogatotonu o le laina pito i luma.
Mulimuli ane, sa punou ane le tina o Isapela ma fusi o ia. “Ua mafai nei ona e manatuaina e faavavau le aso o lou papatisoga!” na ia fai mai ai.
Sa ataata Isapela. Sa ia iloaina e tusa pe i ai pe le i ai se ata, o le a le galo lava ia te ia le aso o lona papatisoga ma le lagona fiafia i le avea ai ma se faifeautalai.
Ata na tusia e Craig Stapley