Fefe i Suiga
Sa ou ola ae o se tagata Kerisiano. E ui e le o ni tagata lolotu lo’u aiga, ae na aoao pea lava a’u e o lo’u tama e fai le mea ou te iloa e moni.
I le amataga o lou olaga talavou sa ou oo ai i le tele o tofotofoga. O le taotoga i lo’u tua, teteaga o o’u matua, ma’i o lo’u tina, ma le tausiga o lo’u uso laitiiti lea na oo ai ia te au le le fiafia ma le ulagia. I ni nai masina a o lei atoa lo’u 15 tausaga, sa ou feiloai ai i faifeautalai. Na aoao au e Elder Johnson ma Elder Chadwick e uiga i le talalelei.
Na ou faitauina le Tusi a Mamona, ae ou te le’i fia faia ni suiga ia na talosaga mai faifeautalai ou te faia. Na ou fai atu ia i laua ua tele naua nei suiga ma e toeitiiti lava ou fai i ai e tuu ia au. Sa ou tilotilo i luga a o ou faia na upu ma fetaui lelei ai lava ma mata o Elder Chadwick. Na tafe ifo i lalo o lona alafau se loimata se tasi, ma sa ou matua maasiasi lava. Sa ou ta’u atu ia i laua o le a ou valaau atu i le aso e sosoo ai.
Sa ou alu i le fale mai le lotu ma faitauina faauma le Tusi a Mamona mo le taimi muamua. Ona ou tootuli ifo lea i lalo, o se mea ou te lei faia lava muamua, ma fesili atu i le Atua pe moni. Ou te le’i fesili muamua lava i le Atua. Ina ua uma ona ou fai atu “amene”, na ufitia a’u i se lagona o le to’a ma le filemu. Na ou iloa sa i ai so’u Tama Faalelagi e alofa ia te au, na ou iloa e moni le Tusi a Mamona, ma na ou iloa e mafai ona ou sui.
Na ou papatiso i le sefulu aso mulimuli ane. Na o mai uma o’u matua i lo’u papatisoga. E ui ua na o au lava i lo’u aiga e auai i le ekalesia, ae ou te faatuatua o le a i ai se aso o le a latou tootutuli ai ma fesili atu i le Atua. Ua faavalu nei ona ou faitauina le Tusi a Mamona, ma e matagofie lava e pei o le taimi muamua. Ou te iloa e moni le Tusi a Mamona. E i ai le mana e suia ai tagata.