Seia Tatou Toe Feiloai
E Le Tuulafoaiina Lava
O le fetalaiga a le Faaola e uiga i tusitusiga paia sa ou mautinoa ai e le tuulafoaiina lava i tatou.
I le taimi o Lana galuega sa masani ona ta’ua e le Alii ia mau. O lea la, e le tatau ai ona tatou tetei i le vaaia o fuaitau o loo i le Feagaiga Tuai ua ta’ua e le Faaola i le Feagaiga Fou. Ae sa ou tei i se tasi o aso ina ua ou faitauina le fuaiupu muamua o le Salamo 22: “Lo’u Atua e, lo’u Atua e, se a ea le mea ua e tuulafoai mai ai ia te au?”
Ou te lei mafaufauina lava sa sii mai e le Faaola ia tusitusiga paia ina ua Ia ta’ua na upu i Lona mafatiaga i luga o le satauro (tagai i le Mataio 27:46). O lena manatu sa taitaiina atu ai i se mautinoa loloto faaleagaga.
Atonu na i ai se taimi sa tatou manatunatu uma ai faapea, “Le Atua e, o i fea ea oe?” (MFF 121:1). E masani ona oo mai i lou mafaufau lena fesili i taimi ou te le mautonu ai pe mafatia faaleagaga.
O le mafuaaga lena e pei ai fetalaiga a le Faaola o augani mai i le fesili: Pe o Lana alaga ea sa tulai mai i le le mautonu—po o le masalosalo foi? Pe o le uiga ea sa i ai se fesili sa lei i ai i lo’u Faaola e i ai le mana uma, ma silafia mea uma, se tali i le taimi tonu lea sa faalagolago ai lo’u faaolataga i Lona mana e tuuina mai tali uma ma faatoilaloina mea uma?
O le faitauina o le salamo lenei ua aoaoina ai au, e ui lava e moni o nei upu e aumaia ai lagona tiga o le agaga ona o le “atuatuvale matautia ua le mafuta mai le lagi ,” lea atonu sa Ia faanaunau i ai, ae sa lei malamalama atoatoa i ai, sa lē o se faailoga o le masalosalo.1
O lea lava faatinoga o le valaau atu i Lona Tama i le taimi sa sili ona mafatia ai o Ia e faaaoga ai upu mai tusitusiga paia, sa le gata o se faamaoniga o le faatuatua ae o se avanoa loloto foi o aoaoga. E ui ina amata le Salamo 22 i se fesili, ae o se faaalia lea o le faatuatuaga loloto e le tuulafoaiina i tatou e le Atua:
“Na faatuatua ia te oe o matou tama: na latou faatuatua, ua e laveai foi ia te i latou.
“Na latou alalaga atu ia te oe, ona laveaiina ai lea o i latou: na latou faatuatua ia te oe, ona le faamaina lea o i latou” (fuaiupu e 4–5).
O le faaaogaina o aafiaga a le faisalamo o se muai faaataataga o mafatiaga o le Faaola, na muai ta’ua ai e le faisalamo ia tauemuga (fuaiupu 7–8), o le faamasinoga sese ma sauaga faatautala na sosoo ai (fuaiupu 11–13), o Ona tiga ma puapuaga (fuaiupu 14), o Lona fia taumafa i se vai (fuaiupu 15), o le tutu’iina o Ona lima ma vae (fuaiupu 16), ma le faiga o vili ma le tufatufaina o Ona ofu (fuaiupu 18).
E ui ina sa sii mai e le Faaola na o le fuaiupu muamua, ae o le vaega o totoe o le salamo ua avea ma se tasi o molimau o Ia o le Mesia folafolaina, o Lona puapuagatia ua faataunuuina ai le valoaga, ma sa Ia faatuatuaina atoa Lona Tama.
O lenei malamalama na aumaia ai i lo’u agaga se faamaoniga tele e faapea o lo’u faatuatua sa le’i sese se vaega na tuu ai. Ae e sili atu foi le mamana nai lo le iloaina sa lei masalosalo Iesu ma sa laveaiina, o le molimau lea o loo i lena salamo mo taimi pe a ou mafaufau ai pe ua tuulafoai au e le Atua po o taimi foi ou te popole ai e faapea e lei faafofoga mai o Ia i la’u tagi.
“O outou o e matatau i [le Atua], ina vivii atu ia ia te ia; o outou o le fanauga uma a Iakopo, ina vivii atu ia ia te ia; o outou o le fanauga uma a Isaraelu, ia outou fefefe ia te ia.
“Aua e le ta’ufaatauvaa o ia, e le inoino foi o ia i le puapuaga o le ua puapuagaina [o Iesu]; e le liliu ese foi e ia [o le Tama] ona fofoga ia te ia; na tagi atu o ia [Iesu] ia te ia, ona faafofoga mai ai lea o ia” (fuaiupu 23–24; ua faaopoopo le faamamafa).
O Le Pouliuli i le Faasatauroga, na saunia e Gustave Doré