O Le Perisitua Arona — E Sili Atu Nai Lo Le Mea Na E Mafaufauina

O Se Savali e faatatau i le polokalama o le Tiute i le Atua

Saunia e David L. Beck

O Le Peresitene Aoao o Alii Talavou

O le fa tausaga talu ai na ou auai atu ai i le sauniga o le maliu o lo’u uso o Gary. Na saafi se tasi o failauga i lo’u uso. Talu mai lava lena taimi ou te mafaufau pea lava i ai. Fai mai a ia, “O Gary o se alii o le perisitua. … Sa malamalama o ia i le perisitua, faamamaluina le perisitua, ma na ia taliaina atoatoa le perisitua ma ona mataupu faavae.”

Ina ua maliu lo’u uso, sa avea o ia ma faitaulaga sili i le Perisitua Mekisateko, ma sa ia olioli ai i le 50 tausaga o lana auaunaga faaleperisitua. O Gary o se toalua ma se tamā e alofa o lē sa avea ma faifeautalai faamamaluina, na faaipoipo i le malumalu, faalauteleina ona valaauga faaleperisitua, ma sa galue ma le filiga o se faiaoga o aiga.

O oe o sē o loo umia le Perisitua Arona. O lea faatoa amata lau auaunaga faaleperisitua. Atonu e le’i atoa se 50 ni aso o lou perisitua. Ae e mafai ona e agavaa mo lena lava saafiafiga e tasi e pei ona mauaina e Gary. O le mea moni lava, e tatau ona eagavaa mo lena saafiafiga. Ua valaauina oe e le Alii mo se galuega matagofie, ma o loo Ia faamoemoe mai ia te oe e avea o se alii o le perisitua.

O Le Tulaga Maoae o le Perisitua Arona

Se’i tau lava ina e mafaufau i le maoae tele o le Perisitua Arona lena e te tauaveina:

Na auina mai e le Alii ia Ioane le Papatiso ua toetu e toefuatai mai le Perisitua Arona. Ina ua faaee atu e Ioane lenei perisitua ia Iosefa Samita ma Oliva Kaotui, sa ia valaauina i laua o ona “uso a auauna” (MFF 13:1). Na faailoa mai e Peresitene Gordon B. Hinckley (1910–2008) “e le’i tuuina [e Ioane] o ia lava i luga a’e o Iosefa ma Oliva. Na ia faatutusa i la’ua ma ia ina ua ia faapea atu “o’u uso a auauna e.” Na toe saunoa mai Peresitene Hinckley e faapea e mafai foi e se tiakono e 12-tausaga-le-matua ona avea ma uso a auauna a Ioane.¹
O le Perisitua Arona e umia ki o asiasiga ma galuega a agelu (tagai i le MFF 13:1). A e ola amiotonu ma auauna atu ma le filiga, o le a mafai ona e maua asiasiga ma galuega a agelu e taialaina ma faamalosia oe. O lou faatautaia o le faamanatuga, e mafai ai ona e fesoasoani i isi ia latou maua foi lea faamanuiaga.²
O le Perisitua Arona “o loo i ai ki … o le tala lelei o le salamo, ma le papatisoga i le faatofuina mo le faamagaloina o agasala” (MFF 13:1). E tuufaatasi le salamo ma le papatisoga e fausia ai le faitotoa lea e ulu atu ai tagata e amata ai i le ala i le ola e faavavau (tagai i le 2 Nifae 31:17–18). O le galue i lalo o le taitaiga a ou taitai perisitua, o le a mafai ai ona e fesoasoani i isi tagata e tatalaina lea faitotoa.
O le Perisitua Arona e aofia ai le pule e faatautaia ai le faamanatuga. Pe a e tapenaina, faamanuia, pe tufaina le faamanatuga, ua avea oe ma sui ia Iesu Keriso (tagai i le 3 Nifae 18:1–12). E te fesoasoani i tagata o lou aiga ma au uo ia manatua o Ia, faafou a latou feagaiga, ma agavaa mo le mafutaga a le Agaga Paia.

O nei ituaiga avanoa e manaomia ai le faatinoga a alii perisitua—alii o e malolosi faaleagaga ma ē o loo faataunuuina o latou tiute faaleperisitua.

Tusi Fou o le Tiute i le Atua

I lalo o le taitaiga a o tatou perofeta soifua, ua saunia ai se punaoa e fesoasoani ia te oe ina ia avea o se alii perisitua. E ui e fou le punaoa, ae e i ai se igoa ua masani ai: Tiute i le Atua.

Ua faagaeetia lava au e uiga i le tusi fou o le Tiute i le Atua. E mafai ona fesoasoani ia te oe e te usitai ai i le poloaiga a le Alii ina ia “aoao [lou] tiute” ma “galue i le tofi ua tofia ai [oe], i le maelega atoatoa” (MFF 107:99).

O le faaaogaina la o le tusi i le avea ai ma se tiakono, aoao, ma ositaulaga, o le a e auai ai i ni gaoioiga i ni vaega se lua: malosi faaleagaga ma tiute o le perisitua.

O Se Mamanu o le Avea Ai

O gaoioiga taitasi i totonu o le tusi o le Tiute i le Atua, o loo mulimuli i se mamanu o le a fesoasoani ia te oe e avea ai ma sē e umia le perisitua o loo finagalo le Alii: Muamua, e te aoao e uiga i se mataupu faavae o le talalelei po o se tiute faaleperisitua. Ona e galue lea i le mea na e aoaoina. Mulimuli, e te faasoa atu ou mafaufauga ma lagona e uiga i mea na e aoaoina ma o’o i ai. O nisi o nei gaoioiga e patino i le tagata. O isi e mafai ona fetuunai mo lau korama atoa e faaaoga i lesona o le Aso Sa po o gaoioiga i le vaiaso.

I le itulau e 39 i le faataitaiga mai le tusi, o loo faaalia ai le ala e faaaoga ai lea mamanu. O faamatalaga e mai i alii talavou ua i ai le poto masani tele i le tusi fou.

1. Aoao: O le vaega lenei o gaoioiga e taialaina a outou taumafaiga ina ia aoao e uiga i se mataupu faavae o le talalelei po o se tiute o le perisitua. E aofia ai faatonuga mo oe ina ia faia sa oe lava fuafuaga e faavae i luga o mea sa e aoaoina.

“E mafai ona e aoao i ai faaleagaga” e uiga i ou tiute faaleperisitua ae e te le’i faataunuuina.

O se tasi e umia le Perisitua Arona i le Iunaite Setete

“Ou te fiafia i le manatu o le taumafai e mafaufau i ni mea e mafai ona fesoasoani moni ia te a’u lava ia.”

O se tasi e umia le Perisitua Arona i Kuatemala

“Ou te fiafia i vaega o le suesueina o tusitusiga paia ma tatalo, ma sa ou faia ia mea ma o loo o’u faia pea lava. O lea ou te sauniuni e auauna atu i se misiona.”

O se tasi e umia le Perisitua Arona i Filipaina

2. Galue:I le vaega lenei o le gaoioiga, e te mulimuli i lau fuafuaga ma tusi ou mafaufauga ma lagona e uiga i ou aafiaga.

“I le avea ai ma ni alii talavou i le paranesi, na tonu ia i matou e faatu se sini e faatasitasi ai ma o e tamomoe. Sa matou matua fiafia lava e fuafuaina faatasi lenei mea, ma sa matou galulue ai o se vaega, ia matou malolosi atili faaletino.”

O se tasi e umia le Perisitua Arona i Kuatemala

“O le tusi … e pei o se tusi o faamatalaga patino po o se api o talaaga lea e mafai ona e … toe tomanatu ai ia te oe lava ia. O se alāfua lelei e ui ai.”

O se tasi e umia le Perisitua Arona i le Iunaite Setete

“E faigata lava ia te a’u ona faatulaga taimi o a’u suesuega i tusitusiga paia. … O a’u sini na i ai e faitau ia tusitusiga paia ma tatalo na fesoasoani lea ia te a’u ina ia maua se taimi ma taulai sa’o ai le vaai. Na tele se eseesega na faia mo a’u, ma sa ou lagonaina le Agaga a o o’u faatinoina.”

O se tasi e umia le Perisitua Arona i Filipaina

3. Faasoa atu: A uma ona e mulimuli i lau fuafuaga, ona e maua lea o se avanoa e faasoa atu ai ou mafaufauga ma lagona i tagata o lou aiga, uso o le korama, ma isi.

“Pe a e faasoa atu, e te manao ina ia faaauau pea ona e talanoa atu i isi e uiga i ai aua o le [faasoa atu] na fesoasoani e te malamalama atili ai.”

O se tasi e umia le Perisitua Arona i le Iunaite Setete

“Na lelei aua sa mafai ona ou talanoa ma o’u matua.”

O se tasi e umia le Perisitua Arona i Filipaina

“I le fonotaga a la matou korama sa matou fiafia e talatalanoa le tasi i le isi e uiga ia matou sini: i mea o loo matou faia taitoatasi ma le ala na fesoasoani ai nei mea ia i matou.”

O se tasi e umia le Perisitua Arona i Kuatemala

O Se Alii Perisitua

Pe a ou mafaufau i le faaupuga “alii perisitua,” e mautinoa lava lo’u mafaufau i lo’u uso o Gary. A e ou te mafaufau foi i isi. Ou te mafaufau ia Peresitene Thomas S. Monson, o lē, a o avea ma se tiakono, na ia lagona sa tu o ia i le eleele paia a o ia fesoasoani atu i se alii e le atoatoa le malosi, e taumafa i le faamanatuga.³ Ou te mafaufau ia Ioane le Papatiso, o se na umia ma le maoae le Perisitua Arona ma na ia saunia le ala mo le galuega a le Faaola i le olaga nei, e ala i le aoao atu, molimau atu, ma faataunuuina le sauniga paia o le papatisoga. Ou te mafaufau foi ia te oe. A o e tuputupu a’e i le malosi faaleagaga ma fesoasoani atu i isi ia o mai ia Keriso e ala i lau auaunaga faaleperisitua, o oe moni lava o se alii perisitua.