Avea ma se Alii Faamaoni o le Perisitua
O David L. Beck (ogatotonu), peresitene; Larry M. Gibson (tauagavale), fesoasoani muamua; ma Adrián Ochoa (taumatau), fesoasoani lua.
Ae e te lei faauu mai le Peraimeri, o le toatele o outou sa taulotoina le mataupu faavae o le faatuatua lona sefulutolu ma e faamoemoe lava o loo mafai pea ona outou taulotoina. O le tausaga lenei, i le avea ai ma se au peresitene matou te tuuina atu ia te oe se lu’i ia la’a i luga atu o le na o le taulotoina ae ia aoao moni i le uiga o le saunoaga a le Perofeta o Iosefa Samita ina ua ia saunoa tatou te mulimuli i le apoapoaiga a Paulo. Matou te talosagaina oe e te suesue ma le totoa i uiga taitasi o loo taua i le mataupu faavae o le faatuatua lona sefulutolu, le autu o le Mutuale o le tausaga lenei. Matou te valaaulia oe e galue i mea ua e aoaoina. Ma matou te valaaulia oe e faasoa atu i isi le olioli ua aumaia i lou olaga i le ola ai i nei tulaga faatonuina.
O lenei mamanu o le amio e tutusa lava ma le mamanu o loo e faaaogaina i le polokalama fou o le Tiute i le Atua: aoao, galue, faasoa atu. O le mulimuli ai i laasaga faigofie nei e tolu o le a fesoasoani e avea ai oe ma se alii faamaoni o le perisitua.
Fai mai se vaega o le mataupu faavae o le faatuatua lona sefulutolu, “Matou te talitonu i le [avea] ma e faamaoni, amiotonu, nofo mama, agalelei, [ma le] amio mama” (faamamafa faaopoopo). O le avea e sili atu i le na o le auala e te galue ai—o le ituaiga tagata e i ai oe. O le avea ma se tagata faamaoni, amiotonu, nofo mama, ma isi mea faapena, e ese ai oe mai le tele o isi alii talavou o lau tupulaga. A vaai isi tagata i uiga lelei o ia te oe, o le a latou mananao foi i na lava uiga. A o e aoao i ou tiute o le perisitua ma galue i ai, o le a suia oe. A o e alu atu e “fai mea lelei i tagata uma,” o le a e faamanuiaina ma suia olaga o tagata.
Faataitaiga Lelei
O Peni o se faataitaiga lelei lea o le fesoasoani atu i isi ma le avea ma se faamanuiaga i o latou olaga. E vaavaai o ia mo tagata e leai ni uo pe ua manatu e le taulia i latou. E sili atu ona mafaufau o ia i isi tagata nai lo o ia lava. Ina ua siitia mai Keloni i le uarota a Peni, sa faamatalaina e Keloni lona olaga o se “mea noa ae na o le patī lava” lea sa sese le itu sa agai i ai. Sa ia lagona le gaogao ii o lona olaga. Ae ona o faataitaiga a ana uo o le Au Paia o Aso e Gata Ai ae maise lava o lana uo mamae o Peni, sa ia iloa ai sa i ai se auala e sili atu le lelei. Sa valaaulia e Peni ia Keloni e auai atu i gaoioiga a le Ekalesia. I na gaoioiga sa matauina ai e Keloni sa i ai se mea sa ese ai alii talavou sa i ai iina. Sa manao o ia e faapei o i latou. Sa ia le mautinoa po o le a, ae sa ia iloaina sa manao i ai. Sa manao o ia e fiafia e pei o i latou.
Sa tatalo o ia i le Atua ma iloa ai e tatau ona auai o ia i le Ekalesia. Sa papatisoina e Peni lana uo mamae ina ua tai 16 o la tausaga. Fai mai Keloni e uiga i lona papatisoga, “Lea faatoa ou maua le toafilemu, ma sa ou lagonaina aao agalelei o le Faaola a o ou aluese mai le vai. Ou te faafetai mo uo lelei o e sa ola i o latou talitonuga.
Mana o le Perisitua Arona
Fai mai le Mataupu Faavae ma Feagaiga 58:27–28 “e tatau i tagata ona galulue ma le naunautai i mea lelei,” i le faia o “mea e tele i lo latou lava lotomalie” ina ia mafai ona “faataunuuina le amiotonu tele; aua o i totonu ia i latou le mana.” O loo i totonu ia te oe le mana. Ua tuuina atu ia te oe le mana o le Perisitua Arona. Matou te alolofa ia te oe, ma matou te iloa e mafai ona e faia mea e tele a o avea oe ma se alii faamaoni o le perisitua.