O loo faigata lava i lo’u uso ona filifili pe moni le Ekalesia. E faapefea ona ou fesoasoani atu ia te ia?

Ia e lagolago atu ia te ia; e manaomia ona ia lagonaina le alofa—ae le o le faamalosi—e lona aiga. Mafaufau e fesili atu ia te ia po o a ona popolega ma masalosaloga. Tuu atu ia te ia e ta’u uma atu ia te oe ona popolega ae e te lei tali atu i ai. Atonu o ona popolega o ni popolega i le va ma isi pe patino foi, ae le faatatau i le faatuatuaga. Atonu e le mafai ona e tuuina atu ni tali uma o loo ia sailia, ae e mafai ona e faamautinoa atu ia te ia e mafai ona maua ni tali.

Fai atu i ai e te lua tatalo faatasi e uiga i ona popolega ma faamalosiau atu i ai e tatalo foi ia lava e uiga i ai. Ia nofouta i le mea moni e faapea, o nisi tagata e umi atu ona faatoa maua lea o tali o a latou tatalo nai lo isi, ae maise lava pe afai e moomia ona faatulaga nisi o vaega o o latou lava olaga. E mafai ona oulua faitau faatasi e uiga i le tatalo ma le mauaina o se molimau mai le Alema 32, 3 Nifae 17, po o le Moronae 10. Ma le isi foi, e mafai ona e fautuaina o ia e talanoa i ona matua, ma lou epikopo po o le peresitene o le paranesi, pe ma isi tagata faamaoni o le Ekalesia o e sa galulue foi i ni popolega faapena.

A uunaia ai, ia e molimau atu ia te ia. Faailoa atu i ai ou lagona e uiga i le talalelei.

Ma le vaega mulimuli, ia manatua o le Agaga e molimau mai i le mea moni. Ina ia maua se molimau pe ia iloa foi ua i ai sana molimau, e ao lava i lou uso ona aoao ia iloa le Agaga Paia. O lenei mea e ono tele se taimi e moomia ai, ma e le mafai ona fai faamalosia. E mafai ona e ta’u atu ia te ia ni mea moni i le aso atoa, ae ua na o se fesootaiga anoa lava ma le Agaga e mafai ai ona ia maua se molimau.

Tatalo mo ia ma faamalosiau atu ia te ia, lagolago o ia ma faalogo atu ia te ia, ae ia manatua ua saoloto o ia e filifili. O le a sili atu ona poto lana filifiliga pe a mulimuli i le taitaiga a le Agaga.

Ia fesoasoani atu i e pele ia te oe ia maua se molimau e ala i le faitau mai tusitusiga paia ma aoao i latou i le ala e iloa ai le molimau a le Agaga Paia.