E Tatau Ona E Aveina le Vasega Seminare
O se fautuaga sa le’i mafaufauina a se uo sa fesoasoani e suia ai lo’u olaga.
“Lisa, e tatau ona e aveina le vasega seminare,” o le soona fai atu lea o Ashley. Sa i o ma luma ni faavaa sa faaalia ai ni lisi o vasega e filifili ai mo le tausaga aoga o le a sosoo ai, ina ua ma amata i le aoga maualuga.
Sa ou tilotilo atu i la’u uo ma le leai o so’u mafaufau i ai, ma sa iu ina ou ataata. Sa ou le fia ta’uina ia te ia, ae o le seminare o le mea lea sa aupito mamao ese mai lo’u mafaufau. O le taimi lena sa ou le toaga ai i le Lotu, e pei ona sa ou i ai i le tele o lo’u olaga. I le aluga o tausaga, sa itiiti so’u iloa i le talalelei ma sa leai sa’u molimau malosi i lona moni.
Ina ua tuua le aoga i lena aso ma ou alu i le fale, sa amata ona faagaeetia au i le manatu e uiga i le seminare. O Ashley ma isi au uo, sa foliga mai sa fiafia uma lava e avea ma se vaega o le seminare. Sa ou manao e fai e pei ona sa faia e au uo, e tusa pe ou te lei malamalama i le mea na latou faia pe aisea foi sa latou faia ai. Ina ua uma ona matou talanoa ma o’u matua i la’u fuafuaga ma maua mai le la faatagaga, sa ou filifili loa e ave le seminare i lo’u tausaga muamua i le aoga maualuga.
Ou te le’i iloa se aafiaga loloto o le a faia e lena gaoioiga faatauvaa i lo’u olaga. O lo’u tausaga muamua o le seminare na suia ai lo’u olaga a o amata ona ou vaaia au lava ma isi o ni fanau a le Atua, e alofaina ma talisapaia. Sa amata ona ou alu i le lotu i Aso Sa, e ui lava ina le malolosi lo’u aiga.
Ua uma nei la’u aoga maualuga, ae o le a ou faafetai pea lava pea mo le seminare. O lena itula i aso taitasi, sa taliina ai au tatalo ma faamalosia ai la’u molimau. O le seminare sa fesoasoani ou te sauniuni ai mo se faaipoipoga i le malumalu ma faamalosiauina ai au e taumafai ia avea ma se tagata lelei atu.
Ua ou iloa e popole le Atua mo i tatou uma taitoatasi. Ua ou iloa o le seminare o se faamanuiaga sa fesoasoani e fausia ai lo’u olaga i se faavae mausali ia Iesu Keriso. Ou te fautuaina outou e lesitala i le seminare. O le a suia ai foi lou olaga.
Ata na tusia e Doug Fakkel