Walay Paglubad nga mga Istorya sa Ebanghelyo
Ayaw Palingla
Joseph Fielding Smith, ikanapulo nga Presidente sa Simbahan, natawo niadtong Hulyo 19, 1876. Giordinahan siya niadtong Abril 7, 1910, ug gipaluyohan siya isip Presidente sa Simbahan niadtong Enero 23, 1970. Niini nga pakigpulong, nga gihatag niadtong 1953, si Presidente Smith mitudlo sa kabatan-onan sa paagi aron dili malingla sa bakak nga mga teyoriya sa kalibutan.
Gikan sa “Entangle Not Yourselves in Sin,” Improvement Era, Sep. 1953, 646–47, 671–72, 674, 676–78; capitalization ug punctuation gihimong standard.
Ingon sa uban nga miusab sa ilang mga sumbanan aron sa pagpahaum sa kalibutanon nga pamaagi, kinahanglan gayud nga lig-on natong barugan ang anaa sa mga kasulatan ug sa gipadayag nga mga kamatuoran sa ebanghelyo.
Nagpuyo kita sa usa ka masamok kaayo nga kalibutan, ug ako mosulti og klaro: nagpuyo kita sa kalibutan nga mibaliwala sa Dios o paspas kaayo ang pagbuhat sa ingon. Nagpuyo kita sa kalibutan diin ang mga ministro sa Kristiyano sa nagkalain-laing mga denominasyon nahadlok sa mga pilosopiya sa tawo, busa, tungod kay kulang sila sa Espiritu sa Ginoo, misulay sa pag-usab sa mga kasulatan, o sa kahulugan sa mga kasulatan, aron ila kining mapahaum sa bakak nga mga teyoriya nga nabantog na kaayo sa kalibutan karon, mga teyoriya nga supak gayud sa balaan nga pagpadayag; ug bisan kini nga mga tawo, nahadlok, nga gidominar sa impluwensya sa bakak nga pilosopiya, mi-usab sa mga doktrina aron kini mohaum niining mga teyoriya ug mga ideya sa pagka-walay tahud sa dios diha sa ilang pundasyon. Dili kita makaako sa paghimo niana. …
“Ang kahayag midan-ag sa kangitngit, ug ang kangitngit wala makasabut niini; bisan pa niana, ang adlaw moabut nga kamo makasabut bisan ang Dios, ingon nga gipalihok diha kaniya ug pinaagi kaniya.
“Unya kamo masayud nga kamo nakakita kanako, nga Ako mao, ug nga Ako ang tinuod nga kahayag nga anaa kaninyo, ug nga kamo ania kanako; kay kon dili kamo dili molampus” (D&C 88:49–50).
Talagsaon kini nga pagpadayag. Daghan kaayong mga butang ang gihisgutan niini nga importante kaayo ngadto sa tanang miyembro sa Simbahan. Pila kaha kanato ang nagbasa sa seksyon 88? Ayaw paghunong sa pagbasa lamang niining usa ka seksyon. Dawata kini isip inyong tema—walay mas maayo pa—pero basaha ang tibuok pagpadayag. Dili! Basaha ang tibuok libro. Ang Ginoo misugo sa una gayud nga seksyon sa Doktrina ug mga Pakigsaad, nga mao ang pasiuna niini nga basahon, ang pasiuna sa Ginoo:
“Siksika kini nga mga sugo, kay sila mga tinuod ug matinud-anon, ug ang mga panagna ug mga saad nga anaa kanila ang tanan matuman” (D&P 1:37). “Siksika kini nga mga sugo.” Unsa nato ka mahal ang Ginoo? Unsa ang labing mahinungdanon sa tanang mga sugo? Ang Ginoo misulti nato dinhi, sa seksyon 59 sa Doktrina ug mga Pakigsaad, unsa kini, samtang Siya mogamit niini ngadto sa mga miyembro sa Ang Simbahan ni Jesukristo sa mga Santos sa Ulahing mga Adlaw niining dispensasyon sa kahingpitan sa mga panahon:
“Busa, Ako mohatag ngadto kanila [sa mga miyembro sa Simbahan] og usa ka sugo, nga nag-ingon: Higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gahum, hunahuna, ug kusog; ug sa ngalan ni Jesukristo kamo moalagad kaniya” (D&P59:5). …
Mao nga ang una sa tanang mga sugo mao ang paghigugma sa Dios sa atong tibuok kalag ug, sa pangalan ni Jesukristo, moalagad Kaniya, ug Siya misugo kanato sa paghimo sa atong mga kaugalingon nga masinati niini nga mga kamatuoran nga gipadayag ngari kanato niining dispensasyon sa kahingpitan sa mga panahon.
Pila kanato ang nakahimo niini? Mao nga ako moingon nganha kaninyo, ug sa tanang mga miyembro sa Simbahan bahin nianang butanga, ayaw itumong ang inyong pagsabut sa usa ka bersikulo [D&C 88:86, ang tema sa Mutual niana nga tuig], nga mao ang maayo kaayo nga tema, apan siksika ang mga kasulatan aron nga kamo dili malingla sa bakak nga mga teyoriya ug mga praktis ug mga doktrina nga nabantog kaayo sa kalibutan karon. Kon kamo mohimo niini, kon anaa sa inyong mga kasingkasing ang giya sa Espiritu sa Ginoo nga ang kada miyembro sa Simbahan may katungod sa pagbaton niini, ang pagpakig-uban sa Espiritu Santo, dili kamo mahisalaag nianang mga teyoriya sa mga tawo tungod sa Espiritu sa Ginoo nga mosulti ninyo nga kini bakak, ug kamo makabaton sa espiritu sa pag-ila aron kamo makasabut. …
Karon, kon kamo nakasabut sa ebanghelyo ni Jesukristo, kamo mahimong gawasnon. Kon ang inyong softball, ang inyong volleybal, ang inyong basketball, ang inyong lumba sa lakaw, ang inyong pagsayaw, ang inyong laing mga kalingawan nagkulang sa Espiritu sa Ginoo, kini walay bili nganha kaninyo. Itugot nga ang tanan pagahimoon sa diwa sa pag-ampo ug pinaagi sa hugot nga pagtuo. Sa akong hunahuna mao kana—tingali dili na kinahanglan nga mosulti pako niini—apan nahinaykan na kon kana mao. Buhata ang tanan uban sa bug-os nga tinguha ngadto sa himaya sa Dios, ug tudloan ug lig-unon nato ang atong mga kaugalingon ug Ang Simbahan ni Jesukristo sa mga Santos sa Ulahing mga Adlaw.
Paghulagway sa litrato ni Frank Helmrich