Pagdala sa Primary sa Panimalay
Ang Langitnong Amahan Mamulong Kanato pinaagi sa Iyang mga Propeta
“Unsa nga Ako ang Ginoo namulong, Ako namulong; … bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Magamit kini ninyo nga leksyon ug kalihokan sa pagkat-on og mas daghan kabahin sa tema sa Primary karong bulana.
Kon kamo nagkinahanglan sa paghangyo og usa ka tawo sa paghatag og importante nga mensahe ngadto sa mga tawo nga inyong gihigugma, unsa nga matang sa tawo ang inyong hangyoon? Siguro inyong pilion kadtong usa ka tawo nga matinud-anon, responsable, ug kasaligan.
Ang Langitnong Amahan mopadayag sa Iyang mensahe ngadto sa Iyang mga anak dinhi sa yuta pinaagi sa mga propeta. Siya nasayud nga ang Iyang mga propeta mga matinud-anon, responsable, kasaligan ug matarung.
Diha sa mga kasulatan atong mabasa ang mga sinulat sa daghang mga propeta kinsa misulat sa dinasig nga mga mensahe nga gipadayag sa Langitnong Amahan ngadto sa Iyang mga anak. Magkat-on kita kabahin sa pipila ka mga sinulat sa mga propeta diha sa mga kasulatan.
Si Malaquias mipaabut ngadto sa mga katawhan sa mensahe sa Ginoo kabahin sa pagbayad sa ikapulo ug mga halad (tan-awa sa Malaquias 3:8–10).
Si Alma ang Batan-on mibiya sa iyang posisyon isip labaw nga maghuhukom aron mahimong misyonaryo sa tibuok yuta (tan-awa sa Alma 4:15–20). Siya mipakigbahin sa mensahe sa Dios ngadto sa daghang katawhan.
Si Moroni mihatag sa mensahe sa Langitnong Amahan ngari kanatong tanan sa dihang siya mihatag kanato niining saad kabahin sa pagbasa sa Basahon ni Mormon: “Kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo” (Moroni 10:4).
Si Joseph Smith gihatagan og espesyal nga mensahe gikan sa Langitnong Amahan ug ni Jesukristo (tan-awa sa Joseph Smith—Kasaysayan 1:11–20). Si Joseph Smith migahin sa iyang kinabuhi sa pagpahayag niana nga mensahe ngadto sa tanang katawhan.
Kita napanalangin nga adunay usa ka propeta karon. Kita makadungog sa mga mensahe gikan sa Langitnong Amahan samtang kita maminaw sa propeta.
Kalihokan
Guntinga ang mga gilis sa papel uban sa mga litrato sa Unang Kapangulohan ug sa Korum sa Napulog Duha ka mga Apostoles. Ipapilit ang isigka tumoy sa mga gilis ngadto sa sinugdanan sa sunod nga gilis Pil-a ang papel og bale-bale diha sa mga linya aron makahimo og booklet.
Gamit sa lista sa ubos, isulat ang pangalan sa matag General Authority ubos sa iyang litrato. Paminaw sa ilang mga pamulong sa kinatibuk-ang komperensya ug gamita ang booklet sa pagsulat og mubo nga mga sulat. Ipakigbahin ang inyong panghunahuna kabahin sa kinatibuk-ang komperensya atol sa tingpangaon sa pamilya o family home evening.◼
Thomas S. Monson
Henry B. Eyring
Dieter F. Uchtdorf
Boyd K. Packer
L. Tom Perry
Russell M. Nelson
Dallin H. Oaks
M. Russell Ballard
Richard G. Scott
Robert D. Hales
Jeffrey R. Holland
David A. Bednar
Quentin L. Cook
D. Todd Christofferson
Neil L. Andersen
Mubo nga mga Sulat sa Kinatibuk-ang Komperensya
Paghulagway pinaagi ni James Johnson