Ipha ang Inyong mga Panalangin

Ni Presidente Henry B. Eyring

Unang Magtatambag sa Unang Kapangulohan

Gikan sa Oktubre 2007 nga pakigpulong sa kinatibuk-ang komperensya.

Ang pagkalimot sa Dios problema na gayud sa Iyang mga anak sukad pa sa sinugdanan sa kalibutan. Hunahunaa ang panahon ni Moises, sa dihang ang Dios naghatag og mana ug sa milagroso ug sa makita nga mga pamaagi midala ug miprotekta sa Iyang mga anak. Sa gihapon ang propeta mipasidaan sa katawhan: “Magmatngon … kay tingali lamang unya makalimot ka sa mga butang nga hingkit-an sa imong mga mata” (Deuteronomio 4:9).

Pangita og mga pamaagi sa pag-ila ug paghinumdom sa pagkamabination sa Dios. Kini makapalig-on sa atong mga pagpamatuod. Inyo bang nahinumduman kadtong awit nga usahay atong kantahon: “Ipha ninyo ang panalangin; tagsa tagsa inyong hinganlan, tan-awa unsa ang nabuhat sa Dios” (“Ipha ang Inyong mga Panalangin,” Mga Himno ug Mga Awit sa mga Bata, nu. 8).

Sa dihang ang among mga bata gagmay pa, misugod ko sa pagsulat og pipila ka butang kon unsa ang nahitabo matag adlaw. Wala gyuy adlaw nga gipalabay bisan unsa ko kakapoy o unsa ka sayo ko magsugod og trabaho inig sunod adlaw. Sa dili pa ko mosulat, mamalandong ko niini nga pangutana: “Ako bang nakita ang kamot sa Dios nga mihikap kanamo o sa among mga anak o sa among pamilya karon?” Samtang maghunahuna ko niana sa tibuok adlaw, akong makita ang ebidensya unsa ang nabuhat sa Dios alang kanatong tanan nga wala nako mamatikdi sa nagkapuliki nga mga panghitabo sa adlaw. Nakaamgo ko nga ang pagpaningkamot sa paghinumdom nagtugot sa Dios sa pagpakita kanako unsa ang Iyang nabuhat.

Ang Espiritu Santo nagtabang kanato nga makita unsa ang nabuhat sa Dios alang kanatong tanan. Mopamatuod ko nga ang Dios naghigugma kanato ug nagpanalangin kanato sobra pa kaysa atong nahibaloan. Nasayud ko nga kini tinuod, ug kini naghatag kanako og hingpit nga kalipay sa paghinumdom Kaniya.

• 1. D; 2. A; 3. E; 4. C; 5. F; 6. B.

Ug Kini Makapatingala Kaninyo!

Kamo makakat-on nga makamatikod sa mga panalangin nga gihatag sa Langitnong Amahan kaninyo sa sama nga nasinati ni Presidente Eyring—pinaagi sa pagsulat niini.

1. Pagbutang og usa ka notebook o journal ug bolpen o lapis tapad sa inyong higdaanan.

2. Matag gabii sa dili pa kamo mag-ampo ug mohigda, isulat ang:

   • Petsa.

   • Duha o tulo ka maayo nga mga butang nga nahitabo nianang adlawa.

   • Ngano nga kining maayo nga mga butang mga panalangin gikan sa Langitnong Amahan.

3. Kon kamo mag-ampo, siguradoa ang pagpasalamat sa Langitnong Amahan sa maayong mga butang nga inyong nahinumduman. Mahimo usab ninyong isulti sa mga sakop sa inyong pamilya ang mga panalangin nga inyong nakaplagan.

Sa Unsang Paagi ang Dios Mipanalangin sa mga Anak sa Israel

Ang basahon sa Exodus sa Daang Tugon naghisgut kon sa unsang paagi ang Ginoo mitabang sa Iyang pinili nga katawhan kon sila adunay mga problema. Ipares ang matag problema uban sa panalangin nga gipadala sa Ginoo aron sa pagtabang sa Iyang katawhan. Mga tubag:

Mga problema	Mga panalangin
1. Ang pinili nga katawhan sa Ginoo mga ulipon sa Ehipto.	A. Ang Ginoo mipadala og daghang mga epidemya ngadto sa Ehipto, ug ang Paraon sa katapusan mitugot nga buhian ang katawhan.
2. Ang Paraon, ang hari sa Ehipto, dili motugot kanila nga mobiya.	B. Ang Ginoo mihatag kang Moises sa Napulo ka mga Sugo. Iyang gipadungog ang tanang katawhan sa Iyang tingog ug mipakita sa Iyang kaugalingon ngadto sa pipila kanila.
3. Ang Paraon misugot nga buhian ang katawhan, apan ang iyang mga sundalo migukod kanila aron sa pagpabalik kanila.	C. Ang Ginoo misugo kang Moises sa pagbunal sa bato gamit ang iyang sungkod, ug ang tubig migawas.
4. Ang katawhan gipang-uhaw didto sa kamingawan.	D. Ang Ginoo misugo kang Moises sa paggiya sa katawhan paggawas sa Ehipto ngadto sa yuta nga saad.
5. Ang katawhan nahutdan og pagkaon, ug sila gipanggutom.	E. Ang Ginoo mitunga sa Pula nga Dagat aron ang katawhan makaeskapo.
6. Ang katawhan nagkinahanglan og panabang sa pagsunod sa Ginoo.	F. Ang Ginoo mipadala sa katawhan og pagkaon nga susama og lami sa tinapay ug dugos. Kini gitawag og mana, ug ila kining makita sa yuta matag buntag.

Paghulagway sa litrato pinaagi ni Weston Colton; mga paghulagway pinaagi ni Keith Christensen