Si Presidente Monson miingon nga ang pagserbisyo og full-time nga misyon usa ka responsibilidad sa priesthood. Unsay gipasabut niini?”
Sa miaging kinatibuk-ang komperensya si Presidente Thomas S. Monson miingon: “Ngadto sa batan-ong mga lalaki sa Aaronic Priesthood ug nganha kaninyo batan-ong mga lalaki nga mahimo nang mga elder: akong balikon ang dugay nang gitudlo sa mga propeta—nga ang matag takus, makahimo nga batan-ong lalaki kinahanglan nga mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan.”1
Lakip sa pagdawat sa priesthood mao ang pag-uyon sa pagdawat sa inyong kaugalingon sa mga responsibilidad ug mga katungdanan nga kauban niini. Kabahin sa uban pa nga gasa nga gihatag sa Langitnong Amahan, Siya nagdahum nga kamo mogamit sa priesthood sa pagpanalangin sa uban. “Alang kaniya ngadto kinsa daghan ang gihatag daghan ang gikinahanglan” (D&P 82:3).
Ang mga tighupot sa Aaronic Priesthood “magpasidaan, magpatin-aw, mag-awhag, ug magtudlo, ug magdapit sa tanan sa pagduol ngadto kang Kristo” (D&P 20:59). Sama sa gisulti ni Presidente Monson, ang pagserbisyo og full-time nga misyon usa ka katungdanan sa mga tighupot sa priesthood. Sa misyon inyong igahin ang tanan ninyong kusog, panahon ug mag-focus sa pagtuman nianang katungdanan: pagserbisyo, pagsangyaw sa ebanghelyo, ug pagdapit sa tanan sa pagduol ngadto kang Kristo. Dayag lang, ang pagtuman sa inyong katungdanan kanunay nga adunay panalangin. Ang inyong misyon maoy panahon sa hilabihan nga kalipay ug sa espirituhanon nga paglambo.