Tigpanalipod sa Hugot nga Pagtuo
Kubangila Kasanza Celva sa Kinshasa, Democratic Republic of Congo, usa ka bantugan nga magdudula sa daghang mga team.
Ang tig-atake sa laing team nag-dribble padulong sa goal, nga paspas. Nakasiguro siya nga maka-score. Apan si Celva migukod kaniya, mitapad, mipatid sa bola, ug midagan sa lahi nga direksyon.
“Ako usa ka tigpanalipod,” mipasabut ang 12 anyos nga si Celva. “Akong trabaho sa pagsanta sa laing team nga maka-score.”
Si Celva mao ang klase sa magdudula nga inyong ganahan nga makauban. Hilumon siya apan agresibo, andam siyang motrabaho pag-ayo, ug ganahan siyang makita ang tanan sa team. Mao kini ang mga hiyas nga nakapahimo niya usab nga importante nga kabahin sa laing mga team—sa iyang simbahan ug sa iyang pamilya. Ug mao usab ang iyang pagkaandam sa pagpanalipod sa kamatuoran.
Celva ug Nephi
Ang paborito nga kasulatan ni Celva mao ang 1 Nephi 3:7: “Ako moadto ug mobuhat sa mga butang nga ang Ginoo nagsugo.” Sama ni Nephi, si Celva misalig sa Ginoo. “Siya dili mosugo kanako og butang nga dili moandam og paagi alang kanako sa pagbuhat niini. Siya molig-on kanako ug mopadala sa uban sa pagtabang nako.”
Lakaw ug Buhata
“Ang pagpaminaw sa unsay gitudlo nato sa ebanghelyo importante,” miingon si Celva. “Apan importante usab ang pagbuhat unsay gitudlo nato.” Nahinumdom siya sa iyang bunyag ug naningkamot kada adlaw sa paggamit sa gasa sa Espiritu Santo sa paghimo og mga pagpili. Bag-o lang siyang nakadawat sa Aaronic Priesthood, naghandom nga makaadto sa templo sa umaabut aron sa paghimo og dugang nga mga pakigsaad uban sa Ginoo, ug nagplano nga moserbisyo og full-time nga misyon. Gusto siya nga mopakita og maayo nga ehemplo alang sa iyang mga igsoon nga lalaki ug moserbisyo sa iyang inahan ug amahan.
“Akong gitahud ang akong inahan ug amahan pinaagi sa pagbuhat unsay ilang isugo nako ug pinaagi sa pagsunod sa mga sugo sa atong Langitnong Amahan,” miingon siya. “Isip kamagulangang anak, nasayud ako nga importante nga ako mopakita og maayong ehemplo alang sa akong mga igsoong lalaki, tungod kay unsay akong buhaton ila usab nga buhaton.
Pagpabilin nga Lig-on
Nasayud si Celva nga importante nga motrabaho pag-ayo, sa sport ug sa ebanghelyo. Pag-ampo sa pamilya ug personal, pagtuon sa kasulatan sa pamilya ug personal, family home evening—ang tanan kabahin sa iyang regular nga buluhaton. Siya adunay pagpamatuod sa Pulong sa Kaalam ug nasayud nga adunay maayong kan-on samtang ang uban dili maayo. “Ang mga atleta kinahanglang dili moinom og beer,” maisugon siyang miingon.
Usa ka Tinuod nga Tigpanalipod
Samtang nagpaingon ang Simbahan ngadto sa umaabut, nindot nga makahibalo nga adunay mga young men sama ni Celva kinsa gusto nga mobuhat unsay ensakto. “Nasayud ako nga ang akong Langitnong Amahan buhi, nga si Jesukristo tinuod, ug nga si Joseph Smith propeta kinsa mipahiuli sa ebanghleyo dinhi sa yuta,” miingon si Celva. “Aduna ako niana nga pagpamatuod ug manalipod kanunay sa Simbahan sa bisan unsang paagi.”
Mga litrato pinaagi ni Richard M. Romney