“Ang Gugma nga Putli Dili gayud Mapakyas”: Usa ka Panaghisgutan sa Relief Society
Si Elder Jeffrey R. Holland sa Korum sa Napulog Duha ka mga Apostoles ug ang iyang asawa, nga si Patricia T. Holland, mipaambit og mga panabut sa tahas sa Relief Society.
“Dili ako makahanduraw nga magpakabuhi nga wala ang Relief Society,” miingon si Patricia T. Holland sa usa ka interbyu sa staff sa mga magasin sa Simbahan mahitungod sa kaimportante sa Relief Society. “Mao kana tungod kay dili nako mahunahuna ang pagpakabuhi nga wala ang ebanghelyo, ug ang Relief Society mao ang usa ka dapit nga personal akong makat-on og daghan mahitungod sa ebanghelyo.
Si Sister Holland ug ang iyang bana, si Elder Jeffrey R. Holland, miila sa gahum sa ebanghelyo sa ilang mga kinabuhi. Nagpasalamat usab sila sa impluwensya sa Relief Society sa pagtukod og lig-on nga panimalay. “Ang Relief Society mao kanunay ang kusog sa Simbahan,” miingon si Elder Holland. “Nakatabang kini kanunay unsay gikinahanglan sa kada ang-ang sa kalamboan sa Simbahan. Karon ang kontribusyon niini mas nahimo pang makahuluganon tungod sa malisud nga mga panahon nga atong gipuy-an. Dili kini programa mismo. Mao kini ang ebanghelyo—ang ebanghelyo nga inubanan sa buhat diha sa mga kinabuhi sa dalaygon nga mga babaye. Sa malisud nga mga panahon kita makaamgo nga kini nagtanyag sa iyang mga miyembro, ug sumpay sa tibuok Simbahan, unsay atong gikinahanglan sa pagtabang nato karon.”
Dinhi gipaambit nila ni Elder ug Sister Holland ang ilang mga hunahuna mahitungod sa Relief Society ug ang kalig-on nga moabut sa mga pamilya ug sa mga ward ug sa mga branch kon ang mga lider sa priesthood ug Relief Society magtinabangay.
Unsa ang tahas sa Relief Society sa pagpalig-on sa pagtuo ug sa mga pamilya?
Sister Holland: Ang Relief Society gikinahanglan labaw pa kay sa kaniadto tungod sa mga hagit nga atong giatubang sa kalibutan karon. Ang mga babaye sa Simbahan adunay mas dako nga panginahanglan nga mahimong matarung, sa pagpuyo nga suod sa Espiritu, ug sa magmatinud-anon. Ug ang mga babaye nagkinahanglan usab sa usag usa, aron sa pagpadayon ug pagpaluyo sa ilang pagtuo.
Elder Holland: Unsa ang gibuhat sa Relief Society mao ang pagtabang sa pagtudlo sa ebanghelyo sa talagsaong gamhanan nga paagi, uban sa espesyal nga tingog sa mga babaye. Ang Relief Society mao ang paagi sa pagdala sa mga doktrina sa ebanghelyo ug mga hiyas ngadto sa mga kinabuhi sa mga babaye. Hinumdumi, bisan pa niana, nga ang mga baruganan sa ebanghelyo wala magpili kon babaye ba o lalaki. Gugma, gugma nga putli, ug kalooy ingon man usab sa kalig-on, pagpangulo, ug determinasyon mao ang mga hiyas sa ebanghelyo ang tanan. Kinahanglan nga atong sagupon ang daghang mga hiyas kutob sa mahimo, mga lalaki ug sa mga babaye.
Ang kada usa nato nga nagpanaw subay sa dalan sa ebanghelyo usa ka indibidwal—nga anak nga babaye o anak nga lalaki sa Dios. Isip indibidwal nga mga miyembro, kinahanglan gayud nga kita lig-on kaayo. Walay organisasyon nga mahimong mas lig-on kay sa iyang mga tawo, walay panimalay nga mahimong mas lig-on kay sa iyang pundasyon.
Sister Holland: Kon ako maghunahuna sa tanang mga panalangin nga atong gisaw-an diha sa atong mga templo isip mga Santos sa Ulahing mga Adlaw, sa atong mga ward ug mga branch, sa atong mga kaminyoon, ug sa atong mga pamilya, ako nakaamgo nga kining tanan mobalik kon sa unsa nga paagi nagtambayayong ang mga lalaki ug mga babaye sa—priesthood ug Relief Society—diha sa panimalay ingon man usab sa Simbahan.
Elder Holland: Ang mga babaye mopauli gikan sa Relief Society kada semana ug mopaambit uban sa mga lalaki sa ilang mga kinabuhi unsa ang ilang nakat-unan. Ingon man usab, ang akong asawa ug mga anak nga babaye napanalanginan sa milabay nga mga katuigan sa panudlo sa priesthood nga nadawat ug giambitan nako ug sa among mga anak nga lalaki.
Sister Holland: Sa akong hunahuna mahimong ikasulti nga, hatagan sa mga hagit nga giatubang sa mga babaye ug mga pamilya, walay laing organisasyon sa kalibutan nga mas makatabang sa umaabut kay sa Relief Society. Kinahanglan kitang mohiusa sa mga babaye sa Simbahan sa ilang calling isip mga lider ug isip “mga kapitan” sa kaayohan sa mga anak, ilabi na karon nga atong makita ang mga pamilya nga nagkabungkag. Kinahanglan kitang magtambayayong, magtinabangay, aron mahuman ang trabaho.
Sa unsa nga paagi ang Relief Society nakapalig-on kaninyo ug sa inyong pamilya?
Sister Holland: Ang impluwensya sa Relief Society kanako nagsugod bisan wala pa ako matawo tungod kay ang akong mama ug lola nagserbisyo sa Releif Society. Sa dihang gamay pa akong bata, nakat-on ko gikan nila. Gusto kong mahimong sama kanila. Giistoryahan ko nila sa akong apohan sa tuhod nga si Elizabeth Schmutz Barlocker, kinsa nagserbisyo isip usa ka presidente sa Relief Society sulod sa 40 ka mga tuig. Iyang gihatag ang tanan, lakip na ang iyang kaugalingong pagkaon ug sinina, alang sa iyang igsoong mga babaye sa ebanghelyo. Siya adunay hugot nga pagtuo nga ang Dios manalipod ug manalangin kaniya niini nga serbisyo, ug gihimo Niya. Ang ehemplo niining tulo ka mga babaye ug sa ilang pagserbisyo diha sa Relief Society nakapadasig gihapon kanako karon.
Elder Holland: Wala ako makatambong og Relief Society, apan nagtubo ako uban niini nga naggiya sa akong kinabuhi. Ang akong mama nagserbisyo sa kapangulohan sa Relief Society sa among ward sa daghang katuigan sa tin-edyer pa ako. Usa kadto ka nindot kaayong butang nga talan-awon sa batan-ong lalaki. Sakto gayud nga kadto nga mga panalangin moabut gikan sa atong mga katigulangan ngari kanato ug manalangin sa atong mga anak ug sa atong mga apo.
Apan ang akong pagpamatuod sa Relief Society miabut usab gikan sa akong asawa. Mapasigarbuhon ako nga naminyo ngadto sa kanhi presidente sa Relief Society. Direkta akong napanalanginan tungod sa iyang debosyon. Nasayud ako nga sa dihang naminyo ako ni Patricia Terry buotan kaayo kaayo siya nga pagka babaye tungod kay nakita nako siya diha sa pagserbisyo sa Ginoo. Siya mibarug ug mipas-an sa responsibilidad sa gingharian. Alang kanako siya mas dako pa kay sa kinabuhi. Karon kadtong mga sumbanan ug mga hiyas mipanalangin sa among kaminyoon ug sa among mga anak. Busa, ang Relief Society mipanalangin ba kanako? Sigurado gayud!
Sa unsa nga paagi nga ang mga lider sa priesthood ug auxiliary magtambayayong sa pagpalig-on sa usa ka ward o branch?
Sister Holland: Ang Relief Society naorganisar subay sa sumbanan sa priesthood. Kini nagpakita sa usa ka maanindot nga panag-abay tali sa priesthood ug Relief Society ug nagpalig-on sa ideya nga gipanghingusgan sa mga lalaki ug mga babaye ang pagkamatarung sa duha. Ang mga lalaki nagkinahanglan sa mga panalangin sa mga babaye, ug ang mga babaye nagkinahanglan sa mga panalangin sa mga lalaki. Nakat-unan nato kana pag-ayo diha sa templo. Ang mga ward ug mga branch mas malig-on kon ang mga lider sa priesthood ug auxiliary magtambayayong. Nakita namo ang gahum sa mga miting sa ward council sa kada dapit nga among napuy-an.
Ang mga lalaki ug mga babaye mao ang kabahin sa lawas ni Kristo, ug pagkanindot nga nahisakop niana! Atong nakat-unan sa mga kasulatan nga “kon kamo dili magkahiusa kamo dili ako” (D&P 38:27) ug “ang mata dili makaingon sa kamot, wala ako magkinahanglan kanimo” (1 Corinthians 12:21).
Elder Holland: Sa kakomplikado sa mga isyu karon nga panahon, ang mga lider sa ward ug branch kinahanglang magtambayayong. Ang bishop mao ang adunay mga yawe sa priesthood sa pagpangulo sa ward. Ang miting sa ward o branch council mao ang dapit diin ang gikinahanglan nga pagsabut-sabut mahitabo. Ang mas maayo nga paglihok sa council, mao ang mas maayo nga paglihok sa Simbahan. Tinuod kini sa kada ward o branch.
Ang bishop makagamit sa miting sa ward council isip panahon diin siya ug ang ubang mga lider sa ward moanalisar sa mga panginahanglan sa ward. Aduna bay mga miyembro nga nagkinahanglan og temporal nga kaayohan? Ang usa ba ka batan-ong lalaki nangandam sa pagmisyon? Ang mga magtiayon nangandam ba sa pag-adto sa templo? Unsay atong mahimo isip ward council sa pagtabang?
Hinumdumi nga ang mga panginahanglan sa usa ka inahan dili malain gikan sa mga panginahanglan sa iyang mga anak ug sa iyang bana. Pinaagi sa mga visiting teacher, ang presidente sa Relief Society makakita sa mga panginahanglan sa tibuok pamilya ingon man usab niadtong indibidwal nga mga miyembro. Gamhanan kana nga kapanguhaan nga makuha gumikan sa ward council.
Sa unsa nga paagi nga ang Relief Society makatabang sa Simbahan nga matubag ang mga hagit sa ika-21 nga siglo?
Elder Holland: Ang karon nga ekonomikanhong katalagman nga milukop sa kalibutan miusab sa pinansyal nga kahimtang sa yuta. Apan ang pagtudlo sa mga baruganan sa kahupayan ug madaginuton nga pagpuyo sa kanunay nahimong kabahin sa Relief Society. Ang kalibutan tingali maghunahuna nga kinaraan na ang binotelya nga prutas o maghimo og mga hablon [quilt] sa ika-21 nga siglo. Gani karon adunay mga tawo nga gigutom ug gitugnaw. Alang kanila, ang pipila ka binotelya nga prutas ug mainit nga quilt sa tinuod pinadala sa Dios. Ang madaginuton nga pagpuyo dili gayud mawala sa uso. Dili kini pag-atras balik sa ika-19 nga siglo apan direksyon nga atong gikinahanglan sa pagpadayon samtang kita mopaingon sa ika-21. Ang sama nga mga kahanas ug mga ideya nga gibarugan kanunay sa Relief Society nakahupot sa daghang mga tubag sa mga hagit nga atong giatubang sa tibuok kalibutan.
“Ang Gugma nga Putli Dili Mapakyas” mao ang usa ka bandila nga diin ang tibuok pamilya sa katawhan magkahiusa. Dili kini programa—usa kini ka tingog sa ebanghelyo (tan-awa sa 1 Mga Taga-Corinto 14:8–10). Ang ebanghelyo dili gayud mapakyas, mao nga angay gayud nga ang “Gugma nga Putli Dili Gayud Mapakyas” mao ang motto sa Relief Society (1 Mga Taga-Corinto 13:8). Naglig-on kini sa kamatuoran nga ang mga lalaki ug mga babaye nga Santos sa Ulahing mga Adlaw naglihok ngadto sa samang tumong— nga naningkamot nga mahimong tinun-an ni Kristo.
Ug kon ang hangin mohuyop, ang hangin mohuyop. Kon moabut ang unos, moabut ang unos. Ang ebanghelyo mao ang kanunay nga tubag, bisan unsa pa nga pangutana. Mopatigbabaw kini kanunay. Kita natukod diha sa lig-on nga sukaranan nga mao si Jesukristo, ug ang Iyang lig-on nga sukaranan nga makapalahutay nato sa lisud nga mga panahon.
Sister Holland: Sa akong pagtuo sa mga kasingkasing sa mga babaye mao ang tinguha sa pagserbisyo sa uban nga nanginahanglan. Dili igsapayan kon ang usa ka babaye batan-on o tigulang, minyo o dili minyo. Ang Relief Society naghatag og hingpit nga oportunidad sa babaye sa pagserbisyo tungod kay adunay uban nga nanginahanglan kanunay. Ingon man usab, ang kada babaye usahay magkinahanglan nga alagaran. Sa tinuod ang “Ang Gugma nga Putli Dili Gayud Mapakyas” usa ka mahangturon nga baruganan nga adunay gamhanan nga mensahe diin mahimong sundon ni bisan kinsa.
Elder Holland: Hinumdumi nga ang serbisyo sa Relief Society dili limitado sa pagserbisyo sa mga miyembro sa Simbahan. Maningkamot kita sa pag-atiman sa atong kaugalingon, apan ang pagkainigsoonay sa Relief Society—ug ilabi na sa buhat sa kalooy—walay nahibaloan nga mga utlanan. Kana nagtabang nato nga makigsandurot sa pamilya nga silingan kinsa dili nato kauban sa tinuohan o moapil sa usa ka kalihokan sa pagtabang sa eskwelahan sa siyudad o sa pagtabang nga mapadayon ang kalimpyo, luwas nga kalikupan sa atong mga kasilinganan ug mga komunidad.
Unsa nga tahas ang dad-on sa Relief Society sa umaabut?
Sister Holland: Klaro kaayo, nga ang Relief Society adunay importante nga tahas sa umaabut. Magkangitngit ang kalibutan, mas mosanag ang kahayag sa ebanghelyo. Ang Relief Society mao ang yawe sa pagtudlo sa mga doktrina sa ebanghelyo sa atong mga igsoong mga babaye. Ang labing importante niadtong mga pagtulun-an mao nga ang Dios, ang atong Langitnong Amahan, mipadala sa Iyang Bugtong Anak, nga si Jesukristo, nganhi sa yuta. Ang Iyang Pag-ula, Pagkabanhaw, ug ehemplo nagtudlo nato nga magbaton og hugot nga pagtuo kaniya, maghinulsol, maghimo og mga pakigsaad, ug maghigugmaay sa usag usa. Si Jesukristo mao ang kahayag nga dili gayud mapakyas—ang masanag nga kahayag nga moiway sa kangitngit.
Elder Holland: Mateo 7:16 nag-ingon, “Maila ninyo sila pinaagi sa ilang mga bunga.” Sama pananglit, bisan kon ang among mga anak gagmay pa kaayo, sila makaila sa debosyon sa ilang inahan ngadto sa ebanghelyo ug ang tahas nga dad-on sa usa ka babaye niini. Kuyog sila pirme kaniya samtang siya miserbisyo sa mga igsoong babaye sa Releif Society. Usahay sila kinahanglang mag-ampo nga moandar ang among sakyanan. Nakita nila siya nga nagsul-ob sa karaan nga kupo nga naglakaw sa snow aron sa pag-atiman sa igsoong mga babaye sa Relief Society sa New England. Gagmay pa lamang sila, apan dili gayud sila makalimot niana. Ilang nakita ang sakripisyo ug pagkamatinud-anon sa ilang inahan, ug isip resulta ang among anak nga babaye usa ka babaye nga Santos sa Ulahing Adlaw nga mapasaligon gayud kaayo sa pagserbisyo, ug ang among mga anak nga lalaki adunay lawom nga pagtahud ug pagdayeg ug pasalig ug debosyon sa among mga umagad nga babaye. Klaro nga gikan sa ehemplo sa ilang inahan nga ang among mga anak nasayud sa importante, mahimayaon nga dapit sa mga babaye sa ilang mga kinabuhi ug sa gingharian sa Dios.
Ingon man usab, ang uban motan-aw sa ehemplo sa “mga bunga” sa mga kinabuhi sa mga Santos sa Ulahing mga Adlaw—sa mga bunga nga moabut samtang kita maningkamot nga mahimong mga tinun-an sa buhi nga Dios. Mao kini ang kahayag nga dili gayud mongitngit. Ang kaugmaon sa Relief Society mahayag tungod kay ang ebanghelyo mahayag. Ang kahayag sa gingharian sa Dios dili gayud moawop. Ug ingon nga ang tawo nagkinahanglan og kauswagan, ang tingog sa ebanghelyo mobagting nga tinuod. Sa atubangan niadtong nagdala niana nga mensahe ug nagsangkap sa ilang manggihinatagon nga amot mao ang matarung nga mga lalaki sa priesthood ug mga babaye sa Relief Society sa Simbahan.
Wala: gilitratohan ni Welden C. Andersen © IRI; mga paghulagway sa litrato pinaagi ni Matthew Reier ug Craig Dimond