Unsaon na lang ang Akong Propesyon?

David Hooson, London, England

Ang tanang butang nagsugod nga nindot kaayo. Nakagradwar ko sa Oxford University uban sa degree sa musika ug nakasugod og trabaho alang sa propesyonal nga orchestra sa Edinburgh, Scotland. Ang akong propesyon nagmalambuon, ug nakahigala ko og daghan.

Samtang nag-eskwela, nakahukom ko nga ipaulahi lang una ang pagserbisyo og full-time nga misyon. Karon ang ideya sa pagserbisyo layo na sa akong hunahuna. Nahadlok sa daghang mga butang, ilabi na ang kahadlok nga mahunong ang akong mga plano sa propesyon, nakapahunahuna nako nga ako walay labut ug ako dili na kinahanglan nga moserbisyo. Ang mga sakripisyo nga malakip hilabihan ka dako.

Buotang mga higala ug nindot nga mga kasinatian uban sa Espiritu, hinoon, nakapasugod sa pag-usab sa akong kasingkasing. Ang gugma sa usa ka maamumahon, mabinantayong bishop mitabang kanako nga makaangkon og mas lig-on, mas lawum nga pagpamatuod sa gipahiuli nga ebanghelyo. Sa wala madugay ako nasayud nga kinahanglan nakong modawat og usa ka call sa pagserbisyo. Wala koy ideya unsaon nako sa pagpabalik sa akong propesyon sa usa ka palibut nga daghan og kakompetinsya [competitive environment] human sa duha ka tuig nga paghunong, apan ako misalig nga ang Ginoo mopanalangin kanako sa akong desisyon. Mibiya ko sa akong trabaho nga wala masayud sa unsang paagi mamaayo ang mga butang.

Gitawag ko sa pagserbisyo sa West Indies Mission, ang pinulongan French. Ang mga hagit lisud, apan ako naganahan kaayo nga nagserbisyo sa mga tawo ug nakakita nga nausab ang ilang kinabuhi. Atol adtong duha ka tuig naka-focus ra gyud ko sa pagtinguha sa kabubut-on sa akong Amahan sa Langit. Ang pagserbisyo sa uban nga walay paghunahuna sa kaugalingon nakahatag kanako og hingpit nga kalipay nga akong nasinati sukad.

Sa akong pagpauli, akong nalantawan ang kalibutan sa bag-ong mga prayoridad ug mga mithi, ug nagtinguha ko nga ipabilin ang akong kinabuhi nga nakasentro sa ebanghelyo ni Jesukristo. Diha-diha dayon ako nangita og trabaho, apan gamay ra ang oportunidad. Human sa sunod-sunod nga dili malampusong mga interbyu sa panarbaho, ako nakaamgo nga ang akong duha ka tuig sa field nga walay kalabutan sa trabaho nakapaatras sa daghang potensyal nga mga employer. Ang akong misyon makapawala ba sa bili sa akong propesyon?

Mapasalamaton ko nga ang tubag kay dili. Hapit tulo ka bulan human niadto nakakita ko og bakanteng trabaho nga angay gyud para nako. Anaa kanako ang tukma gyud nga kahanas alang sa klase sa trabaho nga gikinahanglan. Dili lang kana, ang mga aplikante sa trabaho gikinahanglan nga maayong mosulti og French! Ang akong misyon miabli sa pultahan alang niini nga oportunidad. Human sa tulo ka interbyu gitanyag sa akoa ang trabaho. Ang akong propesyon mas milambo pag-ayo kaysa wala pa unta ko miserbisyo. Nabati nako ang kalooy ug gugma sa Ginoo. Nasayud ko nga Siya nag-andam og mga panalangin alang kanato kon atong buhaton ang atong bahin.

Ang gitudlo ni Propeta Joseph Smith tinuod: “Kita magmalipayon sa pagbuhat sa tanan nga mga butang nga ubos sa atong gahum; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton ipadayag” (D&P 123:17).

Human sa sunod-sunod nga dili malampusong mga interbyu sa panarbaho, ako nakaamgo nga ang akong duha ka tuig sa field nga walay kalabutan sa trabaho nakapaatras sa daghang potensyal nga mga employer.