Ngano nga may mga Handbook?

Samtang gipaila sa mga lider sa Simbahan ang duha ka bag-ong mga handbook ug mitabang sa pagpasabut kon unsaon sa pagpatuman ang mga lagda niana atol sa duha ka bag-ong tibuok kalibutan nga mga miting sa pagbansay sa pagpangulo, gitubag usab nila ang pangutana: ngano nga importante ang mga handbook?

Lakip sa daghang mga paagi sa mga handbook sa Simbahan nga mahimong panalangin mao ang: (1) pagpatunhay sa integridad nga pamaagi panahon sa paspas nga pagtubo, (2) pagpaminus sa kabudlay sa Unang Kapangulohan, ug (3) paghatag og kasayon sa mga pagpadayag diha sa lokal nga administrasyon.

Integridad ug Pagtubo

Ang mga handbook nagtabang sa pagpatunhay sa integridad sa mga lagda, mga pamaagi, ug mga programa sa simbahan nga nagsinati og paspas nga pagtubo sa tibuok kalibutan.

“Ang atong mga miyembro nagkadaghan sukad naorganisar ang Simbahan niadtong 1830. Ug magpadayon kini sa pagtubo uban sa liboan ka mga yunit sa tibuok kalibutan,” miingon si Presidente Thomas S. Monson atol sa Nobyembre 2010 nga tibuok kalibutan nga miting sa pagbansay sa pagpangulo. “Hapit imposible ang pagpabilin sa integridad sa mga lagda, mga pamaagi, ug mga programa sa Simbahan kon wala kini nga mga handbook.”

Ang Kahago sa Unang Kapangulohan

Ang mga handbook makatabang sa pagpaminus sa makapupos og panahon nga kahago sa Unang Kapangulohan sa pagtubag sa pamaagi sa mga pangutana ug pagtul-id sa mga sayop nga pamaagi.

“Samtang kami sa Unang Kapangulohan magmiting sa among regular nga mga sesyon matag adlaw sa semana, kami gayud, kinahanglan nga moasikaso ug mokorihir sa mga sayop,” miingon si Presidente Monson. “Kadaghanan niining mga sayop mahimong malikayan kon … ang mga lider suhito sa mga handbook ug mosunod sa mga lagda ug mga pamaagi nga nalatid diha.”

Si Presidente Monson miingon nga usahay ang maayo og katuyoan nga mga lider kinsa wala masuhito sa mga lagda ug mga pamaagi sa Simbahan makahimo og mga desisyon nga mosangput sa malagmit nga kadautan tungod sa mga pagtipas gikan sa mga programa sa Simbahan.

“Bisan og kamo dugay na kaayo nga namiyembro sa Simbahan o usa ka bag-ohay lang nga namiyembro, konsultaha ang handbook kon dili kamo sigurado bahin sa usa ka lagda o pamaagi,” miingon si Presidente Monson. “Adunay kasiguroan sa pagsunod sa mga handbook.”

Pagpasayon sa Pagpadayag

Ang mga handbook makatabang nga mahimong sayon ang pagpadayag samtang ang lokal nga mga lider magtinguha sa giya sa Espiritu diha sa pagdumala sa mga buluhaton sa Simbahan.

“Kon ang mga lider sa Simbahan masayud sa ilang mga katungdanan ug mosunod sa gitakda nga mga pamaagi, nagdapit sila sa Espiritu Santo sa pagdasig kanila ug sa mga tawo nga ilang gialagaran,” miingon si Elder Quentin L. Cook sa Korum sa Napulog Duha ka mga Apostoles sa Nobyembre 2010 nga miting.

Si Brother David M. McConkie, unang magtatambag sa kinatibuk-ang kapangulohan sa Sunday School, mihulagway sa kamahinungdanon sa mga handbook sa miaging Oktubre 2010 nga kinatibuk-ang komperensya.

Samtang gibansay isip bag-o nga presidente sa stake pinaagi sa usa ka Area Seventy, si Brother McConkie nangutana og sunod-sunod nga mga pangutana nga sa iyang kadismaya, ang tanan natubag diha sa mga handbook.

“Wala na ako mamasin sa pagpangutana og bisan unsang dugang nga mga pangutana. Akong gihunahuna nga mas maayo pang mobasa sa handbook,” miingon si Brother McConkie. “Supak kini sa lagda sa langit alang sa Ginoo sa pagbalikbalik diha sa matag usa kanato sa indibidwal nga paagi ang unsay Iya na nga gipadayag kanato sa tiningob nga paagi” (“Pagkat-on ug Pagtudlo sa Ebanghelyo,” Liahona ug Ensign, Nob. 2010, 13).

Sa pagpangita sa video, text, ug ang audio sa Nobyembre 2010 ug Pebrero 2011 nga tibuok kalibutan nga mga miting sa pagbansay sa pagpangulo diha sa 40 ka mga pinulongan, bisitaha ang Serving in the Church section sa LDS.org.

Ang mga lider sa Simbahan kinsa sinati na ug mosunod sa mga handbook nagdapit sa paggiya sa Espiritu Santo aron sa pagdasig kanila.

Gilitratohan ni Welden C. Andersen