Home Teaching ug Visiting Teaching: Usa ka Buhat sa Pagpangalagad

Bag-o pa lang sa home o visiting teaching? Ikonsiderar kining siyam ka mga sugyot.

“Nasayud ko nga katapusan na karon sa bulan, ug pasayloa ko nga kami wala makahigayon sa paghisgut sa Mensahe sa Visiting Teaching,” miingon ang visiting teacher ni Sister Julie B. Beck. Gani sa iyang pagsulti niining pahayag, siya mibiya sa balay sa presidente sa kinatibuk-ang Relief Society uban sa usa ka basket nga plantsahunon ug mibalik kang Sister Beck. “Sa imong hunahuna mahimo pa ni namong iapil?” siya nagduha-duha og pangutana ni Sister Beck.

Sa dihang si Sister Beck mohinumdom niini nga panghitabo, maglugmaw sa luha ang iyang mga mata samtang siya mangutana, “Sa unsang paagi nga kining buotang higala ug mapahinungoron nga visiting teacher mibati nga ako wala pa mabisitahi ug maamumahi? Kini dili mao ang unang higayon nga siya mibisita aron sa pag-asikaso sa panginahanglan nianang bulana. Nganong wala siya makaamgo nga siya kanunayng nangalagad kanako ug nagpanalangin sa akong pamilya? Ang iyang pag-atiman ug kabalaka alang kanako mao ang pinaka ehemplo sa visiting teaching. Dayag lang, siya maka-report nga ako nabisitahan!”

Sama sa kasinatian nga gihulagway ni Sister Beck, ang dinasig nga visiting ug home teaching labaw pa kaysa pormal nga pagbisita ug dili sa kanunay kompleto. Ang home ug visiting teaching kabahin sa pag-amuma sa mga tawo labaw pa kaysa pagkompleto sa proseso, ug kon saktong pagkahimo, kini nagrepresentar sa pag-amuma ug dili pag-ihap. Kining mga buluhaton makasangkap og pag-amuma ug pagpangalagad ngadto sa usag usa sama sa pagpangalagad sa Manluluwas. Ania ang pipila ka mga ideya nga makatabang kaninyo:

Pag-ila kon si kinsa ang gi assigned kaninyo nga bisitahan ug si kinsa ang inyong kauban. Ang mga lider sa priesthood o Relief Society sa inyong ward o branch kinahanglang mohatag kaninyo sa ngalan ug impormasyon sa pagkontak sa kada pamilya o indibidwal nga gi-assigned kaninyo sa pagbisita. Ipaila-ila ang inyong kaugalingon ngadto sa inyong kauban ug sa mga tawo nga inyong bisitahan ug pagsugod sa pagtukod og relasyon.
Pagbisita. Pakigkita sa tawo ngadto sa iyang balay kon mahimo. Kon kana dili mahimo, mahimo ninyong ikonsiderar nga magkita duol sa trabahoan sa tawo, kauban nga maglakaw, o pagtapok sa dili pa magsugod o inigkahuman sa mga miting sa Dominggo. Pagtudlo ug pagdasig sa usag usa—tingali sugdi uban sa Mensahe sa Unang Kapangulohan o Visiting Teaching. Ipakigbahin ang inyong pagpamatuod. Ipakigbahin kon unsa ang nahitabo sa imong kinabuhi. Pagpalambo og paghigugma pinaagi sa pagkamahigalaon ug pagkamaamumahon. Sinsero nga maminaw. Padayona ang mga pagsalig nga gisalig sa uban nganha kaninyo. Padayona ang pakighigala, ingon nga sa kasagaran ang panahon makadala ngadto sa mas dako nga pagsalig.
Pag-ampo uban ug alang niadtong inyong gitudloan. Kini mahimong angay nga mohangyo inig tapos sa inyong pagbisita, “Makaampo ba mi uban kaninyo?” Ang pangulo sa panimalay maoy mopili kon si kinsa ang mag-ampo. Sa mga adlaw ug mga semana tali sa mga pagbisita, padayon sa pag-ampo alang niadtong inyong gi-home teach o gibisitahan. Hangyoa ang Langitnong Amahan og tabang aron masayud kon sa unsang paagi sila bantayan ug higugmaon.
Pagpangalagad. Pagbantay ug paghunahuna daan sa mga panginahanglanon. Pananglitan, kon ang sister nga inyong gibisitahan adunay umaabut nga eksamin sa eskwelahan, tingali makaluto kamo og panihapon niana nga semana aron siya adunay mas daghang panahon sa pagtuon. Kon ang brother nga inyong gi-home teach nangita og trabaho, ipaila-ila siya ngadto sa mga tawo nga mahimong makatabang.
Pangutana og makatabang nga mga pangutana. Ang mga pangutana modala ngadto sa mga oportunidad sa paghupay, pagpakigbahin nga adunay kalabutan nga mga baruganan sa ebanghelyo, ug paghatag og makahuluganong pagserbisyo. Mahimo kamong mangutana: “Unsa ang nakapabalaka kaninyo?” “Unsay mga pangutana ninyo kabahin sa ebanghelyo?” O kamo mahimong piho: “Makatabang ba mi kaninyo sa buluhaton sa balay?” “Ganahan ba mo nga ihatud ngadto sa tindahan o sa usa ka appointment sa doktor?” Ang mga pangutana makahimo og mas maayong mga resulta kaysa yanong mosulti, “Tawagi mi kon kamo nagkinahanglan og bisan unsang butang.”
Pagtinguha og inspirasyon. Ang Espiritu makatabang kaninyo kon unsaon sa pagtabang niadtong gi-assigned kaninyo nga tudloan. Kamo mahimong madasig og mga hilisgutan nga hisgutan o tabang nga ikatanyag. Samtang inyo silang ilia-ilahon og maayo, kamo madasig sa pag-awhag niadtong inyong gibisitahan nga sila padayong modawat sa mga ordinansa ug mga pakigsaad sa ebanghelyo o sa pagpadayon og apil sa tanang mga panalangin nga matanyag sa ebanghelyo.
Pag-report sa ensaktong impormasyon. I-report ang temporal ug espiritwal nga kaayohan niadtong inyong gibisitahan, bisan unsa nga serbisyo nga inyong nabuhat, ug bisan unsa nga mga panginahanglan. I-report ang kompidensyal nga mga butang diretso sa presidente sa Relief Society o sa korum.
Pagpakigsabut sa inyong kauban. Uban sa inyong pares, tungaa ang mga buluhaton kon gikinahanglan aron sa pagkontak ug sa pag-amuma. Tingali kinahanglan kamo nga magpuli-puli sa pagbisita, paghatag og serbisyo, ug pag-report sa kahimtang niadtong inyong gitudloan.
Paghinumdom. Hinumdumi ang importanting mga panghitabo sa kinabuhi niadtong inyong gitudloan, sama sa mga adlaw nga natawhan ug gani sa matag adlaw nga mga panghitabo nga mahimong importante ngadto kanila.

Ang Inyong Pagtuo Motubo

“Nakadawat ko og tawag sa telepono gikan sa usa ka nabalaka kaayo nga inahan sa usa ka estado nga layo gikan sa akong gipuy-an. Siya miingon kanako nga ang iyang wala maminyo nga anak nga babaye mibalhin ngadto sa laing siyudad nga layo sa iyang balay. Iyang nabati gikan sa mubo nga panag-istoryahanay sa iyang anak nga babaye nga adunay mahitabo nga dili gyud maayo. Ang inahan nabalaka sa moral nga kaluwasan sa iyang anak nga babaye. Siya mihangyo kanako sa pagtabang sa iyang anak nga babaye.

“Akong nahibaloan kon si kinsa ang home teacher sa iyang anak nga babaye. Gitawagan nako siya. Siya batan-on pa. Ug gani siya ug ang iyang kauban nakamata nianang gabhiona nga wala lamang nabalaka alang sa babaye apan uban sa pasidaan nga siya hapit na mohimo og mga pagpili nga makadala og kaguol ug kaalaut. Uban lang sa inpirasyon sa Espiritu, sila mibisita kaniya. Siya sa sinugdanan dili unta mosulti kanila kabahin sa iyang sitwasyon. Sila mihangyo kaniya sa paghinulsol ug sa pagpili sa pagsunod sa dalan nga giandam sa Ginoo alang kaniya ug sa gitudlo kaniya sa iyang amahan ug inahan nga iyang sundon. Siya nakaamgo samtang siya naminaw nga ang bugtong paagi nga sila makahibalo kabahin sa iyang kinabuhi gikan lang sa Dios. Ang pag-ampo sa usa ka inahan gidungog sa Langitnong Amahan, ug ang Espiritu Santo gipadala ngadto sa mga home teacher uban sa usa ka buluhaton.

“… Ang inyong hugot nga pagtuo motubo samtang kamo moserbisyo sa Ginoo sa pag-amuma sa mga anak sa Langitnong Amahan isip magtutudlo sa Ginoo sa ilang panimalay. Ang inyong mga pag-ampo pagatubagon. Inyo mismo mahibaloan nga Siya buhi, nga Siya naghigugma kanato, ug Siya naghatag og inspirasyon niadtong bag-o lang gyud nga nagsugod sa pagtuo Kaniya ug uban sa tinguha sa pagserbisyo Kaniya sa Iyang Simbahan.”

Presidente Henry B. Eyring, Unang Magtatambag sa Unang Kapangulohan, “Gifts of the Spirit for Hard Times” (Church Educational System fireside alang sa mga young adult, Sept. 10, 2006), lds.org/broadcast.

Mga Higala sa Dili Madugay

Sa dihang mibiya ko sa balay aron pagtuon sa gawas sa nasud ngadto sa France, ang visiting teaching nakahatag og bag-ong kahulugan. Ang mga sister nga gi-assign nakong bisitahan wala magpabilin nga mga ngalan lamang ingon man mga dagway nga dili kaayo mahinumduman; apan sila nahimong mga higala nga duol gayud sa akong kasingkasing. Daghang mga higayon nga ako natandog sa Espiritu Santo sa piho nga mga higayon aron sa pag-ampo ug usahay sa pagpuasa alang kanila o sa pagtawag, paghupay, pagpaminaw, pagsulat, pagbisita, o bisan paggakos lang kanila. Kining gagmay nga mga panglihok-lihok nakahimo og kalainan sa ilang kinabuhi, ug kini nakahimo usab og kalainan sa akoa.

Tanang mga sister managlahi. Ang uban kapareha nako og edad; ang uban kay mas edaran. Ang uban mga batan-on, minyo nga mga inahan; ang uban walay bana. Ang among mga pagbisita nakahimo kanamo sa paglantaw lapas pa sa among panaglahi.

Bag-ohay lang mibalhin ko og bag-ong lungsod. Nagmaya ang akong kasingkasing sa dihang nakadawat ko og assignment sa pagbisita og pipila ka mga sister. Karon sila mga ngalan lamang. Ugma damlag sila mahimong mga higala.

Nirina J-Randriamiharisoa, Madagascar

Ang Kadasig sa Pagtudlo sa Ebanghelyo

Ang akong kauban sa home teaching ug ako mibisita og tigulang nga magtiayon. Niuli na ko sa akong misyon mga pipila pa lang ka semana ang milabay, apan nagsugod nako sa pagkalimot sa pagbati sa pagtudlo sa ebanghelyo. Apan kadto nga pagbisita ug ang among gitudlo nga leksyon nakapabalik sa kadasig. Ang Espiritu nakapadasig kaayo sa akong kasingkasing, ug ang ako lang nahimo mao ang pagpahiyum ug pagpugong sa akong mga luha.

Ang home teaching importante sa mga young adult tungod kay kitang tanan, bisan unsa man ang atong mga kahimtang, kinahanglang malig-on pinaagi sa Espiritu. Ang bira sa kalibutan kusog kaayo, ug ang pagtudlo sa gipahiuli nga ebanghelyo mao ang usa sa labing maayo nga mga paagi sa paglikay nga masalaag ngadto sa kuyaw nga mga dalan.

Ramon Kaspers, Netherlands

Ang Kalipay sa Ginoo

Nakaatubang ko og mga hagit, ug kon ang mga butang dili mahitabo sama sa akong gusto, sayon ra ang pagreklamo. Apan ang akong panglantaw nausab sa dihang ang akong kauban ug ako na-assigned sa pag-home teach og usa ka pamilya kinsa wala na magsimba sa dugay na nga panahon.

Atol sa usa ka pagbisita, nakaamgo ko nga ang mga hagit niining pamilya nakahimo sa akong problema nga mora og usa ka tulo sa ulan sa kadagatan. Ang ilang pagsimba mora og lisud nga mahitabo, apan ang akong kauban ug ako nagpadayon sa pagbisita kanila.

Usa ka buntag sa Dominggo sa wala pa ang sakrament miting, mibati ko nga mobarug sa pultahan. Sa akong dako nga katingala, nakita ko kining pamilya nga misulod sa simbahan! Ang mga pulong dili makapasabut sa hingpit nga kalipay nga akong nabati. Ang akong mga hagit nabuntog diha sa hingpit nga kalipay ni Kristo (tan-wa sa Alma 31:38).

Rati Mogotsi, South Africa

Mga paghulagway sa litrato pinaagi nila ni Robert Casey, Craig Dimond, John Luke, ug Jerry Garns

Mga paghulagway sa litrato pinaagi nila ni Craig Dimond, Matthew Reier, Danny Soleta, Welden C. Andersen, ug Jerry Garns; litrato ni Sister Allred pinaagi sa Busath Photography