Ang Operasyon ni Eli
“Silang tanan kinsa modawat niini nga pagkapari modawat kanako, miingon ang Ginoo ” (D&P 84:35).
Si Eli nagtan-aw sa nagtipun-og nga homework nga gihapit sa iyang higala human sa klase. Si Eli wala makatungha og laing semana sa eskwelahan tungod sa impeksyon sa dunggan.
Nianang gabhiona ang mga ginikanan ni Eli misulod sa iyang kwarto. Ang iyang mama milingkod sa kilid sa kama ni Eli ug migunit sa iyang kamot. “Eli, ang doktor naghunahuna nga nagkinahanglan ka og operasyon,” siya miingon.
“Unsa nga klase sa operasyon?”
“Gusto niyang butangan og mga tubo ang imong dunggan aron dili mosamot ang impeksyon,” miingon si Mama. “Dili kini sakit, ug makagawas na ka sa ospital sa usa lang ka adlaw.” Iyang gipig-it ang kamot ni Eli.
Si Eli misalig sa iyang mga ginikanan. Apan ang ideya nga adunay operasyon nakahadlok kaniya. Siya naghunahuna sa istorya nga iyang nadungog sa Primary kabahin ni Joseph Smith. Sa dihang si Joseph syete anyos pa lang, ang bukog sa iyang paa naimpeksyon. Ang impeksyon migrabe hangtud ang doktor midesisyon nga kinahanglan niyang tangtangon ang usa ka bahin sa bukog o mahimong maputol ang paa ni Joseph o gani mamatay.
Sa panahon ni Joseph Smith, ang mga doktor mohatag og bino aron makatabang nga dili kaayo mabati ang sakit atol sa operasyon, apan si Joseph mibalibad sa bino nga gisugyot sa doktor nga iyang imnon. Ug siya mibalibad nga ihigot sa kama. Siya miingon nga kon gunitan siya sa iyang papa, dili siya molihok. Ang amahan ni Joseph hugot nga migunit kaniya diha sa iyang mga bukton sa tibuok sakit kaayo nga operasyon. Ang operasyon nagmalampuson, ug si Joseph naayo.
Si Eli naghunahuna kabahin sa kaisug ni Joseph ug sa iyang pagsalig sa iyang amahan. “Mahimo ba nga imo kong panalanginan, Pa?” siya mihangyo. Si Eli nasayud nga ang priesthood nga panalangin makatabang kaniya. Sa sinugdanan sa tuig sa ting-eskwela, ang papa ni Eli nakahatag kaniya og panalangin.
“Kana nindot kaayo nga ideya,” miingon ang iyang papa.
Ang inahan ni Eli mikyugpos sa iyang mga bukton ug miduko sa iyang ulo. Nabati ni Eli ang mga kamot sa iyang amahan diha sa iyang ulo. Ang tingog sa iyang amahan nakahatag og mas lig-ong pagsalig samtang iyang gipanalanginan si Eli nga siya dili mahadlok ug siya hingpit nga maayo.
Sa pagtapos sa panalangin, si Eli wala na mahadlok. “Mahimo nakong operahan karon,” siya miingon.
Tulo ka adlaw ang milabay siya miadto sa ospital ug miuli na sa balay pagkasunod adlaw. Ang mga impeksyon sa dunggan nawala na, ug dali-dali nga gibuhat ni Eli ang mga buluhaton sa eskwelahan nga wala niya mabuhat.
Si Eli mapasalamaton nga siya usa ka miyembro sa Ang Simbahan ni Jesukristo sa mga Santos sa Ulahing mga Adlaw ug siya napanalanginan pinaagi sa priesthood.◼
Mga paghulagway pinaagi ni Dilleen Marsh