Sa Katapusan Akong Nakaplagan ang Simbahan

Barbara De Giglio, Lombardy, Italy

Sa kasagaran sa akong kinabuhi ako mibati og kahaw-ang ug nangandoy nga adunay kadangpan nga lig-on. Natahap ako nga unsay akong gipangita basin og makit-an sa usa ka simbahan, mao nga gikan sa panahon nga ako bata pa kaayo, nag-imbestigar ko og ubay-ubay nga mga relihiyon ug mga pilosopiya. Kadaghanan niini mga maayo ug puno sa buotan nga mga tawo. Pipila kanila kahibugngan ug wala makahatag unsay akong gipangita.

Human sa daghang mga tuig sa pagpangita, gilaay ko ug nawad-an og paglaum, mao nga miundang ko. Determinado ko nga mohimo og relasyon sa Dios sa akong kaugalingon ug magpalayo gikan sa organisado nga relihiyon.

Human ako makahimo niini nga desisyon, nagtan-aw ko og programa sa telebisyon nga nag-focus sa pagkaespirituhanon. Ang tagdumala sa programa nag-interbyu sa usa ka pamilya nga Santos sa Ulahing mga Adlaw. Samtang ako naminaw niini nga pamilya, akong gibati ang gugma ug ang lig-on nga pagtuo nga dugay na nakong gipangita. Nadasig usab ako nga nakahibalo nga ang mga Santos sa Ulahing mga Adlaw naghatag og gibug-aton sa pamilya. Tingali moimbestigar ko og usa pa ka simbahan.

Sa ubos sa screen sa telebisyon mao ang numero sa telepono sa Ang Simbahan ni Jesukristo sa mga Santos sa Ulahing mga Adlaw. Gitawag nako kini ug nakaistorya sa pila ka mga miyembro sa stake center, kinsa nakigsabut sa mga misyonaryo sa pagtawag kanako.

Busy kaayo ko niining higayona, mao nga sa dihang ang mga misyonaryo nanawag aron makigsabut, mihangyo ko nga kon mahimo ba nga motawag lang ko nila og balik sulod sa pipila ka semana pagkahuman nga mahiluna ang mga butang. Miuyon sila ug mihatag nako sa numero sa telepono sa lokal nga president sa Relief Society, kinsa mitawag ug miimbitar nako sa pagsimba sa Dominggo. Miadto ko, ug nakagusto ko sa tanan didto: Sa mga leksyon, sa mga tawo, ug sa espiritu. Mibiya ko nga malipayon kaayo.

Misimba ko kada Dominggo sa misunod nga duha ka bulan. Dayon, niadtong Oktubre 2008, nabunyagan ko. Ang akong pagpangita wala lamang matapos; nakompleto kini. Wala nako mobati sa kauhaw ug kahigwaos nga akong gibati kaniadto.

Mapasalamaton gayud ako pag-ayo nga nakakaplag sa kamatuoran, apan sa laing bahin naguol ko nga milungtad og dugay nga ako nakakaplag sa ebanghelyo ni Jesukristo. Hinoon, malipayon ako sa akong mga kasinatian sa panahon sa akong pagsiksik. Tungod kay ako nangita sa daghan kaayong mga dapit, akong gibati ang dugang nga katagbawan nga nakahibalo nga ako nakakaplag sa ensakto nga dapit ang dapit diin ako nahisakop.

Determinado na ako nga magpalayo gikan sa organisado nga relihiyon. Apan pagkahuman nga ako nakahimo niini nga desisyon, ako nakakita sa usa ka pamilya nga Santos sa Ulahing mga Adlaw nga gi-interbyu sa telebisyon.