Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Nahimulag tungod sa Baha, Nahiusa pinaagi sa Pag-ampo,” pahina 14: Human sa pagbasa sa artikulo, mahimo nga hatagan nimo og gibug-aton ang mga baruganan sa pag-ampo pinaagi sa pagdungan og basa sa Alma 34:18–27. Dapita ang mga sakop sa pamilya sa pagpakigbahin sa mga kasinatian sa dihang ang ilang mga pag-ampo gitubag.

“The Healer’s Art,” pahina 18: Human mabasa ug mahisgutan ang mga seksyon sa artikulo, mahimo nga dapiton ninyo ang inyong pamilya sa pagkanta sa “Lord, I Would Follow Thee” (Mga himno, nu. 220). Isip usa ka pamilya, paghisgot og positibo nga mga paagi nga buhaton ninyo kon may usa ka tawo nga makapalagot kaninyo. Hisguti kon sa unsang paagi ang pagsinabtanay ug paggamit sa Pag-ula diha sa inyong kinabuhi “makaayo sa samaran nga mga kasingkasing, pagka-walay pagsinabtanay, ug kayugot.”

“Pagtudlo sa Doktrina kabahin sa Pamilya,” pahina 32: Samtang makigbahin sa mensahe ni Julie B. Beck, dapita ang mga sakop sa pamilya aron hisgutan ang kamahinungdanon sa doktrina kabahin sa pamilya. Hisguti ang mga hulga diha sa pamilya ug sa unsang paagi kini mabuntog pinaagi sa hugot nga pagtuo. Tabangi nga masulbad ang bisan unsang kabalaka o pagduhaduha nga tingali anaa sa inyong mga anak mahitungod sa pagsugod og ilang kaugalingong mga pamilya sa ensaktong panahon.

“Count Your Blessings,” pahina 62: Sa dili pa basahon kini nga artikulo isip usa ka pamilya, pagbutang og mga butang palibut sa kwarto nga mopahinumdom kaninyo sa inyong mga panalangin. Kini mahimong maglakip sa sinina, pagkaon, mga kasulatan, art sa Manluluwas, mga litrato sa inyong pamilya, ug uban pa. Dapita ang inyong pamilya sa pagtan-aw niini nga “mga panalangin” ug ipakigbahin kon nganong sila mapasalamaton tungod niini. Mahimong dapiton ninyo ang mga sakop sa pamilya nga ilista ang mga butang nga sila mapasalamaton ug isugyot nga ribyuhon nila ang lista matag karon ug unya.

Family Home Evening nga Layo sa Panimalay

Tulo sa akong mga anak karon nag-eskwela nga layo sa among panimalay, mao nga among gipakigbahin ang family home evening pinaagi sa Internet. Nagpadala ako nila og mga e-mail nagsulti kanila mahitungod sa espirituhanon nga mga kasinatian nga among naangkon sa panimalay ug sa mga leksyon nga among gipakigbahin gikan sa Liahona o sa mga kasulatan —ilabi na sa Basahon ni Mormon. Kon molabay ang semana ug malimot ko sa pagsulat, silang tanan moingon, “Ma! Palihug! Gimingaw kami sa family home evening.” Pinaagi sa pagpakigbahin uban kanamo niining paagiha, nakahimo sila sa paglig-on kanamo bisan tuod kon sa pisikal wala sila dinhi .

Nagtuo ako nga ang family home evening usa ka dinasig nga programa tungod kay nakatabang namo kini sa pagtukod og pundasyon diha sa solido nga bato sa atong Manluluwas, si Jesukristo. Ang Family home evening nakatabang usab kanamo nga makab-ut ang gusto sa Ginoo alang kanamo —nga kami mahimong usa ka pamilya nga mag-uban sa kahangturan.

Norma Leticia Treviño de Taylor, Nuevo León, Mexico