Ang Pagpugas og mga Binhi sa Kaugalingon nga Pagpaningkamot diha sa Gagmayng mga Luna
Daghang mga miyembro sa Simbahan ang nagpuyo sa mga apartment o gagmayng mga balay nga walay luna sa nataran aron ka tanuman. Ang uban nagpuyo sa uga nga mga rehiyon diin ang yuta walay tanom. Ang pipila mobati nga sila walay higayon o pinansyal nga mga tinubdan aron magpatubo og ilang kaugalingong pagkaon. Hinoon uban sa hugot nga pagtuo, kakugi, pailub, ug gamay nga pagka-mamugnaon, ang bisan kinsa mahimong molampus sa pagpananom.
Samtang ang mga miyembro mainampoon nga nagkonsiderar sa tambag nga mananom ug mangita og mga paagi nga magmasulundon niini nga baruganan, sila mahibulong na lang sa mga solusyon nga ilang makaplagan. Aniay pipila ka mga kasinatian ug tambag gikan sa mga miyembro kinsa misunod sa tambag nga mananom.
Ang Pagpananom diha sa Gagmayng Luna
Samtang nagpuyo sa usa ka gamay nga townhouse apartment, si Noelle Campbell, sa Houston, Texas, USA, nakakaplag nga hapit tanang mga materyal nga gikinahanglan niya sa pagpananom anaa ra gayud sa iyang kaugalingong panimalay. Sa iyang balkonahe, nagsugod siya sa pagpananom og mga utanon diha sa biya na nga mga sudlanan —sa bisan unsang butang gikan sa mga sudlanan sa sabong panglaba ngadto sa kitty litter nga mga balde.
Nahimuot siya sa gidaghanon sa pagkaon nga iyang mahimo diha sa gagmayng mga sudlanan. Dayon iyang gipalapdan ang iyang garden, sa gihapon naggamit sa mga materyal nga nakolekta gikan sa iyang panimalay. Daan nga mga butanganan sa libro ug mga bin nahimong nagbitay nga garden. Ang bayanan sa daan nga may igong gidak-on nga trampoline gigamit na karon aron makatayan sa mga batong, pareholes ug ubang mokatay nga mga tanom. Gigamit pa gani niya ang daang mga kabilya sa barbekyuhanan aron dili molaylay ang iyang tamates.
“Ganahan ako sa hagit nga pagpananom diha sa mga sudlanan, sa pagsud-ong sa akong balkonahe nga nausab gikan sa gamay nga 8-ka pye por 8-ka pye (2.5 m por 2.5 m) nga sementadong papan ngadto sa usa ka berde, buhi, nga may produkto nga garden,” miingon si Noelle.
Ang Paggamit sa mga Sudlanan
Didto sa Alberta, Canada, si Shirley Martin nasayud gikan sa kasinatian nga kamo makahimo sa pagpatubo og bisan unsang matang sa tanom diha sa usa ka sudlanan nga sama ka yano sa ginamit na nga mga botilya sa soda o juice. Siya miingon nga ang yawe sa malampuson nga pagpananom diha sa sudlanan mao ang may igong kahayag, bisan gani kon gikan lamang sa bintana o suga nga gidesinyo aron mopasiugda sa pagtubo og tanom, ug bu-boan kanunay og tubig, tungod kay ang sudlanan dali ra kaayo nga mauga kay sa usa ka garden.
“Niining tuiga,” miingon si Shirley, “Magtanom ko og kusina nga garden diha sa pipila ka mga kaldero sa akong deck nga kompleto sa pipila ka mga hilbas, litsugas, tamatis, sibuyas, chives, ug sili. Ang inyong imahinasyon makahimo niini.
Pagkat-on pinaagi sa Pagbuhat
Si Kwan Wah Kam sa Hong Kong unang midesider nga mananom aron madugangan ang iyang home storage. Wala pa gayud siya makasulay sa pagpatubo og iyang kaugalingong pagkaon apan gituohan niya nga makat-on sa tanan niyang angay makat unan pinaagi sa pagbasa og mga libro.
Bisan tuod kon ang impormasyon nga iyang nakaplagan makatabang, nadiskubrehan dayon ni Kwan nga ang mahinungdanon kaayo nga leksyon nga iyang nakat-unan miabut pinaagi sa proseso sa aktwal nga pagpananom. Sa matag dugang og tuig nga kasinatian, siya nakakat-on og mas daghan mahitungod sa pinaka-maayong yuta nga gamiton alang sa nagkalainlaing mga binhi, unsaon sa pag-ila tali sa maayo ug dautan nga mga binhi, lainlaing mga paagi sa pagbisbis og tubig ug sa pag-abuno sa mga tanom, ug sa labing maayo nga panahon sa pagpatubo og lainlain nga mga utanon.
Ang mga leksyon nga nakat-unan ni Kwan bisan pa niana, dili lamang limitado sa pagpananom. Usa ka gabii, usa ka kusog nga bagyo mihulga sa pagguba sa iyang garden. Pagkabuntag, nakurat siya sa pagkadiskubre nga ang mga tanom wala naunsa, apan hinoon, mitubo nga mas lig-on tungod sa nadugang nga tubig.
“Tungod niana nga kasinatian, akong nakat-unan nga uban sa hugot nga pagtuo diha sa Dios, kita mahimong mas lig-on sa atong pag-atubang sa mga pagsulay ug mga kalisdanan uban sa kaisog,” miingon si Kwan. “Ang mga panalangin nga akong nadawat tungod sa pagpananom mao ang temporal ug espirituhanon.”
Mga kahon, mga balde, mga botilya, ug ubang mga sudlanan mahimong magamit aron sa paghimo sa gagmayng mga luna ngadto sa mabungahon nga mga garden.
litrato pinaagi ni noelle campbell