Mensahe sa Visiting Teaching
Ubos sa Priesthood ug subay sa Sumbanan sa Priesthood
Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.
Hugot nga Pagtuo • Pamilya • Kahupayan
Minahal kong mga sister, pagkabulahan nato! Dili lamang nga kita mga miyembro sa Simbahan, apan kita mga miyembro usab sa Relief Society —“ang organisasyon sa Ginoo alang sa mga babaye.”1 Ang Relief Society mao ang ebidensya sa gugma sa Dios alang sa Iyang anak nga mga babaye.
Wala ba malipay ang inyong kasingkasing samtang mahinumdom kamo sa madasigon nga sinugdanan niini nga kapunongan? Niadtong Marso 17, 1842, si Propeta Joseph Smith mi-organisar sa mga sister “ubos sa priesthood subay sa sumbanan sa priesthood.”2
Aron maorganisar “ubos sa priesthood” nakahatag sa mga sister og awtoridad ug direksyon. Si Eliza R. Snow, ikaduhang kinatibuk-ang presidente sa Relief Society, mitudlo nga ang Relief Society “dili matukod kon wala ang Priesthood, tungod sa kamatuoran nga gikan niini sa iyang tanang awtoridad ug impluwensya gikan niana nga tinubdan.”3 Si Elder Dallin H. Oaks sa Korum sa Napulog Duha ka mga Apostoles mipasabut, “Ang awtoridad nga gamiton sa mga opisyla ug sa mga magtutudlo sa of the Relief Society … mao ang awtoridad nga moabut nganha kanila pinaagi sa ilang koneksyon sa organisasyon sa Ang Simbahan ni Jesukristo sa mga Santos sa Ulahing mga Adlaw ug pinaagi sa ilang indibidwal nga pagka-set apart ubos sa mga kamot sa mga priesthood lider diin maoy mitawag kanila.”4
Ang pagkaorganisar “subay sa sumbanan sa priesthood” nakahatag sa mga sister og sagrado nga mga responsibilidad. Si Julie B. Beck, kinatibuk-ang presidente sa Relief Society, mipasabut: “Naglihok kita sa pamaagi sa priesthood nga nagpasabut nga kita magtinguha, modawat, ug molihok subay sa pagpadayag; mohimo og mga desisyon diha sa mga council; ug atong hatagan og pagtagad ang pag-amuma sa mga indibidwal. Ang atoa mao ang katuyoan sa priesthood sa pag-andam sa atong mga kaugalingon alang sa mga panalangin sa kinabuhing dayon pinaagi sa paghimo ug pagtuman sa mga pakigsaad. Busa, sama sa atong mga kaigsoonan nga naghupot sa priesthood, ang atoa mao ang buhat sa kaluwasan, pagserbisyo, ug mahimong balaan nga mga tawo.”5
Barbara Thompson, ikaduha nga magtatambag sa kinatibuk-ang kapangulohan sa Relief Society.
Gikan sa mga Kasulatan
1 Mga Taga-Corinto 11:11; Doktrina ug mga Pakigsaad 25:3; 121:36–46
Gikan sa Atong Kasaysayan
Panahon sa pagtukod sa Templo sa Nauvoo, ang grupo sa mga sister nagtinguha nga maorganisar aron sa pagsuporta sa paningkamot sa pagtukod. Si Eliza R. Snow mihimo og mga balaod alang niining bag-o nga grupo. Sa dihang iyang gipakita kini ngadto ni Propeta Joseph, siya mitubag: “Sultihi ang mga sister nga ang ilang halad gidawat sa Ginoo, ug siya adunay butang nga mas maayo alang kanila. … Akong i-organisar ang mga babaye ubos sa priesthood subay sa sumbanan sa priesthood.”6 Sa wala madugay, ang Propeta misulti sa bag-ong naorganisar nga Relief Society: “Karon akong ihatag ang yawe nganha kaninyo sa pangalan sa Dios, ug kini nga Society magmaya, ug ang kahibalo ug ang kaalam modagayday sukad karon.”7 Gipaabut gikan sa mga sister nga mosaka ngadto sa bag-ong ang-ang sa pagkabalaan ug sa pagpangandam alang sa mga ordinansa sa priesthood nga sa dili madugay ipangalagad diha sa templo.
Paghulagway sa litrato pinaagi ni Brandon Flint