Elder Carl B. Cook

Ena Vitusagavulu

A dredre na nona vulica na vosa vaka-Jamani o Carl Bert Cook ena Language Training Mission (sa sosomitaki nikua na Missionary Training Center) ni se cauravou gone daukaulotu. Ni se tovolea tikoga me kila na veivosa rawarawa, era sa toso yani na nona ilawalawa ki na veilesoni dredre cake.

Ni nuiqawaqawa ena berabera ni nona toso, a vaqara na cauravou o Elder Cook na veivuke vakalou ena dua na veivakalougatataki ni matabete kei na masu. Ni oti e dua na nona masu mai vu ni yalona, e nanuma lesu o Elder Cook na nona ciqoma e dua na kena isau matata: e sega ni kacivi koya na Turaga me kenadau ena vosa vaka-Jamani ia me veiqaravi ena yalona taucoko, nona vakasama, kei na nona igu.

“E votu vei au ena gauna vata ga, ‘au rawa ni cakava oya,’” e kaya o Elder Cook, ka se qai kacivi walega me lewena na iMatai ni Kuoramu ni Vitusagavulu. “‘Au rawa ni veiqaravi mai yaloqu taucoko, noqu vakanananu, kei na noqu igu.’ Au tucake ka vakila na yalo vakacegu. E vakasauri, sa veisau na kabasi mai na nodra toso na noqu itokani kei ira na neitou ilala ki na nona nanuma na Turaga me baleta na noqu toso.”

E dina ni tukuna o Elder Cook ni a sega ni mani laki totolo cake kina na nona vulica na vosa ni oti oya, sa sega tale ni qai kauwaitaka na nona berabera ni kila ni sa cakava tiko na ka e vinakata na Turaga me cakava. E kaya o koya, ni lesoni oya, sa bibi sara ena veikacivi kece sa taura me tekivu mai na gauna oya, oka kina na bisopi, daunivakasala ena dua na mataveiliutaki ni iteki, peresitedi ni iteki, peresitedi ni Tabana ni Kaulotu na New Zealand Auckland, Vitusagavulu ni iWasewase, kei na nona ilesilesi oqo.

A rawata o Elder Cook e dua na koroi ni bachelor ena tabana ni volivolitaki mai na Weber State College kei na koroi ni masters ni cicivaki bisinisi mai na Utah State University. Ena nona bula vakacakacaka a cakacaka voli ga ena tabana ni vakatorocaketaki iyauqaqa.

A sucu o Elder Cook mai Ogden Utah e Amerika, ena Okotova ni 1957 vei rau o Ramona Cook Barker kei Bert E. Cook levu. A vakawatitaki Lynette Hansen ena ika 14 ni Tiseba, 1979, ena valetabu e Ogden Utah. Erau nodra itubutubu e lewe lima na gone.