Ni da Veitalatala
Au vakabauta ni sega ni dua vei keda e rawa ni kila taucoko sara na veika a vakayacora ena vukuda na Karisito mai Kecisemani, ia au vakavinavinaka tu ga ena veisiga kece sara ni noqu bula me baleta na Nona solibula ni veisorovaki ena vukuda.
Kemuni na taciqu kei na ganequ, sa vakasinaiti na yaloqu ni da yacova mai na itinitini ni koniferedi oqo. Eda sa vakila vakalevu sara na Yalo ni Turaga. Au vakavinavinaka ka vakakina o ira na lewenilotu kece sara ena veivanua kecega vei ira kece era sa vakaitavi, oka kina o ira era vakacabo masu. Me da nanuma na veitukutuku eda sa rogoca me dua na gauna balavu sara. Ni da sa taura na mekesini ni Ensign kei na Liaona ka na volai tu kina na itukutuku oqo, me da wilika ka vulica.
Vakadua tale, sa vakasakiti dina na ivakatagi kei na sere ena veisoqoni yadua. Au vakavinavinakataki ira yadua era lomasoli me ra wasea vata kei keda na nodra taledi, era sa tarai keda ka vakauqeti keda kina.
Eda sa veitokoni, ena laveliga, vei ira na Veitacini era sa kacivi ki na veitutu vovou ena koniferedi oqo. Eda vinakata me ra kila ni da sa vakanamata tu me da cakacaka vata ena nona inaki na iVakavuvuli.
Au vakavinavinakataki rau ka lomani rau na noqu daunivakasala yalodina, o Peresitedi Henry B. Eyring kei Peresitedi Dieter F. Uchtdorf. Erau turaga yalomatua ka dau veinanumi. Sa yaga vakalevu sara na nodrau veiqaravi. Au lomani ira ka tokoni ira na Taciqu ena Kuoramu ni iApositolo Le Tinikarua. Sa mana vakalevu na nodra veiqaravi, ka ra soli ira vakadua ki na cakacaka. Au vakavinavinaka talega vei ira na lewe ni Vitusagavulu kei na Matabisopi Vakatulewa.
Eda sotava tiko e vuqa na bolebole e vuravura nikua, ia au vakadeitaka vei kemuni ni kauwaitaki keda na Tamada Vakalomalagi. E lomani keda yadua ka na vakalougatataki keda ni da vakasaqarai Koya ena masu ka segata me da muria na Nona ivakaro.
O keda e dua na lotu ni vuravura raraba. Era tu e vuravura taucoko na noda lewenilotu. Me da lewenivanua vinaka ena veivanua eda tiko kina ka da itokani vinaka ena noda veitikotiko, me da tarai ira yani ena matavakabauta tale eso ka vakakina vei ira na noda. Me da ivakaraitaki ni dina kei na buladokai ena veivanua kecega eda lakova kei na veika kecega eda cakava.
Kemuni na taciqu kei na ganequ vinaka vakalevu na nomuni masu ena vukuqu kei na vukudra na Vakaitutu Raraba tale eso ni Lotu. Keimami sa vakavinavinaka vakalevu sara vei kemuni kei na veika kece sara o ni vakayacora tiko mo ni tosoya tiko kina na cakacaka ni Turaga.
Ni o ni lesu yani ki vale, ni qaqarauni. Me tiko kei kemuni na veivakalougatataki mai lomalagi.
Ni bera ni da veisukayaki nikua, meu wasea mada vei kemuni na noqu lomana na iVakabula kei na Nona veisorovaki cecere ena vukuda. Ena loma ni tolu na macawa mai oqo eda na vakananuma tiko kina na vakabauta Vakarisito kece e vuravura na Siganimate. Au vakabauta ni sega ni dua vei keda e rawa ni kila taucoko sara na veika a vakayacora ena vukuda na Karisito mai Kecisemani, ia au vakavinavinaka tu ga ena veisiga kece sara ni noqu bula me baleta na Nona solibula ni veisorovaki ena vukuda.
A rawa Vua me vakasuka ena iotioti ni gauna. Ia a sega. A sotava kina na veika kecega me vakabula na veika kecega. Ni vakayacora vakakina, a solia kina vei keda na bula ni sa oti na bula oqo. Sa vueti keda mai na Lutu i Atama.
Au vakavinavinaka Vua, mai na boto ni yaloqu. E vakavulica vei keda na ivakarau ni bula. E vakavulica vei keda na ivakarau ni mate. A rawata na noda vakabulai.
Niu tinia, meu wasea mada vei kemuni na veimalanivosa laulau oqo ka vola o Emily Harris ka vakamacalataka vakavinaka sara na lomaqu ni sa yaco mai na Siganimate:
Sa lala na isole lineni ka solegi kina ko Koya.
Sa no ga e kea,
Bulabula, vulavula ka savasava.
Na katuba e dola no ga.
Na vatu sa qiqi ya-wa,
Voleka sara me rogo vei au, nodra sere na agilosi ni vakacaucau.
Sega ni tarovi Koya rawa na lineni.
Sega vakakina na vatu iqaqi.
Voqa ni domo mai loma ni qaravatu lala,
“Sa sega eke ko Koya.”
Sa lala na isole lineni ka solegi kina ko Koya.
Sa no ga e kea,
Bulabula, vulavula ka savasava.
Isa, aleluya, sa lala ga.1
Ni kalougata, na taciqu kei na ganequ. Ena yaca i Jisu Karisito, na noda iVakabula, emeni.