Elder José L. Alonso

Ena Vitusagavulu

Ni se bera mada ga ni lewena na Lotu, sa rawata e dua na ivakadinadina me baleta na kaukauwa ni masu o José Luis Alonso Trejo. “Niu se qai yabaki 11,” e kaya o koya, “a voleka niu mate. Sa oti na nodra vakanuinui na vuniwai me baleti au—au rogoca na nodra veivosaki tiko. Au sa mani masu ka masu kina vua na Turaga, qai vakabulai au ko Koya.

“E muri niu rogoca na italanoa kei Josefa Simici ka kila na nona veivosaki kei na Kalou e dua na gonetagane yabaki 14, au kila ni dina. Au kila ni rawa ni sauma na noda masu na Kalou, ni kilai keda o Koya.”

Na yalo vata oqori ni vakacegu a tuberi Elder Alonso ena nona vulica na iVola i Momani. “Ena vuku ni masu kei na ivola oqo, au sa kila deivaki kina ni Karisito ko Jisu,” e kaya o koya.

A sucu o Elder Alonso mai Mexico City, Mexico, ena Noveba ni 1958 vei rau o Luis kei Luz Alonso. Ni se cauravou yabaki tinivakacaca a toki ki na siti o Cuautla e Mexico, na vanua a laki lewena kina na Lotu. Ni dau lakova na Muavata a sota kina vata kei ira itabagone qaqaco vakalotu ka ra dau veiwasei vata kaya ka vakarautaka vua na ikarua ni nona vuvale. A sotavi Rebecca Salazar talega ena Muavata, na yalewa erau a qai veiwatini e muri.

Ni yabaki 19 o Elder Alonso, a laki kaulotu ena Tabana ni Kaulotu na Mexico Hermosillo. Ni oti na nona kaulotu, erau a vakamau o Elder Alonso kei Rebecca ena ika 24 ni Feperueri, 1981, ena Valetabu na Mesa Arizona. Erau nodrau itubutubu e rua na gone.

Me ikuri ni nona veiqaravi vakadairekita ni yavulotu ena iVakarau ni Vuli ni Lotu, e tiko vei Elder Alonso na koroi ni vuniwai vei ira na gone ka cakacaka vakavuniwai ni soli wainimate kei na veisele. Na nona cakacaka e vakaraitaka na gagadre tubalavu ni veiqaravi kei na veivakalougatataki vei ira na tani—me vaka ga na nona a vakalougatataki koya na Turaga ena nona a tauvimate ni se gonelailai. “Na veiqaravi ena vukudra na tani e tarai cake kina na duavata kei na bula ni veitacini,” e kaya o koya, “ka sureta na kaukauwa ni Turaga ki na noda bula.”

Ni bera ni kacivi ki na iMatai ni Kuoramu ni Vitusagavulu, a veiqaravi o Elder Alonso vakabisopi, peresitedi ni kaulotu ena iteki, peresitedi ni iteki, daunivakasala ni peresitedi ni kaulotu, peresitedi ni Tabana ni Kaulotu na Mexico Tijuana Mission, ka Vitusagavulu ni iWasewase.