Elder Larry Y. Wilson

Ena Vitusagavulu

Sa dua na bolebole levu vei Elder Larry Young Wilson, na nona vakatautauvatataka na nona qarava na itavi ni cakacaka, Lotu, kei na matavuvale, ia sa vakadeitaka me ra kila na nona lewe ni matavuvale na kedra bibi vua.

“Ia na veika bibi duadua au vakila sai koya niu tagane vakawati ka tama,” e kaya o Elder Wilson. “Dau tu yadua sara na gauna meu calata kina na nona vakaitavi e dua na gone ena veitaucici, ena veisoqo ni ivakatagi, se na veisoqo tale eso. Au dau wilika vei iratou na italanoa ni vakamoce ka cavuta vata kei iratou na masu ni bera niu vakadavori iratou ena bogi. Sa rui bibi sara me da tiko e kea.”

E kila vinaka tu o Elder Wilson na veika e gadrevi vua e dua e tu vua na itavi ni veiliutaki ena veiyasa kece sara ni nona bula. A sucu o koya ena Tiseba ni 1949 mai Salt Lake City, Utah e Amerika, vei rau o George kei Ida Wilson ka tubu cake e Pocatello, Idaho e Amerika. A rawata e dua na koroi ni bachelor ena Vosa Vakavalagi kei na volavola vaka-Amerika mai na Univesiti e Harvard, e muri a qai rawata e dua na koroi na master ena veiliutaki vakabisinisi mai na Stanford Graduate School of Business.

A cakacaka o Elder Wilson vakadauvakasala ka iliuliu ena tabana ni veiqaravi ni bula. E dina ni osooso vakalevu ena nona cakacaka, a vakadeitaka o Elder Wilson me kakua ni lewa na nona bula.

“Dau biuta wavokita na nomu bula vakacakacaka na veiyalayala eso,” e kaya o koya. “De, qai tiloma na veika kece tale. Me tukuni vakadodonu sara, sa dodonu me ra dau tu vakawawa ena veigauna eso na cakacaka, lotu kei na gauna ni matavuvale. Masuta mo tuberi o na kila na cava me vakaliuci ena dua na siga.”

A veiqaravi gugumatua o Elder Wilson vakadaukaulotu ena Tabana ni Kaulotu na Brazil Central vakabisopi, peresitedi ni iteki, ka Vitusagavulu ni iWasewase ni bera ni qai kacivi ki na iKarua ni Kuoramu ni Vitusagavulu.

E dau vukei Elder Wilson me rawa ni vakatauvatauvatataka na nona veiqaravi kece sara na watina o Lynda Mackey Wilson, ka a vakamautaka ena ika 10 ni Julai, 1974, ena Valetabu e Logan Utah. Erau a susuga cake na Wilson e va na gone.

“Ena veigauna kece niu lako ki na dua na soqoni ni Lotu, ena dau kaya o koya, Moce daulomani. Laki qarava na Turaga,’” e kaya o Elder Wilson. “A vakavulica tiko vei iratou na luvei keirau na ibalebale titobu cake ni noqu veiqaravi. Sega ni dede eratou sa dau kaya, ‘Moce Tata. Laki qarava na Turaga!’