Era Marautaka na Veiliutaki na Welefea, Kacivaki ni Valetabu

E sivia ni 100,000 na tamata era tiko rawa ena lima na soqoni ni ika 181 ni Koniferedi Raraba Vakayabaki ni Lotu i Jisu Karisito ni Yalododonu Edaidai ena Vale ni Koniferedi e Salt Lake City, Utah e Amerika, e milioni tale era sarava se ra rogoca ena Retioyaloyalo, retio, kei na kakaburaki ena Initaneti.

Era vakaitavi ena koniferedi na lewenilotu mai na veiyasai vuravura ena 93 na vosa. Era sa tu oqo ena initaneti na itukutuku kaburaki, na vidio, kei na itukutuku volai ni kakaburaki ena vuqa na vosa ena conference.lds.org ka na vakarautaki talega na kena DVD kei na CD.

A dolava o Peresitedi Thomas S. Monson na koniferedi ena nona kacivaka na vanua ena tara kina e tolu na valetabu vou—Fort Collins, Colorado, USA; Meridian, Idaho, USA; kei Winnipeg, Manitoba, Canada—ka na kauta mai na iwiliwili ni valetabu sa kacivaki se sa tara tiko ki na 26. Ena gauna oqo sa vakayagataki tiko e 134 na valetabu.

A talaucaka talega o Peresitedi Monson na bibi ni cakacaka ni kaulotu, e kaya kina, “Na cakacaka ni kaulotu na drabula ni matanitu.” E rauta ni 52,000 na daukaulotu era veiqaravi tiko oqo ena 340 na tabana ni kaulotu e vuravura raraba.

Ena yakavi ni Vakarauwai, era a tokoni kina e 10 na Vakaitutu Raraba vou ka 41 na Vitusagavulu ni iWasewase, ka ra vagalalataki e 34 na Vitusagavulu ni iWasewase. Me kena ikuri a kacivi o Elder Don R. Clarke ena iKarua ni Kuoramu ni Vitusagavulu me laki veiqaravi ena iMatai ni Kuoramu ni Vitusagavulu. Na Ripote Vakaiwiliwili ni 2010 e vakaraitaka ni sa yacova oqo na 14 na milioni na iwiliwili ni lewe ni Lotu.

E vica na vosa e tauci ena rua na siga ni koniferedi e vakanamata ki na iulutaga ni welefea ni Lotu kei na parokaramu vakasakiti ni welefea ena Lotu—ka marautaki tiko na kena ika 75 ni yabaki ena 2011.

Ena Vakarauwai, a kacivaka kina o Peresitedi Henry B. Eyring, na iMatai ni Daunivakasala ena Mataveiliutaki Taumada, me ra vakananuma na ika 75 ni yabaki ni parokaramu ni welefea, era sa sureti na lewenilotu e vuravura me ra vakaitavi ena dua na siga ni veiqaravi. Me na vakayacori na siga ni veiqaravi oqori ena tabanalevu se iteki ena dua na gauna ena loma ni yabaki. Me ra vakatulewa na veiliutaki ena veivanua me baleta na veika matailalai ni cakacaka ni veiqaravi me vakayacori, ka ra sa vakayaloqaqataki na lewenilotu me ra sureti ira tale eso me ra vakaitavi ke ganita.

A sogota o Peresitedi Monson na koniferedi ena nona ivakadinadina ni Siganimate me baleti Karisito: “A rawa me tu vakasuka ena iotioti ni gauna, [o Jisu Karisito]. Ia a sega. A sotava kina na veika kecega me vakabula na veika kecega. Ni vakayacora vakakina, a solia kina vei keda na bula ni sa oti na bula oqo.

E cake: E tau vaini tiko e dua na cauravou ena loganivaini e taukena na Lotu mai Madera, California, Amerika, ka dau caka kina na resini ni ivakarau ni welefea ena Lotu. iMawi e ra: Eratou tiko e dua na matavuvale ena kakaburaki ena setilaiti ni koniferedi raraba mai Coimbra e Portugal.