Me Tiki ni Noda Bula na Koniferedi

Vakasamataka mo vakayagataka eso na itaviqaravi oqo kei na taro me tekivu kina na veivosaki vakamatavuvale se na vakanananu vakatitobu yadua ni o cakava me tiki ni nomu bula na ivakavuvuli ena koniferedi raraba.

E rawa ni o raica na vosa kece sara ni koniferedi raraba ena initaneti ena conference.lds.org.

iDusidusi: Na naba ni draunipepa sa tuvai koto e ra e vakaraitaka na imatai ni draunipepa ni vosa e tukuni tiko.

Me Baleti Ira na Gonelalai

Sa kacivaka o Peresitedi Thomas S. Monson ni na tarā tale na Lotu e tolu na valetabu vou, sa na kauta mai na iwiliwili taucoko ni valetabu era sa vakayagataki tiko, sa tara tiko, se sa kacivaki oti ki na 160. Raica na mape mo kunei Meridian, Idaho, USA; Fort Collins, Colorado, USA; Winnipeg, Manitoba, Canada; kei na valetabu e voleka duadua vei iko. Wilika se talanoataka tale eso na italanoa a tukuna o Peresitedi Monson me baleti ira na lewenilotu yalodina era sa solibula vakalevu sara me ra lako kina ki na valetabu (tabana 90). Vakotora oqo na lalawa mo curu ki na valetabu ena kena totolo o rawata, se veitalanoataka na veisala eso mo kilikili tikoga kina mo curuma na valetabu.
Ni rau bula voli e vuravura o Atama kei Ivi, e dua na sala erau dau sokalou kina vei Tamada Vakalomalagi na nodrau dau vakacabora na manumanu me isoro. E vakavuvulitaka o Elder L. Tom Perry ni sa mai vakatekivuna na iVakabula na sakaramede vei iratou na Nona tisaipeli ena siga ni Vakacecegu me ivakarau vou ni sokalou. Eda sa tomana tiko na noda sokalou ena noda vakaivotavota ena sakaramede ena Siga ni Vakacecegu. Railesuva vakamatavuvale na vosa nei Elder Perry (tabana 6) me vulici kina na ivakarau dodonu ni isulusulu ena Sigatabu kei na veisala tale eso me da vakarokorokotaka kina na sakaramede kei na Siga ni Vakacecegu.
E vakavuvulitaka o Elder D. Todd Christofferson ni sa vakaroti keda o Jisu Karisito ni dodonu me da dau segata me da vakataki Koya kei na Tamada Vakalomalagi (tabana 97). Ena so na gauna e dau “cudruvi” keda na Luvena na Tamada Vakalomalagi me vukei keda me da vakataki Koya vakalevu cake. Veitalanoataka se cava na kena ibalebale me da cudruvi. Wilika se talanoataka tale na italanoa ni loganiberi tubuwa. Veitalanoataka na sala e rawa ni vukei keda kina me da tubu ka kaukauwa cake ka vuavuaivinaka eso na leqa eda dau sotava.
E vakavuvulitaka o Elder Richard J. Maynes ni matavuvale e rawa ni vaka na dali (tabana 37). Na dali e levu tu na drauna lalai ka ra malumalumu ni ra tu yadua ia ena kaukauwa sara kevaka e tali vata. E tautauvata, ni ra cakava na lewe ni matavuvale yadua na ka dodonu ka ra veivukei, era na vaqaqacotaki yadua na tamata ena matavuvale ka rawa ni ra cakava vata e vuqa sara na ka mai na ka ena rawata e dua. Solia vei ira yadua na lewe ni vuvale e dua na wa. Veitalanoataka na sala eso era na veiqaravi ka veivaqaqacotaki kina na lewe ni matavuvale. Qai raica na kena kaukauwa na wa yadua oqori ni ra sa biu vata.

Me Baleti Ira na iTabagone

Era sa duavata tiko beka ena kena levu e rawa na nomu kalasi se kuoramu? Ni o railesuva oti na vosa nei Peresitedi Henry B. Eyring me baleta na duavata (tabana 62), cakava e dua na lisi ni veika e rawa ni o cakava mo vakaveivolekatitaki ira kina na lewe ni ilawalawa.
E vosa o Elder Russell M. Nelson me baleta na “rai vakavalenikana” ki na talairawarawa (tabana 34). Veitalanoataka ena nomu matavuvale, kalasi, se kuoramu na cava na kena ibalebale oqo kei na vuna e sega ni mana kina.
E vakamacalataka o Elder M. Russell Ballard na loloma savasava i Karisito me loloma yavavala (tabana 46) ka vakaraitaki ena veivalavala lalai ni yalovinaka kei na veiqaravi. Tuvalaka e dua na sala e rawa ni vakaraitaka kina na nomu kalasi se kuoramu vua e dua ena nomu tabanalevu, tabana se nomu itikotiko na loloma me qai cakacakataki sara na ituvatuva oqori.
A talanoataka o Elder Quentin L. Cook me baleta e dua na bausi ka a kune ni oti e dua na danisi ni itabagone (tabana 18). Na veika era raica na veiliutaki ena loma ni bausi e tukuna e vuqa sara na ka me baleti koya na goneyalewa e nona. Na cava soti e tukuna me baleti iko na veika e tawa tu ena nomu bausi, waloti, se katonivuli, na veisau cava beka o na via cakava me baleta na veika o dau maroroya vakavoleka vei iko?
E vosa o Elder Lynn G. Robbins me baleta na noda yaco me da vakataka vakalevu cake na iVakabula (tabana 103). Vakasamataka mada na kena ibalebale me da vakataki Jisu Karisito mai na noda cakava walega na veika e vinakata. Qai vakasamataka na veisau e rawa ni o cakava ena nomu bula mo vakataki Koya vakalevu cake kina na iVakabula.

Me Baleti Ira na Uabula

A talanoataka o Peresitedi Dieter F. Uchtdorf (tabana 58) e dua na italanoa me baleta e dua na tamata ka a bula tu ena ruku ni nona galala ena nona calata e vuqa na itaviqaravi kei na kakana vinaka a vakarautaki ena nona waqa ni saravanua baleta ni sega tu ni kila ni veika kece oqori sa kovuti tu ena isau ni nona tikite. Veitalanoataka vata kei ira na lewe ni matavuvale era taura tu na matabete na sala eso e rawa ni ra sotava kina na “galala” e nodra “ena kaukauwa tabu, na isolisoli, kei na veivakalougatataki e [nodra] madigi kei na dodonu ni ra taura tu na matabete ni Kalou.”
E vakavuvulitaka o Peresitedi Boyd K. Packer me baleta na kaukauwa ni veivosoti (tabana 30). E tu beka eso na tamata e dodonu mo vosota, se tu beka eso na veika dau vakatubu leqa e dodonu mo “kakua … ni tara”? Vakasaqara na veivuke ni Turaga ena kena kunei na sautu kei na kaukauwa ni veivosoti.
E tukuna o Elder Richard G. Scott na nodrau dau veivolavolai kei na watina o Jeanene, me rau vakaraitaka kina na nodrau veitaleitaki (tabana 94). Vakasamataka mo dau vola eso na ivola mo tukuna kina na nomu lomana kei na nomu vakavinavinakataka na watimu. Biuta ena dua na vanua me raica kina na watimu.
E cavuta o Elder David A. Bednar na vosa nei Peresitedi Joseph F. Smith me baleta na veika a sotava ena nona rawata e dua na ivakadinadina (tabana 87). Railesuva na italanoa oqo ka vakasamataka na veika o sa sotava ka vakauqeta na nomu ivakadinadina.

Ljubljana, Slovenia

Coatzacoalcos, Mexico