Elder Kazuhiko Yamashita

Ena Vitusagavulu

Mai na gauna e yaco kina me dua na bisopi gone mai Fukuoka e Japani, ena vica vata na yabaki sa oti, sa vuli o Elder Kazuhiko Yamashita mai na nodra ivakaraitaki vinaka kei na ivakarau ni bula na nona iliuliu qase cake.

Ni oti ga na nona vakawatitaki Tazuko Tashiro na watina, o Elder Yamashita, eratou sa toki mai Tokyo ki Fukuoka, na vanua a laki kacivi kina o Elder Yamashita me bisopi ni tiko na nona yabaki ena mua ni ruasagavulu vakacaca.

“A dredre vei au kei na noqu matavuvale,” e kaya o Elder Yamashita. “E tolu na luvei keirau lalai ka keitou se vou mai ki na vanua oqori—ia a dua talega na gauna vinaka ni veivakavulici kei na vuli vei au, ka vakaukauwataki cake kina na noqu ivakadinadina kei na vakabauta.”

“Io a tu na noqu veigauna dredre, ni se qai tekivu na noqu matavuvale ka se bera ni levu na noqu kila ena veiliutaki ena Lotu,” e kaya o Elder Yamashita. “Era ivakaraitaki vinaka na noqu iliuliu qase cake ka ra vakavulica vei au e vuqa na lesoni mai na nodra ivakarau ni bula kei na itovo.”

E kaya o Sisita Yamashita ni raica tiko na nona ciqoma na watina e vuqa na veikacivi ka yaco me dua na tama vinaka ka iliuliu vakayalo cecere mai na bolebole e kauta mai na veikacivi oqori. Ni toso na gauna e raica o koya na veisau sa yaco vua ni sa yaco me tama ka tagane vakawati yalovinaka ka dauloloma vakalevu cake. Eratou dau marautaka na matavuvale na nodratou dau tiko vata, oka kina na nodratou dau lakova na veilakolako babalavu e gaunisala e veiyabaki.

O Elder Yamashita, ka a sucu ena Sepiteba ni 1953, e luvedrau tagane o Kiyoshi kei Sadae Yamashita. A tubu cake e Tokyo mai Japani, na vanua a kunea kina na Lotu ena 1971 ena Expo 70, na Vakaraitaki Ka ni Vuravura.

A rawata o Elder Yamashita e dua na koroi ni bachelor ni vuli mai na Univesiti e Saitama kei na dua na koroi ni master ena vakadidike ni qito mai na Univesiti na Tsukuba. A vulica talega na iwalewale ni vulici ni qito ena Brigham Young University. Sa dauveidusimaki ka parofesa o Elder Yamashita ena vica na univesiti ka veiqaravi ena vica vata na isoqosoqo ni vakadidike, itikotiko kei na qito.

Erau a vakamau o Elder Yamashita kei na watina ena ika 29 ni Maji, 1980, ka vauci vata ena Tiseba ni 1980, ni tara oti na Valetabu e Tokyo Japan. E ono na luvedrau.

Ni bera ni kacivi ki na iMatai ni Kuoramu ni Vitusagavulu, a veiqaravi o Elder Yamashita vaka: bisopi, lewe ni matabose e cake, peresitedi ni tabana ni kaulotu ena iteki, peresitedi ni iteki, ka Vitusagavulu ni iWasewase.