Na Veivakalougatataki Tawamudu ni Vakamau
Sa vakaibalebale vakalevu cake na veivauci ni valetabu ni sa toso tiko na bula. Ena vukei kemuni mo ni veivolekati vakalevu cake ka kune marau kei na vakacegu ena bula oqo.
Na itukutuku totoka o ya mai na matasere vakasakiti oqo au nanuma ni vakamacalataka na noda ivakarau ni bula e vuqa vei keda ni da: “tovolea me da vakataki Jisu.”
Ena ika 16 ni Julai, 1953, keirau a tekiduru kina vakaveiwatini gone kei Jeanene na noqu daulomani ena dua na icabocabo ni soro ena Valetabu e Manti Utah. A vakayagataka o Peresitedi Lewis R. Anderson na dodonu ni veivauci ka cavuti keirau me keirau veiwatini, keirau sa vakawati ena bula oqo kei na veigauna tawamudu. E sega vei au na kaukauwa meu vakamacalataka kina na sautu kei na vakacegu mai na veivakadeitaki, niu tomana na noqu bula me kilikili tiko, ena rawa meu na tikoga kei Jeanene na noqu daulomani kei ira na luvei keirau me tawamudu ena vuku ni cakacaka vakalotu tabu o ya ka vakayacori ena kaukauwa dodonu ni matabete ena dua na nona vale na Turaga.
Eratou sa vauci vei keirau na luvei keirau e vitu ena vuku ni cakacaka vakalotu tabu ni valetabu. O Jeanene na watiqu talei kei na rua na luvei keirau eratou sa tiko ena tai ni ilati kadua. Eratou sa vakavuna vei keitou yadua na vo ni matavuvale na gagadre kaukauwa me keitou bula me rawa kina ni keitou rawata vata na veivakalougatataki tawamudu kece ka yalataki ena loma ni valetabu.
E rua na duru bibi ka tokona na nona ituvatuva ni marau na Tamada Vakalomalagi o ya na vakamau kei na matavuvale. Sa ivakadinadina ni kedrau bibi na nona segata tiko vakaukauwa o Setani me voroka na matavuvale ka vakawalena na bibi ni cakacaka vakalotu ni valetabu, e vauca vata na matavuvale me tawamudu. Sa qai vakaibalebale vakalevu cake na veivauci ni valetabu ni sa toso tiko na bula. Ena vukei kemuni mo ni veivolekati vakalevu cake ka kune marau kei na vakacegu ena bula oqo.
Au a vulica e dua na lesoni bibi mai vei watiqu ena dua na gauna. Au dau veilakoyaki vakalevu ena noqu cakacaka. Au lako tu voleka ni rua na macawa kau lesu mai ki vale ena mataka ni Vakarauwai. Se vo toka e va na auwa ni bera niu qai lako ki na dua tale na soqoni. Au raica ni sa ca na neitou misini lailai ni savasava ka savasava tikoga e ligana na watiqu. Au sa tekivu cakava sara na misini.
A lako mai o Jeanene ka kaya, “Rich, na cava o cakava tiko?”
Au kaya, “Au cakava tiko na misini ni savasava mo kakua kina ni savasava e ligamu.”
E kaya o koya, “Kua. Laki qito vata kei iratou na gone.”
Au kaya, “Au rawa ni qito vata kei iratou e veigauna kecega. Au via vukei iko.”
E qai kaya o koya, “Richard, yalovinaka laki qito vata kei iratou na gone.”
Ni vakaroti au vaka o ya, au muria.
E dua na gauna vakasakiti au tiko kina kei iratou na gone. Keitou veicemuri wavoki ka vaqiqiqi ena mimira ni draunikau ni vulaimago. Oti au qai lako ki na noqu soqoni. Keu a sa guilecava beka na gauna o ya kevaka a sega na lesoni a vinakata o koya meu vulica.
Ena mataka o ya rauta na 4 na kaloko, au yadra mai niu vakila e rua na liga lalai e domoqu, dua na iregu e baluqu, ka vakasolokakanataki e daligaqu na vosa oqo, kau na sega vakadua ni guilecava: “Ta au lomani iko. O iko na noqu itokani vinaka duadua.”
Kevaka o ni sotava tiko na veika o ya ena nomu matavuvale, sa yaco tiko vei kemuni e dua na reki vakalomalagi ni bula.
Kevaka o cauravou sa veiganiti na nomu yabaki ni bula ka se bera ni o vakawati, kakua ni vakaoti gauna ena veika wale. Tosoya na nomu bula ka sasaga vakatabakidua mo vakawati. Kakua ni vakawelewele ena gauna oqo ni nomu bula. Kemuni na cauravou, laki kaulotu ena bula kilikili. Qai biuta me nomu sasaga bibi duadua mo raica e dua na nomu itokani tawamudu bula kilikili. Ni o vakila ni o sa taleitaka tiko e dua na goneyalewa, vakaraitaka vua ni o iko e dua na tamata vinaka ka na taleitaka o koya me kila vakavinaka cake. Kauti koya ki na veivanua vivinaka eso. Veisautaka na vanua drau dau gadi kina. Kevaka o vinakata me dua na watimu vakasakiti, o na gadreva sara me na raica o koya ni ko tagane vinaka ka rawa ni vakawatitaki.
Kevaka o sa kunea e dua, e rawa ni o cakava e dua na ivakarau matalia ni veimusumusuki kei na vakamau me vuabale kina na nomu marau tawamudu ena nomu tikoga ena loma ni iyalayala ni bula kilikili sa virikotora tu na Turaga.
Kevaka o sa vakawati, o sa yalodina tiko beka vua na watimu ena nomu vakasama kei na yagomu? O sa yalodina tiko li ena nomu veiyalayalati ni vakamau ena nomu sega ni vakaitavi ena dua na mataqali veitalanoa kei na dua tale na tamata o na sega ni vinakata na watimu me rogoca? O sa dau yalovinaka ka veitokoni tiko vua na watimu kei ira na luvemu?
Kemuni na taciqu, o dau liu beka ena itaviqaravi vakamatavuvale me vaka na vulici ni ivolanikalou, masu vakamatavuvale, kei na lotu vakamatavuvale, se dau veisosomitaki na watimu ena vuku ni nomu vakawelewele. O sa dau tukuna tiko beka vakavuqa vua na watimu na levu ni nomu lomani koya? Ena kauta mai vua na marau cecere. Au dau rogoca vei ira eso na tagane niu tukuna vaqori vei ira na vosa oqo, “Oi sa kila tiko o koya.” Mo tukuna vua. Ena tubu, ka vakalougatataki vakalevu e dua na marama ena veivakadeitaki o ya. Vakavinavinakataka na veika e cakava vei iko na watimu. Dau vakaraitaka wasoma na loloma kei na vakavinavinaka oqori. Oqori ena vutuniyau vakalevu cake kina ka logavinaka ka vakainaki na bula. Kakua ni kinoca na ivakaraitaki ni loloma eda sucu kaya mai oqori. Ena uasivi cake kevaka o mokoti koya tiko ni o tukuna vua.
Au vulica mai vua na watiqu na bibi ni ivakaraitaki. Ena itekivu ni neirau bula vakawati e vakavuqa niu dau cega na noqu ivolanikalou meu tukuna e dua na itukutuku kau na raica e dua na itukutuku veivakauqeti, ka veitokoni mai vei Jeanene ni tu e loma. Ena so na gauna e dau luvuci au sara ka voleka kina ni curuoso na lomaqu. Na veitukutuku talei oqori mai vua e dua na yalewa vakawati dauloloma sa yaco me iyau talei ni vakacegu kei na veivakauqeti.
A tekivu meu dau cakava na veika vata oqori vua, kau sega ni kila na levu ni kena ibalebale vua. Au nanuma ena dua na yabaki sa sega na ka meu volia kina vua e dua na iloloma ni valentine, au mani nanuma kina meu boroya e dua na iyaloyalo ena katuba ni katoniwaililiwa. Au cakava na noqu maqosa duadua; ia e dua na cala au cakava. Niu a vakayagataka na iboro waiwai, ka sega ni iboro wai. A sega ni vakatara meu tovolea meu savata laivi na iboro tudei o ya.
Au nanuma ena dua na siga, au a taura eso na pepa mokimokiti lalai ka dau basika ni da via vaqarataka na pepa kau vola kina na naba 1 ki na 100. Au vukici ira sobu, ka vola vua e dua na itukutuku, e dua na vosa ena dua na pepa momokiti. Au qai tomiki ira ka biuta ena dua na waqanivola. Au nanuma ni na dredrevaka.
Ni sa takali yani, au raica ena nona veika vakaitaukei na levu ni nona dau taleitaka na veitukutuku rawarawa keirau dau veiwaseitaka. Au raica ni sa kabira vakavinaka sara tu ena dua na tiki ni pepa na pepa momokiti yadua oqori. E sega walega ni a maroroya tu na itukutuku me nona ga, ia e taqomaki ira ena valasitika me vaka ni ra dua na iyau talei. E dua ga e sega ni biuta vata kei na kena vo. E se toka ga ena daku ni iloilo ni neitou kaloko e valenikuro. E vakaoqo, “Jeanene, sa kena gauna meu tukuna vei iko niu lomani iko.” Ena toka ga e kea kau dau vakananuma kina na luvena yalewa vakasakiti o ya na Tamada Vakalomalagi.
Niu vakasamataka lesu na neirau bula vata, au vakila na levu ni neirau sa vakalougatataki. Keirau sega ni dau veileti ena neirau vale se tau na vosa rogorogo ca ena keirau maliwa. Au sa qai kila oqo ni yaco mai na veivakalougatataki oqori ena vukuna. E basika ena nona dau solisoli, veiwasei, ka sega ni dau nanumi koya ga. Ena neirau bula vata mai muri, au na tovolea meu vakatotomuria na nona ivakaraitaki. Au vakatura mo ni dau vakayacora vakakina vakaveiwatini ena nomuni veivale.
Na loloma savasava sai koya na kaukauwa sega ni vakatauvatani rawa ka mana ni vinaka. Na loloma dodonu sa yavu ni bula vakawati qaqa. Sa ivuvu taumada ni gone bula mamarau, ka susugi vakavinaka. O cei beka e rawa ni vakarautaka vakadodonu sara na veivakauqeti dodonu ni nona loloma e dua na tina? Na vuanikau cava ena basika mai na sorenikau ni dina ka bucina vakamaqosa e dua na tina qai vakabulabulataka ena loloma ena qele bulabula ni nona vakasama kei na yalona dau veivakabauti e dua na gone? Ni o tina sa soli vei iko na yalokidakida vakalou me vukea na nomu kidava na veitaledi digitaki eso nei luvemu kei na veika duatani e rawa ni rawata. Ena rawa vei iko kei na watimu mo drau susuga, ka vaqaqacotaka, ka vakavuna me seraka na veitovo ni bula oqori.
Sa dua na ka veivakavutuniyautaki na vakawati. E vakasakiti na bula vakawati. Ni toso na gauna sa na tekivu me tautauvata na nomudrau vakasama ka tautauvata na nomudrau nanuma kei na veika drau vakila. Ena so na gauna drau na mamarau kina, gauna ni vakatovotovo, kei na gauna ni veivakatovolei, ia ena tuberi kemudrau vata na Turaga ena gauna ni nomudrau tubu oqori.
Ena dua na bogi a yadra tagitagi mai o Richard na luvei keirau tagane lailai ka leqa tiko na nona uto. Keirau a rogoca vata. E kena ivakarau ni dau duri na watiqu me raica na gone ni tagi, ia ena gauna oqo au kaya, “Au na laki raici koya.”
Ena vuku ni leqa e tiko vua, ni sa tekivu tagi, ena tatuki vakatotolo sara na utona. Ena lua ka vakaduka na iubi ni mocemoce. Ena bogi o ya au a roqoti koya vakavoleka sara meu vakamalumutaka na tatuki ni utona ka vakadulai koya ena noqu veisautaka na nona isulu ka veisautaka na iubi ni imocemoce. Au roqoti koya toka me yacova ni sa moce. Au a sega ni kila ena gauna ko ya ni oti ga e vica na vula sa na takali yani. Au na dau nanuma tiko ga na noqu roqoti koya toka ena loma ni bogi o ya.
Au nanuma vinaka toka na siga e takali yani kina. Ni keirau lesu mai kei Jeanene mai valenibula, keirau a kele e yasa ni gaunisala. Au mokoti koya. Keirau veitagicaki vakalailai, ia keirau kila ni keirau na laki tiko vata kei koya ena yasa kadua ni ilati ena vuku ni veiyalayalati keirau sa vakayacora ena valetabu. Oqori a vakavuna me rawarawa ni ciqomi na nona takali.
Na nona dau yalo vinaka o Jeanene sa vakavulica vei au e vuqa sara na veika yaga. Au se yalowai vakalevu, o koya e vakaitovo na nona bula ka vakayalo. Na bula vakawati e vakarautaka e dua na gauna me biu laivi kina na kocokoco kei na nanumi koya ga. Au vakabauta ni dua na vuna eda vakasalataki kina meda vakawati vakatotolo ena noda bula me levei kina na kena tarai cake na ivakarau ni bula e qai dau dredre na kena veisautaki.
Au lomana na tagane e se bera ni vakayacora na digidigi o ya me vakasaqara na nona itokani tawamudu ka tagi na yaloqu ena vukuna na marama e sega ni dua na nona madigi ni vakawati. Eso beka vei kemuni era na galili ka nanuma ni sega ni taleitaki ka sega ni kila se na rawa vakacava ni yaco mai vua na veivakalougatataki ni vakawati kei na gone ena nona matavuvale. E rawa vua na Turaga na ka kecega, ka dau dinata na Nona yalayala e vakauqeti ira kina na Nona parofita me ra tukuna. Na tawamudu e dua na gauna balavu. Vakabauta na veiyalayala oqori ka bula me rawa ni ganiti iko, baleta ni yaco mai na Nona gauna ena rawa ni vakataucokotaka na Turaga ena nomu bula. E vakadeitaki tu, ni o na ciqoma na yalayala kece sara sa yalataki tu o bula kilikili kaya.
Yalovinaka ni vosoti au niu tukuna tiko na watiqu talei o Jeanene, ia o keirau matavuvale tawamudu. E dau mamarau o koya, ia e vuqa na marau e yaco mai na nona dau qaravi ira na tani. Ena gauna sara mada ga e tauvimate bibi koto kina, ena nona masu e veimataka ena kerea na Tamana mai Lomalagi me tuberi koya ki vua e dua e rawa ni vukea. Na kerekere ena yalodina oqori sa dau saumi ena veigauna eso. A vakamamadataki na nodra icolacola e vuqa; a vakararamataki na nodra bula. Sa dau vakalougatataki tikoga me iyaya ni cakacaka ka dusimaki mai vua na Turaga.
Au kila na nona lomani e dua na luvena yalewa na Tamada Vakalomalagi ka a bulataka ena loloma vakalou kei na yalodina na taucoko ni bula dina vakamarama. E dei na yaloqu ni, ena neirau gauna mai muri, niu raici koya tale ena yasa kadua ni ilati, keirau na vakila ni sa qai titobu cake ga na neirau veilomani. Keirau na veitaleitaki vakalevu cake, ni keirau tu voli ena gauna oqo ka tawasei keirau tu na ilati. Ena yaca i Jisu Karisito, emeni.