Elder Ian S. Ardern

Ena Vitusagavulu

Ena veigauna kece e taqiri kina na talevoni se dua e tukituki e katuba, na imatai ni vosa ena cavuka mai na gusui Elder Ian Sidney Ardern sai koya “E rawa beka niu vukei iko?”

A sucu vei rau o Harry kei Gwladys McVicar Wiltshire mai Te Aroha e Niu Siladi, ena Feperueri ni 1954, e nanuma lesu o Elder Ardern ni vakavuqa na veivalavala rairai lalai ni veiqaravi e dau vakavuna na duidui levu ena nodra bula o ira era solia kei ira era ciqoma. “E sega ni dau logaloga vinaka e veigauna na veiqaravi, ia ena vakalougatataki kina e veigauna kecega na nomu bula,” e kaya o Elder Ardern.

Erau a sota o Elder kei Sisita Ardern ni rau vuli tiko ena Church College e Niu Siladi ka rau vakamau ena Valetabu e Hamilton Niu Siladi ena ika 17 ni Janueri, 1976. Eratou tubu cake na luvedrau e lewe va ena dua na vuvale ka vakaliuci kina na veikauwaitaki loloma vakamatavuvale kei na kena gadrevi me kilai ka bulataki na ivakavuvuli ni kosipeli. “Sa ka ni veivakalougatataki ni laurai talega na veika oqo ena nodra vuvale na gone era sa vakawati,” e kaya o Elder Ardern.

Sa dau vakaliuci ena matavuvale na Ardern na vakamuri ni nodra ivakavuvuli na parofita. Sa yaco me itovo tudei na vuli ivolanikalou e veisiga baleta ni ra dau raica na gone me vakayacori me rawa ni ra veivukevuke kina ena kena vakabiri na sitika damudamu ena ivolanivula me vakaraitaka ni sa vakayacori na wiliwili ena siga ko ya. “Mai na veika lalai ka rawarawa sa rawa ni bulicake kina na itovo tudei vivinaka,” e kaya o Sisita Ardern.

Ni bera ni kacivi ki na iMatai ni Kuoramu ni Vitusagavulu, era wili ena nona veiqaravi vakalotu o Elder Ardern na daukaulotu mai Varanise kei Belgium, peresitedi ni Cauravou ena iteki, lewe ni matabose e cake, daunivakasala nei bisopi, bisopi, daunivakasala nei peresitedi ni iteki, peresitedi ni Tabana ni Kaulotu e Suva mai Viti, ka Vitusagavulu ni iWasewase.

A rawata o Elder Ardern na koroi ni bachelor kei na masters ena veika ni vuli mai na University of Waikato e Niu Siladi. Na nona bula vakacakacaka e okati kina e vuqa na itutu ena iVakarau ni Vuli ena Lotu, oka kina na qasenivuli, dairekita, kodineita ni semineri e Niu Siladi, qasenivuli liu ena Church College mai Niu Siladi, ka Dairekita ena iWasewase ena Pasifika.